齋浦爾市集 - 印度之旅 2009 Day 4 下午

Blog in Progress
遊覽印度金三角,如果想行吓當地嘅市集,首選當然係首都德里。德里 Connaught Place 附近嘅姜帕特大街 (Janpath Street)、或 Dariyaganj 附近嘅月光市集 (Chandni Chowk) 都係唔錯嘅選擇。可惜因為去喀什米爾班機延誤嘅關係,在德里嘅行程當中結果都偷唔到時間去這些市集一行。幸好在齋浦爾把握了唯一的機會離團到當地嘅市集走了一轉,親身走進印度人日常生活感受當地嘅風土民情。

齋浦爾嘅市集都集中在風之宮殿一帶。今次我地只係夠時間到比較出名嘅崔波萊市集 (Tripolia Bazaar) 同附近遠少少嘅 Nehru Bazaar。大家可以響下面個地圖睇到今次我地個步行路線。



其實如果時間足夠又比較喜歡行街睇嘢買嘢的話 (駛講! 緊係鍾意行街買嘢啦),可以響崔波萊市集向西面行遠少少,再轉入 Indira Bazaar,一次過行晒由 Indira Bazaar、Nehru Bazaar 同 Bapu Bazaar 這三個市集組成嘅一條長長的購物街。

講番今次我地個行程。我地響城市宮殿飲完杯嘢,之後便沿着宮殿東門離開。行出宮殿途中要經過兩道閘門,在閘門附近一帶可以看見很多我相信係露宿者嘅印度人。見到我地四個遊客行出嚟,幾個小朋友即刻追上前來伸手問我地攞錢。讀過通識科嘅都應該知道,響咁嘅環境之下絕對唔可以起同情之心給他們任何東西,否則埋伏響附近嘅小朋友便會一擁而上將我地重重圍困,順便溶埋我地都可以。我盡量望都唔望佢地一眼筆直朝閘門方向前行,離開城市宮殿。

行出宮殿第二道閘門轉右向南行便是 Johari Bazaar Road,呢條街主要賣衫,o岩晒我地胃口。我地響條街行唔夠兩步已經有位印度朋友好熱情咁走過嚟趕我地入去佢舖頭道。我地睇咗陣見冇乜嘢o岩於是離開間舖。點知嗰位印度朋友照樣跟住我地出嚟然後再趕我地入去下一間舖道,可惜呢間都係冇乜嘢o岩買。當我地行出間舖嗰位印度朋友竟然再接再勵,如是者第三間、第四間都係咁。嘩~~呢位印度大亨條街間間舖都有你份你一條友駛唔駛發展到咁大規模呀!不過後來諗清楚嗰位印度朋友可能係響呢條街打骰嘅一位當地陀地,如果拉到客入去條街邊間舖做成生意嘅話就有得分番份佣。最後我朋友終於響街尾一間舖頭道睇o岩件衫;呢位印度朋友結果都做成我地一單生意。



在 Johari Bazaar Road 轉右向西面行就係出名售賣銀器嘅崔波萊市集。就我地所見條街比較多舖頭售賣銀具器皿,飾物店都有一兩間不過唔多。我地行咗半條市集街,跟住就轉左向南行去 Kishanpol Bazaar Road。

呢條街多數係賣啲家庭日用品多,不過都見到一間賣咖哩粉嘅舖頭。唔知點解響條街行嗰陣會不時聞到一陣平時只可以在公厠才聞到嘅香味,幸好陣味還不算太過濃烈我都仲頂得佢順。



在街尾 Ajmeri Gate 轉左向東行,便是 Nehru Bazaar。 Indira Bazaar、Nehru Bazaar 同 Bapu Bazaar 這三個市集都係集中一些以賣鞋為主、衣飾為副嘅店舖。我朋友就響 Nehru Bazzar 其中一間舖頭道睇中咗一對人字拖 ... 跟住又有故仔要講嘞。

<

話說我地行到入去間鞋舖,我兩位朋友都睇中咗呢款人字拖,其中一位朋友好快就揀o岩顏色尺碼,但另一位朋友喜歡嘅顏色剛好只得9號尺碼,佢要大一個碼先o岩著。間舖個售貨員嘗試推銷其他顏色可惜我朋友都係睇唔o岩。跟住我見到舖頭幾位售貨員開始用自己語言商量咗一陣,然後其中一位售貨員就行咗出舖頭。當時我估正路佢應該係過隔離舖睇吓有冇我地要嘅貨可以借番嚟賣比我地啦。點知原來嗰位天才售貨員係偷偷地拎咗對9號鞋出舖頭出面用筆將個9字畫成一個10字,然後再響個10字隔離畫個+號,我地見到呢對10+號鞋真係比佢吹到啤一聲。



