Booking.com

今次跟 X 泰去咗個 8 日印度團,行程包括喀什米爾、德里、齋浦爾同愛加拉。

準備工夫 - 跟團茶實就冇乜嘢需要準備,都係交團費出簽証唱錢。如果經旅行社出簽証通常收 HK$ 470,自己親身到金鐘統一中心辦簽証的話會便宜啲 - HK$ 315。


自己辦簽証的話可以去 印度領事館 個網站下載同填好張申請表,帶埋身份証同護照影印本,加兩張証件相,辦工時間一早去統一中心交表交錢,通常當日下午5 點就可以出到護照,不過間領事館同印度國內一樣,啲職員係好唔鍾意找錢嘅,所以記得要帶散紙去交錢。

印度嘅通行貨幣主要係盧比 (rs) 同美金,去印度通常會響香港唱定美金,盧比就去到當地用美金換,跟團的話要盡量唱多啲一蚊美金,主要用來比小費同去洗手間嘅費用,我呢個旅程八日差不多用咗二十張一蚊美鈔。旅行社會建議客人帶 US$ 500 過去用,如果你唔多買嘢的話其實唱 US$ 50 嘅盧比通常都用唔晒,其餘嘅美金主要係以備萬一生病肚痾要睇醫生嘅不時之需。響印度通常 rs 1,000 樓下的小額交易會用盧比,大額啲嘅交易多數可以收美金,換太多盧比用唔晒之後唱番美金仲麻煩。

仲有一個情報係我地響最後一日行程同啲團友八番嚟嘅,我同行朋友叫我記得響道提一提;印度依加都仲興以物易物,如果響深圳買落啲 A 貨 B 貨放響屋企用唔着,特別係啲金色錶、金色鏈之類都可以試吓帶過去睇吓可唔可以換到啲當地特產如手工藝品、羊毛、綿質衣飾等。

今次亦手痕痕準備了衛星地圖以備不時之需。今次我用咗個由香港人開發嘅 freeware 叫 imap worldexplorer,行 Windows Mobile 手機,個 freeware 可以去 imapsys 個 website 下載。

 

呢個 freeware 比我上次響張家界用嘅 Terracrosser 多咗好幾個幾好用嘅功能如記錄地標,筆記功能等,響個陌生地方行街揾路特別適合。因為個 freeware 亦支援地標匯出功能,於是我將今次行程記錄的景點、酒店、餐廳等位置匯出咗幾個地標檔響呢道分享吓希望有人用得着。各地標檔可以響下面條 link 道下截:

   

如果你有 Windows Mobile 手機裝咗個 worldexplorer 之後匯入呢幾個地標檔便可在手機看到我記錄的地標。如果你手上冇 Windows Mobile 手機,你亦可用 notepad 打開個檔案,你會發現其實個檔案係個 xml file 嚟:



你可以響每段 Placemark tag 之間找到各地標的名稱同經緯度,響 google map 將個經緯度掉轉如上圖般輸入搜尋,亦可找到那些地標的位置。

當我去完旅行社個茶會攞咗張自費活動清單之後,發覺啲自費活動收費同景點質素都幾有問題,結果呢個衛星地圖同準備咗嘅一啲備用行程資料都有機會派上用場;其實近排響啲旅遊討論區都開始多人留意旅行團嘅自費活動質素,有關呢方面響今次行程我都做咗少少資料搜集同比較,將會響我寫完喀什米爾個行程之後分享一吓。