Booking.com

大部份旅客去 Mount Cook 嘅活動都係玩健行睇風景。當地有好幾條健行路線,呢啲健行路線一般都唔係話太難行,大部份都適合男女老幼一家大細咁去玩嘅。

據小弟出發前搵嘅料所知,Mount Cook 嘅健行路線有兩個主要起點;一個係 Aoraki Mount Cook Village 近 Terrace Road 附近,由嗰個位置出發可以行例如 Kea Point Track 同 Hooker Valley Track 等嘅路線。Kea Point Track 唔難行,應該只係一條來回兩個鐘頭咁上下,同主要係睇山景嘅路徑;Hooker Valley Track 就多啲嘢玩,沿途會經過兩條吊橋同終點係個有少少冰川睇嘅湖景;今次去 Mount Cook 本來呢條 Hooker Valley Track 係我嘅首選,但可惜後來發覺行呢條 Track 來回起碼要六個鐘;今次行程實在安排唔到足夠時間行呢條 Track,但行 Kea Point Track 齋睇山景又好似寡咗啲,於是我就決定去另一個起點,Tasman Valley Road 搵路行。


在較大的地圖上查看紐西蘭南島自駕遊 2014 - Lake Tekapo

呢敞我哋揀咗係 Tasman Lake 附近幾條比較短嘅健行路線,行晒佢哋都係兩個零鐘就搞掂。呢度除咗山景外仲有個湖,間唔時會有啲冰川嘅冰會流到個湖道,如果好彩碰啱流咗舊大舊啲嘅冰落個湖道個情景都會幾壯觀,同話唔定可以係岸邊摸摸呢啲冰川嘅冰;因為呢條健行路線應該比 Kea Point Track 多啲嘢睇,同埋我哋又只夠時間行呢類比較短嘅路線,所以就決定行呢邊嘅 Track 嘞。

但要去 Tasman Lake 有個問題,就係要去嗰度嘅話,係一定要經過一條叫 Tasman Valley Road 嘅 Unsealed Road。係紐西蘭呢啲 Unsealed Road 通常係指一啲仲未用瀝青舖好,好多時只係用碎石舖過吓嘅山路。除咗呢條 Tasman Valley Road 外,查實遲啲會講到,去 Catlins 好多景點都有一少部份路段係要行呢啲 Unsealed Road。而個問題除咗話呢啲 Unsealed Road 渣車難渣啲司機要技術好啲之外,最大問題係有啲租車公司嘅租車保險合約係講明唔包係呢啲路段發生意外嘅保險嘅。



上面個圖係我係網上搵到 Avis 份租車合約嘅 T&C 道節錄出嚟嘅相關條款。可以睇到呢間租車公司份保險合約係講明唔包係 Tasman Valley Road 出事嘅意外保險嘅。咁啫話萬一唔好彩,部車係呢條路道炒咗,所有維修賠贘都要食自己



上面就節錄咗我哋今次租車幫襯嗰間 Europcar 網上佢哋個 FAQ 嘅相關內容;留意佢哋都有寫明邊幾條路唔包,入面冇講 Tasman Valley Road,但有講一條叫 Ball Hutt Road 嘅路,呢條路佢哋亦係唔包嘅。



再望望上面個地圖,Ball Hutt Road (Google Map 叫條路做 Ball Shelter Route,總之都係一條通去一個叫 Ball Shelter 或者叫 Ball Hut 嘅營地) 查實係一條連住 Tasman Valley Road 嘅小徑,進入條小徑個位置係直頭棟起咗個路牌,講明條路係唔適合渣車過去嘅;查實上網搵搵佢另外講話唔包嗰條 Skippers Canyon (係嗰條路渣車直頭係玩命 ),都有類似路牌提示啲司機唔好渣車入去呢條路段。而 Tasman Valley Road 就唔見類似咁嘅路牌提示嘞。



查實我都係 confirm 咗租車公司之後先注意到呢件事;因為 Europcar 保險個 terms 係寫明唔包 Ball Hutt Road 但冇寫 Tasman Valley Road,加上只係 Ball Hutt Road 有明確路牌提示啲司機唔可以渣車入去,所以我會比較放心咁推論我哋租車份保險合約係包埋行呢條 Tasman Valley Road 上嘅意外,可以照行呢條路去 Tasman Lake 玩;但如果俾我見到份租車合約係好似 Avis 個 terms 咁嚴,咁我就有可能會考慮真係唔行呢類 Unsealed Road 嘞;如果係咁考慮的話,咁今次健行我就有可能唔會去睇 Tasman Lake 而改去比較次選嘅 Kea Point Track;同之後去 Catlins 嗰幾個景點都有可能會去唔到,因為嗰道都會行經幾條類似嘅 Unsealed Road。

