Booking.com

茶實我地臨上船出發去碼頭之前發生咗段小插曲。昨日黃昏我地自己叫 Shikara 響 Nehru Park 對面個碼頭上船落船嘅時候可能有船伕認得我地係跟團嘅遊客,而呢個消息到今朝傳到去接待我地個團嘅當地 Agent 道,到我今日臨上船離開達爾湖嘅時候接待我地團個當地 Agent 啊頭竟然截住我同我講話因為我昨日自己叫船出去玩要收番我錢。

聽到佢咁講我當堂 O 晒咀,實在估唔到原來響印度人眼中啲跟團嘅羊牯係可以咁劏法嘅!我當然冇理會到佢呢個咁離譜嘅要求,我扮唔識英文聽唔明佢講乜就咁甩身上船走人,上船之後都見到呢位 Agent 啊頭好似走咗去同我地香港個領隊斟,最後佢地係唔係傾呢件事又或者點擺平就不得而知了。

除咗呢單比較離譜嘅掠水事件外,其實個團好幾個自費活動我都覺得食水比較深。跟團嘅旅客如果出發前上一上網做少少功課,不但可以慳番唔少無謂嘅使費,更重要嘅係可以更好地利用難得嘅旅遊時間,去行更值得行嘅地方,睇更值得睇嘅風光。

茶實早幾年我跟團時響旅遊巴道聽領隊介紹完啲自費活動之後都係拾吓拾吓見其他團友參加就跟大隊參加;令我開始注意要睇清楚啲自費活動嘅內容主要係因為今次出發前響網上睇到一位跟完美XX去印度嘅網友所寫嘅 blog,該位網友響佢個 blog 道提到佢跟個團團費三千幾,但自費活動就收咗佢八百幾,自費活動等於個團費嘅廿幾 percent。同文中講到個領隊用個令我都幾反感嘅收錢方法,就係一次過同團友講呢程團有四五六七個自費活動,玩晒就收你咁多錢,不過唔會同你交代每個自費活動各自嘅收費,講完亦冇時間比你考慮就即刻走過嚟收錢,咁嘅情況之下團友們通常就會響羊群效應之下見第一個比錢就跟住比結果齊齊諗都唔諗就參加晒個團安排嘅自費活動。

其實當遊客報團之前通常都會比較唔同旅行社嘅口碑、個團嘅活動行程、機位、食、住等因素,旅行社要先通過公平競爭,有人報團先可以收到基本團費;但自費活動係等旅客交完團費落晒搭之後至報價嘅,因為旅行社可以不需要透過競爭便可以收取呢部份嘅費用,所以旅行社便會有很大誘因安排一些物非所值嘅自費活動,只要團友肯參加,旅行社便能從中獲得最大利潤。

就以今次我去呢個團為例,今次呢個印度團旅行社總共安排了以下嘅自費活動 (NB.: 水上菜市場並非旅行社安排嘅自費活動,旅行社收費一欄所載係當地 Agent 嘅報價):

景點
旅行社收費
(每位計)

自行安排預算
德里
吉祥天女納拉亞那廟
Lakshmi Narayan Temple
US$ 20
免費入場
Rickshaw 來回每部車約 rs200 (US$ 5)
齋浦爾
雲石印度廟
Birla Temple Jaipur
US$ 20
免費入場
Rickshaw 來回每部車約 rs200 (US$ 5)
喀什米爾
古爾瑪騎馬
US$ 15
08 年資料,3個人3隻馬加一個馬伕一小時收費 rs300 一位,之後加多一位馬伕再加 rs300,3個人總共使費 rs1200,平均每位約 US$ 10。
喀什米爾
Shikara 遊湖
US$ 20
08 年資料,Shikara 遊湖每隻艇使費約 rs300,兩個人坐一隻艇計平均每位 US$ 3.3
喀什米爾
參觀水上菜市場
US$ 40
(當時冇問清楚係計一位定計一隻艇)
rs600 包一隻艇,約 US$ 15

第一明顯呢啲自費活動嘅收費比自己去玩貴好多;錢自然係一個問題,但更重要嘅係值唔值得花費寶貴嘅行程時間去參加個別嘅自費活動。就以德里嘅行程為例,遊覽德里首選嘅應該係迦瑪清真寺、紅堡、胡默元王陵呢類嘅景點,但旅行社反而選擇帶團友去行吉祥天女納拉亞那廟。明顯旅行社係傾向安排一啲免費入場,位置就近市中心,唔使排隊,細細間行一陣就行完嘅廟宇作為自費活動嘅行程,務求以最短嘅行程時間,最方便嘅安排賺取該程自費活動嘅收費。

茶實現今互聯網資訊發達,好多人去完旅行之後都會將自己行程中嘅經歷、住過邊鼠、食過乜嘢、使咗幾錢一五一拾響自己個 blog 道又好又或者響各大討論區中寫得清清楚楚,要搜集相關資料依加已非難事;出發之前甚至報團之前花些少時間上網揾揾料,便很有機會令難得一次嘅旅程變得更加精釆。

最後都要公平少少補充番句,以上所講嘅只係針對呢個團個別嘅自費活動安排,其實呢個團整體質素如行程安排、酒店食宿、領隊經驗等100分我都可以比70分,亦算係過往我數次跟團經驗中較好嘅一次。不過我估如果以後我再有機會跟團去旅行的話,報團格價時我會試吓問旅行社攞埋張自費活動價目表 (呢份價目表今次係響去茶會嗰陣至派比我嘅),務求報團之前可以將團費、各項雜費、同所有自費活動嘅行程同費用一起考慮比較,先收足料然後至選擇最合我要求嘅旅行社。