Booking.com

今早係我哋整個行程唯一一日冇係旅舍整早餐嘅一個朝早。一來係 Dunedin 住呢間旅舍個厨房的確係嘛嘛大伙兒都唔多想再係嗰道煮食,二來都想今朝早少少出車,希望去 Te Anau 之前可以係 Catlins 踩多一兩個景點。一早先去麥記食咗個快嘅,跟住就開車向 Catlins 進發。

係南島有段叫 Southern Scenic Route 嘅觀景路線,路程由 Dunedin 開始,經 Catlins、Invercargill、Te Anau 到 Queenstown。呢段觀景路線中有好幾個主要景點都係 Catlins 道。查實呢一日程路嘅目的地係 Te Anau,出發前已經預訂咗呢晚參觀螢火蟲洞嘅門票;預算好由 Catlins 去到 Te Anau 嘅行車時間後,呢日晏晝兩點前都可以係 Catlins 玩,玩到夠鐘就出車去 Te Anau;基於呢個預算下就一路行一路就住啲時間,睇睇呢半日可以行到幾多個景點。


在較大的地圖上查看紐西蘭南島自駕遊 2014 - Catlins

呢次行 Catlins 嘅第一站係一個叫 Cathedral Caves 嘅山洞;呢個山洞係 Catlins 沿岸其中一個熱門嘅旅遊景點嚟。上面個地圖就記低咗呢個 Cathedral Caves 嘅位置。

同之前去 Moeraki Boulders 一樣,紐西蘭好幾個沿岸景點去之前都要先對一對當地嘅潮汐表;係呢個 Cathedral Caves 嘅專屬網站入面就有個當地全年嘅潮汐表可以睇到每日個退潮時間。預算行程時就要睇住呢個表道列出嗰個退潮時間,盡可能係呢個退潮時間前後兩小時內落去山洞個沙灘道行。

之前係呢篇遊記道都有提過係紐西蘭租車有關行啲 Unsealed Road 嘅保險問題。去到 Cathedral Caves 附近一條叫 Pratt Road 嘅道路,由呢條路上到 Cathedral Caves 個位置之前要先經過一段幾分鐘車程嘅 Unsealed Road;過咗呢段 Unsealed Road 就會去到一個停車場。



我哋係呢個停車場道先泊低架車;停車場有個通往 Cathedral Caves 個沙灘嘅閘門。我嚟之前都唔知道原來去呢個 Cathedral Caves 係要收入場費嘅。停車場進入 Cathedral Caves 個閘門前面有工作人員賣飛,不過我估佢哋除咗賣飛之外,應該都會睇住啲遊客提醒佢哋過咗退潮時間或者天氣唔好陣時唔好落去個沙灘道嘅

我哋每位俾咗 5 蚊紐幣買飛入場。我哋從但尼丁食完個早餐後大約 8 點半出車,途中花咗約莫半個鐘去咗間超市借洗手間用順便行吓買咗啲物資,到朝早 11 點先渣車到達 Cathedral Caves。以當日潮退時間 9 點 9 計,問番個工作人員得知落沙灘個閘門就會係 12 點半關閘。有興趣去呢個景點嘅朋友就可以參考以上啲資料嚟預算吓過去啲時間嘞。



入咗個閘門之後要先行一段咁樣嘅山路。以我哋個腳程由呢段山路行到去個沙灘都要成 20 分鐘。



出到個沙灘就可以見到不遠處個山洞嘞。



雖然已經盡早出門起行,但去到陣時已經過咗退潮時間成個幾鐘,行過個沙灘時都有啲路段要澗一澗水先過到去。去紐西蘭行啲海邊景點經常都會碰到啲咁嘅情況,所以去嗰邊旅行最好都係著啲防水嘅爬山鞋穩陣啲



呢個 Cathedral Caves 查實係 Catlins 海邊一列經過海蝕形成嘅山洞,其中有兩個主要嘅山洞入面有通道彼此相連。我哋就從其中一個山洞入口行入去。

 

山洞高度大約 30 米,個山洞以 Cathedral 命名嘅原因,就係因為啲人覺得由個山洞向上望,就好似睇見啲大教堂雄偉嘅天花建築咁。



山洞入面都幾漆黑一片,好彩今次嚟到有隨身帶定支外閃。



山洞入面有通道通往另一邊山洞嘅出口。



行完 Cathedral Caves,跟住出車去呢次 係 Catlins 行程嘅第二站,Purakaunui Fall。上面個地圖亦記低咗呢個瀑布嘅位置係邊。係 Purakaunui Falls Road 個瀑布入口處有個停車場可以泊低架車,瀑布入口處見到呢個指示牌就可以行入去。



去到瀑布個位置之前要先行一段十零分鐘咁樣嘅山路。



過咗條橋仔冇幾遠就會見到呢個瀑布。



呢個瀑布係坐落係 Purakaunui River 上面一個三層結構嘅瀑布,亦係 Catlins 一個標誌性嘅景點嚟;我去到皇后鎮時都見到唔少明信片同街邊擺賣嘅攝影作品都以呢個景點作為背景。



係瀑布前面有個觀景台可以安全舒適咁企係嗰道欣賞瀑布嘅景色;如果唔怕濕腳嘅話,你亦可以由個觀景台走落去瀑布最下面嗰層道同個瀑布嚟個近距離接觸



Purakaunui Falls 入口處有洗手間同自來水,係一個唔錯嘅野餐地點嚟。係 Catlins 大部份行程路線都係荒山野嶺,所以起行前已經買定晒嘢食準備係呢道搞掂晏晝嗰餐。食完個午飯已經差唔多晏晝兩點,見已經唔夠時間再去其他景點,於是決定出車直踩去 Te Anau。

原本係預好晒時間,諗住去到 Te Anau 先係旅舍放低啲行理,晚餐食個快嘅之後趕去參加一個之前預訂好,夜晚 8:15 出發嘅螢火蟲洞之旅嘅行程。可惜人算不如天算,去到 Te Anau 竟然落大雨,旅舍主人話我哋知個螢火蟲洞因為大雨有設施倒塌,呢晚嘅行程已經取消咗

 

失望之餘,我哋都打咗個電話去 Real Journeys 道確認嗰晚個行程真係取消咗,同為免日後爭拗,都叫佢哋出番個電郵俾我確認行程取消同佢哋會退番飛錢過我。Real Journeys 嗰邊啲效率又確係唔錯,唔洗幾分鐘我已經收到確認行程取消同退款嘅電郵。出面橫風橫雨除咗煮飯之外實在冇乜其他嘢好做。去咗附近一間 Freshchoice 超市買餸番旅舍煮飯,呢晚結果被迫可以早早休息。不過嗰晚睇天氣預報話場大雨會延續到第二日,同當晚 8 點通往 Milford Sound 嗰段公路已經封咗,第二朝幾時開番亦係未知之數。嗰晚查實都幾擔心第二朝去唔去得成 Milford Sound;因為如果連 Milford Sound 都因為封路去唔成,呢程去 Te Anau 嘅行程就會變成白行一敞,白白浪費咗兩日寶貴嘅行程時間