Booking.com

未出發前搜集行程資料時一直搵唔到基督城市中心有超市,所以離開機場後第一站先去機場附近 Hornby 係 Chalmers Street 一間 Pak'nSave 買定第二朝早餐同晏晝嘅飲食。不過之後渣車去住宿處途中至發現,原來自己住嗰間 Hostel 附近有間 Countdown。番嚟香港後再上網搵,嗰間 Countdown 位置應該係 Madras Street 近 Moorhouse Ave。


在較大的地圖上查看新西蘭自駕遊 2014 - Christchurch

超市補給完之後,就出車往住宿處放低啲行理然後去行街街。上面個地圖記錄咗今次我哋係基督城到過嘅景點。



係市中心搵位泊車見到市中心個景況,查實都有啲啲意外 ~ 實在估唔到個城市咁有《28日後》嘅 feel!雖然嚟之前已經知道個城市地震災後仲未完全恢復,雖然都知到步嗰日係星期日,雖然我哋出嚟行時已經 5 點幾好多舖頭都已經打晒烊,但話晒呢道都係全南島最大嘅城市,實在估唔到成個城市會靜到咁嘅地步。



講番少少歷史,基督城係 2010 年 9 月同 2011 年 2 月先後發生過兩次地震,特別係 2011 年嗰次,因為震央係正市中心同個震源較淺,對當地造成極大破壞。



出發之前搵料都有見唔少博客講嗰處嘅重建已經有一定進度好多地方都通行番。但以今次去到睇見嘅境況,個城市現時重建嘅進度並冇我最初想像中咁理想。睇現時市中心大教堂個狀況,我估真係要等多幾年至有希望佢會重開番。



其他景點好似回憶橋 Bridge of Remembrance,雖然表面睇並唔係話受到太大破壞,但都仲係俾啲圍欄圍住過唔到去。



去得到嘅景點如 Victoria Square,愛芬河咁,四圍真係搵個人影睇下都冇。



據網上資料愛芬河有程小艇遊應該已經恢復番有得玩。不過我哋到步個時間太晏啲船仔應該已經收晒工睇唔到佢哋開工時係乜狀況;但我估如果平日都好似我哋去嗰日咁靜,咁嘅氣氛下坐程艇仔遊船河相信都會幾冇癮。



教堂對出個廣場有坐石標,原本以為係地震後啲紀念活動砌出嚟嘅。但番香港上網睇番,原來坐石標係 2010 年時一次有 4,000 幾人參加,反對政府取締一個叫 Environment Canterbury Councillors 嘅抗議活動時砌出嚟。不過地震後亦有人因為其他原因再放啲石頭上去;例如 03 年中時就有個叫 Zane Reihana 嘅街頭藝人,發起叫啲行人將佢哋喜愛基督城嘅原因寫係舊石頭上面再放落個石標道。



最後行到去 Re:START Mall。呢個購物區係地震後嗰道市政府為咗盡快幫個城市恢復番啲生氣同帶旺番啲商業活動,於是諗到用貨櫃砌個 Mall 呢個快靚正嘅主意。啲貨櫃係由中國大陸運過去;網上見有啲人講話呢個 project 原本只係諗住臨時起個場俾人做住幾個月生意,但啲重建工程一路冇乜進展,時間奈咗呢個貨櫃場做做吓反而見有啲特色開始進化成一個旅遊景點。咁係網上見有人咁講特登過去行下,可惜當日去到都係成個場打晒烊,四周圍人形都冇隻。



另外亦發覺夜晚係基督城搵食都係件幾困難嘅事情。嗰日行完 Re:START Mall 諗住搵個地方坐低醫肚,但四周圍啲商舖唔係摺埋就係冇開,搵完一輪本來已經放棄諗住番旅舍自己煮,但又咁好彩最後行行吓撞到間華人開嘅餐館;似乎呢個世界最肯做肯崖嘅此終都係啲華人。紐西蘭夏天日照時間好長,食完餐飯成 9 點幾個天先開始入黑,趕得切天黑前搵番部車渣番旅舍。



以今次係基督城所見,我覺得除非你好有興趣睇睇嗰道災後個面貌,唔係的話以現時嗰邊個重建進度嚟睇,我覺得實在一兩年內都唔似太值得花時間嚟咁行一轉。如果一早知道基督城現時係咁嘅狀況嘅前題下俾我再計劃過今次個行程,我估好大機會我會選擇唔嚟呢道,起程落機同回程上機都係皇后鎮,從皇后鎮起程經 Wanaka、Tekapo、Oamaru、Dunedin、Catlins、Te Anau、Milford Sound,最後番到皇后鎮行一圈咁嚟計劃條路線,將啲時間花係皇后鎮周邊啲景點道應該會比咁樣行轉基督城嚟得化算。