最後我地只係買咗嗰對o岩顏色o岩尺碼嘅人字拖。印度人一樣幾乞人憎嘅就係佢地做遊客生意嘅手法。又講講我在網上曾經讀過有關當地人兩個騙遊客嘅慣用手法:第一係反口覆舌;例如遊客乘搭三輪車前跟司機商議好該程車嘅價錢,但到落車時個司機就反口加價。呢招對應方法係議好價之後要記得將目的地同車費白紙黑字寫給司機看,司機確認了才好上車。我曾經在一個博客見過一位驢客出發印度前先打印定數十張有簽名欄嘅 mini contract,上車前填上目的地同車費,再讓司機簽名確認了才上車。另外就係找贖;無論三輪車、計程車、購物以至景點售票處,印度人都喜歡以沒有找贖為借口多收遊客費用。所以可能的話平日消費時多找機會換些零錢旁身。還有購物時要記得永遠要先取貨,後付錢,咁樣可以減少好多不愉快爭執發生嘅機會。

講番個行程,我地響 Nehru Bazaar 再行咗陣,見個天色開始轉黑,於是響附近嘗試叫三輪車番酒店。呢種叫 Rickshaw 嘅三輪車係印度一種主要嘅交通工具。每部 Rickshaw 後坐有兩個乘客坐位,但實際載客量無限。我曾經響德里見過一部 Rickshaw 落客係落極都仲有客落嘅,個情況就好似幾廿年前無綫電視雙星報喜入面啲攪笑短劇一樣,分別只係後面冇咗啲笑聲配音。雖然每部 Rickshaw 都有計程錶但實際上乘車前要先跟司機跟據目的地議價。市區內每程車費一般在 rs100 以下,幾平幾貴就睇個人講價嘅功力嘞。



我地響 Nehru Bazaar 嘗試叫過兩架 Rickshaw,但兩部車個司機都唔知我地住間酒店響邊。攪~~錯~~Holiday Inn 個朵咁響竟然都冇人知響邊呢個真係有啲此料不及。冇辦法之下,同離食飯都仲有段時間於是我地決定行番酒店。我地沿着 Choura Rasta 向北行番去崔波萊市集,沿市集再向東行到 Badi Choupade 個位見到有部 Rickshaw 吉車於是再試吓走去問個司機識唔識路,果然出入大街嘅司機係唔同啲,終於都揾到個識路嘅司機。呢程車司機開價 rs100,我地都冇氣同佢講價一百就一百啦。到酒店番房 hea 咗陣跟住落餐廳食晚飯。雖然今晚終於可以早番少少上床瞓覺,不過第朝係四點 morning call,因為跟住又係一程5粒鐘嘅車程番德里機場,搭早上11點幾班內陸機去我地嘅下一站 - 喀什米爾。


留言

  1. 你寫既資料非常有用呀!
    我也將會去印度
    好想知道邊個值得去呀?

    廓特魯寺院
    依特瑪瓦德拉寺
    齋著爾大理石寺
    喀什米爾滑雪

    同埋果邊溫度點呀?

    回覆刪除
  2. 印度各地天氣可以響 http://new.in.weather.yahoo.com 揾到。

    據我所知喀什米爾嘅古爾瑪係一處滑雪勝地。12月應該開始積雪但雪還未夠厚到足以滑雪。到大約二月頭至係滑雪季節。古爾瑪應該冇給初學者用嘅滑雪場。滑雪人仕要坐纜車上到海拔 3-4000m 從高山上滑到山下。

    當山上開始積雪,據我所知一般香港旅行團到古爾瑪多數會安排一程十數分鐘自費嘅、由人力拉動嘅雪橇旅程給團友玩。如果你係自己去,應該可以找船屋屋主幫手安排上山程車、登山纜車同租用滑雪用具。從一些外國網站得知當地人仲未興玩 snowboard,所以很大機會只能找到玩 ski 嘅用具可以租用。

    如果你唔係嗰類可以從山上滑十多公里到山下嘅高手的話,拎住啲滑雪用具你可以做嘅只係揾個安全啲嘅斜坡自己行上去再滑番落嚟直至筋疲力盡,然後再影相走人,又或者玩雪橇嘅由個當地苦力拉你上斜坡再滑番落嚟,咁樣好唔好玩呢個就真係見仁見智了。

    至於齋著爾大理石寺,我估你可能係指齋浦爾雲石印度廟 (Birla Temple Jaipur)。因為我跟個團都有安排呢個自費活動,所以當時我出發前都有揾過有關資料。據我所知呢間廟係免費入場,位置離市中心不遠,你上 yahoo 用英文 keyword search 應該好易揾到啲相睇。當時我跟個團收 US$ 20 一位,如果我自己坐 rickshaw 去,四個人來回頂多 rs 200 車費,我覺得唔值,所以先離團去市集行街。

    茶實值唔值呢個問題好主觀,跟團定自己去、價錢、個人喜好等都只可以靠自己衡量。不過去完呢個 trip 之後我對跟團嘅自費活動安排的確係有啲睇法,遲啲寫完喀什米爾個行程之後我會再寫多少少呢方面嘅嘢。

    廓特魯寺院同依特瑪瓦德拉寺呢兩個地方我手上冇乜相關資料,抱歉比唔到乜意見。

    回覆刪除
  3. 唔該晒你呀~
    Vy great Bolg~Informative!!

    回覆刪除

發佈留言