印度之旅 2009 - Get Ready

Blog in Progress
今次跟 X 泰去咗個 8 日印度團,行程包括喀什米爾、德里、齋浦爾同愛加拉。準備工夫 - 跟團茶實就冇乜嘢需要準備,都係交團費出簽証唱錢。如果經旅行社出簽証通常收 HK$ 470,自己親身到金鐘統一中心辦簽証的話會便宜啲 - HK$ 315。

自己辦簽証的話可以去 印度領事館 個網站下載同填好張申請表,帶埋身份証同護照影印本,加兩張証件相,辦工時間一早去統一中心交表交錢,通常當日下午5 點就可以出到護照,不過間領事館同印度國內一樣,啲職員係好唔鍾意找錢嘅,所以記得要帶散紙去交錢。

印度嘅通行貨幣主要係盧比 (rs) 同美金,去印度通常會響香港唱定美金,盧比就去到當地用美金換,跟團的話要盡量唱多啲一蚊美金,主要用來比小費同去洗手間嘅費用,我呢個旅程八日差不多用咗二十張一蚊美鈔。旅行社會建議客人帶 US$ 500 過去用,如果你唔多買嘢的話其實唱 US$ 50 嘅盧比通常都用唔晒,其餘嘅美金主要係以備萬一生病肚痾要睇醫生嘅不時之需。響印度通常 rs 1,000 樓下的小額交易會用盧比,大額啲嘅交易多數可以收美金,換太多盧比用唔晒之後唱番美金仲麻煩。

仲有一個情報係我地響最後一日行程同啲團友八番嚟嘅,我同行朋友叫我記得響道提一提;印度依加都仲興以物易物,如果響深圳買落啲 A 貨 B 貨放響屋企用唔着,特別係啲金色錶、金色鏈之類都可以試吓帶過去睇吓可唔可以換到啲當地特產如手工藝品、羊毛、綿質衣飾等。

今次亦手痕痕準備了衛星地圖以備不時之需。今次我用咗個由香港人開發嘅 freeware 叫 imap worldexplorer,行 Windows Mobile 手機,個 freeware 可以去 imapsys 個 website 下載。



呢個 freeware 比我上次響張家界用嘅 Terracrosser 多咗好幾個幾好用嘅功能如記錄地標,筆記功能等,響個陌生地方行街揾路特別適合。



你可以響每段 Placemark tag 之間找到各地標的名稱同經緯度,響 google map 將個經緯度掉轉如上圖般輸入搜尋,亦可找到那些地標的位置。

當我去完旅行社個茶會攞咗張自費活動清單之後,發覺啲自費活動收費同景點質素都幾有問題,結果呢個衛星地圖同準備咗嘅一啲備用行程資料都有機會派上用場;其實近排響啲旅遊討論區都開始多人留意旅行團嘅自費活動質素,有關呢方面響今次行程我都做咗少少資料搜集同比較,將會響我寫完喀什米爾個行程之後分享一吓。


留言

  1. 多謝你既分享呀!! 好詳盡呀!! :)

    如果自己攪簽證真係平好多喎,不過係咪多數順利呢?

    另外旅行社建議帶USD500,不過你覺得USD50就夠,差成10倍喎:-O,USD50為起得HKD400左右,係印度D野太平定冇咩野好買呢?

    回覆刪除
  2. 我今年十月嗰陣自己去攪的確係順順溜溜即日下午出簽証嘅。不過我響 discuss 道聽人話印度駐港辦事處依家將辦理簽証判咗俾一間代理做,手續費已經唔止 HK$315,家陣實收幾多我手上冇資料;同埋簽證唔可以即日攞;有人話個辦事處得番一個辦公窗,就算第二日去拎簽證都要排長龍。響上文有條 link 去印度駐港辦事處個網站,你可以響個網站道睇睇個公告,再考慮吓值唔值得攞假去自己攪。

    旅行社建議帶 US$500 主要係以防萬一團友唔好彩要響當地睇醫生入醫院嘅話要有現金旁身。

    當地買嘢主要係啲羊毛、綿質衣物,特別係圍巾,手織地氈,各種手織綉花衣飾布袋,銀器首飾等。我對呢啲嘢冇乜興趣,所以去嗰8日團唔計 HK$800 導遊費我個人使咗大約 US$50。

    當地產品有平有貴,三幾百盧比一個手飾盒又有,幾十蚊到百幾蚊美金一條圍巾又有,啲高檔少少嘅羊毛衣飾可以開價貴到我朋友講價講到盡都平唔過香港結果唔成交又得。如果鍾意呢啲產品嘅話去到使你二三百蚊美金買嘢絕對唔難~:D~。

    回覆刪除
  3. 如果要排長龍咁我寧願比旅行社攪,費事煩啦:-{(

    你去呢個旅行之前有冇打針呀?

    回覆刪除
  4. 今次去之前冇打針~:P~。我響第啲 blog 道見個去打過針嘅驢客寫,佢睇嗰位醫生話佢知如果跟團去印度嘅主要城市例如德里、愛加拉、齋浦爾等,係唔使打針嘅。不過去到飲食點都應該要小心啲,街邊熟食檔就千祈唔好試。去餐廳食飯可以的話我都會盡量叫熱開水飲;酒店以外地方要飲凍嘢只會飲鑵裝樽裝飲品。

    我出發前去網上啲 forum 揾料時發覺去印度中嚫蕉要入醫院吊鹽水嘅十個有八個都係飲咗加冰嘅飲品咄事~:-@~。所以去到當地餐廳叫嘢飲記得提侍應要走冰,唔係就分分鐘揾命搏~@-)~。

    回覆刪除

發佈留言