不過 Europcar 同好多租車公司嘅合約都有寫話只準係啲 Sealed Road 上面行呢啲保護條款,所以查實今次旅程我選擇照去呢啲會經過啲 Unsealed Road 嘅路段都唔係話完全零風險嘅。如果部車真係係呢啲路上面出咗事保險公司到低會唔會賠,好慶幸我係冇相關嘅實際經驗同大家分享嘅今次 。不過事後上網再搵真啲,查實當地係有啲租車公司有再比較寬鬆嘅保險合約;例如下面呢間 Rental Car Village 咁,佢哋個 terms 係寫準啲客行所有 public sealed and unsealed road 嘅。



通過今次經驗至發現,下次要選擇租車公司時,除咗價錢同口碑外,呢個有關路線保險嘅問題原來都係一個幾重要嘅考慮因素。

水蛇春咁講完一大輪保險,番嚟講番個行程。我哋係 Peter's Lookout 影咗陣相,跟住出車繼續向 Mount Cook 進發,途中會經過幾條單線雙程行車嘅小橋,再慢駛行完嗰段 Tasman Valley Road 石仔路,係個停車場泊低架車,嗰道就係 Tasman Lake 幾條健行路線嘅起點。



由呢個起點開始行,第一個分岔點分兩條路,一條上山路去 Tasman Glacier View,個位可以由高處望番落 Tasman Lake 個湖道。



我哋就先行另一條路落咗個湖道睇景先。途中再有個分岔位,去 Tasman Lake Jetty 睇個防波堤個位查實冇乜特別,主要係去 Tasman River 睇嗰邊個湖景。



呢邊去湖邊嘅山路查實唔難行;部份路段係呢類算係幾平坦嘅山路。



部份路段碎石叫做多少少,但我估就算係老人家行應該都係 easy 汁



Tasman Lake 個湖景特別嘅地方就係嗰個位有時會有啲冰川溶落嚟嘅冰會沖到去嗰個位置道。可惜今次去見到啲冰唔係話好大舊;我見有啲 blog post 出嚟嘅相,嗰啲冰係可以大過部雙層巴士,同沖到埋岸直頭可以爬上去玩嗰隻。不過因為啲冰沖落嚟陣時好多時都會夾集住沿途啲沙石,所以啲冰舊舊都係好似烏烏糟糟咁。



睇完番轉頭行番去起點,再向 Tasman Glacier View 行去山上,居高臨下睇番個湖景。



上山途中會經過呢個 Blue Lake。係 19 世紀陣時呢個 Blue Lake 啲水係真係藍色嘅,所以當時啲人先咁幫個湖改名,而個名就一路用到家陣。可惜因為 Tasman Glacier 呢個冰川近年一路收縮,地理環境關係縮細咗嘅冰川啲水冇辦法流到落呢個湖,依家個湖嘅水源主要係雨水嚟。因為水源唔同咗,個湖多咗啲綠色海藻生長,結果依加 Blue Lake 隻顏色就變咗做綠色嘞。



過咗 Blue Lake 要行一段都幾崎嶇嘅上山路,加上行呢段路時個天又落住雨,結果行呢段路時都要出動件雨褸。行到上山頂就可以轉個鳥瞰嘅角度去欣賞 Tasman Lake 嘅風景。



落番山行番去停車場,出車離開時都成 5 點幾,渣番架車出 Tekapo 途中個天又開始放晴,呢日啲天氣實在係變幻莫測。不過又幾好彩,行行吓俾我哋見到條雙彩虹



紐西蘭一日間啲天氣變化都真係幾大。個零鐘頭前仲係落緊雨,個零鐘後渣番去 Pukaki Lake 途中又變番萬里無雲咁。





沿住 Lake Pukaki 回程呢段路嘅景色真係靚到無話可說,紐西蘭嘅藍色牛奶湖實在係名不虛傳



駛離開 Pukaki Lake,番 Tekapo 途中公路旁邊時不時會見到好多地方長滿晒大片嘅魯冰花。



就咁一路行吓又停吓影吓相咁,約莫 7 點零鐘,我哋就番到今晚係 Tekapo 住間旅舍。