鳳凰夜市 - 張家界自由行 - Day 3 (下午)

Blog in Progress
下午去鳳凰程車相當不順利。首先原本打算坐下午 2:30 班大巴直去鳳凰。點知去到車站至發覺班大巴已經客滿。呢個故事教訓我地下次坐呢程大巴,最好早上一早先去汽車站買定車票;如果出發之前一日已經在武陵源,甚至可以去車站問問可否早一日預訂車票。冇大巴坐唯有坐中巴先回張家界市,在張家界市轉乘中巴去吉首。提提一樣需要注意的事:由張家界市去吉首呢程中巴每數十分鐘有一班,在室內票站買票後記得要出去出面露天車站找站務員在車票上寫上下一班車個車牌號碼,車開前跟車牌號碼上車 (等同排隊,不過唔洗企定定咁排)。


呢程中巴好迫同都幾污糟,o的瓜子殼一地都係同天雨關係張地毯又濕又霉。程車我地 3 點幾上車 8 點 至到達吉首。

跟住又另一個失誤。本來到達吉首後應立刻轉車去鳳凰,但同行友人想去方個便我又冇留意去鳳凰已經係尾班車 (響香港有幾可會見 7 點幾 8 點的尾班車);結果方完便番車站已經成個車站鬼影都冇隻。

冇計下唯有打的去鳳凰,又順便提提有關吉首去鳳凰一個注意事項:呢程路如果打的的話,千萬不要上 o的價錢太平的計程車。吉首去鳳凰一般的士議價會在 RMB 100 左右。我讀過一個 Blog 講有人向國內一些旅遊俱樂部報告吉首有些的士司機會以 RMB 10 -30 向遊客提供包車去鳳凰,但去鳳凰光過路費來回便要 RMB 20。個多鐘頭車程未計油錢都只係賺十元八塊根本不大可能,當中司機有什麼企圖就不得而知了。

當天結果截了架的士議價 RMB 120,攪到 9 點幾至到達鳳凰。今次在鳳凰入住的亦係四星酒店,房間被舖洗手間毛巾同各種用具都乾淨企理,服務員態度親切,亦係值得推介。

酒店 check-in 完便行去虹橋方向食晚飯同影夜景。首先又釘個鳳凰市地圖參考 o下:

 

鳳凰夜市都集中在虹橋一帶,我地從酒店鳳凰路位置先向南行去建設路,沿途有些相信只在夜晚才開檔的街邊熟食檔,相當熱鬧,到建設路向東行,經虹橋中路往虹橋,虹橋中路沿路都係 o的 比較現代化的商店,應該係鳳凰夜晚其中一個比較熱鬧的街道,在虹橋中路近虹橋處見有幾間餐館未打洋便入去醫肚,餐館菜式質素亦相當不錯。




欣賞夜景係去鳳凰其中一個指定項目,食完飯便行去虹橋找位置影夜景。



聽當地遊客講鳳凰當地有些店舖有腳架出租,可惜太夜到步沒機會用到這樣方便的服務。


留言

  1. 版主你好! 請問你在鳳凰入住那間四星酒店呢? 謝謝!

    回覆刪除
  2. 其實在這篇遊記 ~ Book 酒店 3 裡都有寫到,當年我們在鳳凰入住的是栖凤国际大酒店;不過當時的酒店網頁現在好像已經掛掉了 :-w。我們去張家界已經是很多年前的事,那間酒店現在是怎樣的狀況就不太清楚了。

    回覆刪除

發佈留言