Booking.com

呢個旅程總共住過六間旅舍,係 Dunedin 入住呢間 Stafford Gables 係唯一一間俾我有中晒伏咁嘅感覺嘅一間旅舍。同幾可惜嘅係經營呢間旅舍嘅偏偏係一個識講廣東話同聲同氣嘅華人嚟。



搵 BBH 住嚟講,BBH 網站入面個 BPP Rating 係一個幾值得參考吓嘅指標嚟。通常 BPP Rating 有 80% 以上嘅旅舍咄事嘅機會應該會比較細。都怪我哋太遲預訂 Dunedin 嘅住宿,到我哋的得起心肝搞呢道嘅住宿時啲高 BPP Rating 嘅選擇已經 fully booked 晒。呢間 Stafford Gables 當時睇 BBH 網站講話係間新店嚟所以未有 BPP Rating;原本諗住新店啲設施裝修應該會新淨啲於是決定試一試呢間,結果就係咁一試就咄事



我哋嚟咗紐西蘭幾日,Dunedin 呢道係第一晚我哋比較認真咁煮一餐晚飯嘅地方,好不幸地煮呢餐晚飯用嘅就係全程最唔掂嘅一個厨房。首先個厨房差唔多每件用具摸上手都係油冧冧嘅;我唔係講緊係洗碗盤未有人清理嗰啲用具;係連整整齊齊放係個厨櫃入面啲用具都一樣係件件都油冧冧冇洗乾淨就俾人擺番上個厨櫃道。除咗我哋啲同屋冇手尾用完啲嘢唔洗番乾淨之外,我幾相信夜晚間旅舍清理個厨房嘅工作本身都係好馬虎吓。

另外呢個厨房煮食用啲砂煲甖罉亦係幾得人驚吓,差唔多件件用具都一撻撻污漬又燒到燶晒咁 ,想搵件可以清理番拎嚟用嘅都唔係咁容易。



呢間旅舍嘅洗手間同浴室雖然未至於係話好污糟嗰隻,但可能啲設備裝修都比較殘舊,用起上嚟亦係好唔自在。浴室熱水夠熱亦算充足,但個企缸去水極慢,沖完個涼成個企缸就浸滿晒水。



我去到紐西蘭先注意到,選擇旅舍原來樓高都係一個要考慮到嘅問題。香港絕大部份嘅大厦都有升降機;太習慣上樓落樓都有電梯搭,所以完全冇諗過係紐西蘭如果入住一橦多層大宅嘅話,係要用人手將啲行理搬上樓嘅呢個問題。呢間旅舍樓高三層,而我哋住嗰間房係正三樓;因為只係係道住一晚,所以大伙兒決定費事將啲行理搬上搬落咁麻煩,就咁將啲大件行理寄放係地下樓層道。但查實啲行理唔跟身一來冇咁方便,二來都有少少擔心會俾人撻嘢。所以係紐西蘭選擇旅舍,點搬件行理入屋呢個問題查實都需要注意吓;如果其他條件都差唔多,單層樓層嘅旅舍會係比較好嘅選擇。



選擇旅舍我覺得另一個要注意嘅就係佢哋張地毯嘞。呢間旅舍另一個咄事嘅地方就係佢哋整棟建築,由客房走廊到梯間飯廳,大部份嘅地方都係舖晒地毯嘅。打理咁大面積嘅地毯查實唔係一件易事皮費相信亦唔平,所以如果見到間平價旅舍又學人搞埋啲咁嘅裝修就最好提防吓嘞。



呢間旅舍啲地毯,特別係佢哋厨房隔離飯廳舖嗰啲位,個地下就強烈地俾人一種邋邋遢遢霉霉耷耷咁嘅感覺,係個咁嘅空間坐低食飯實在係幾唔自在。



除咗上面講清潔衛生嘅問題外,呢間旅舍啲管理亦相當唔掂,我什至覺得佢哋做生意有啲唔係幾老實添。首先我哋訂房時係確認訂咗兩間 twin bedroom 雙人房嘅,但我哋到步時櫃位嗰位老細竟然同我哋講冇晒雙人房屈我哋原價改住一間四人房間



因為只係住一晚,亦唔想浪廢寶貴嘅旅行時間同佢哋爭拗,結果無奈地接受咗個咁嘅安排。我哋到步時係以現金支付房租嘅,但到我番到香港時發覺佢哋竟然用 BBH 個 billing system 經信用卡再收多我一次房租。Send email 過去炳咗佢哋一鑊先覆番我個電郵沙冧話唔小心搞錯咗退番錢俾我;但我實在無法排除佢哋想搏大霧收多次錢呢個可能性。

總結呢間 BBH 無論衛生同管理各方面都相當唔掂,完全唔建議去 Dunedin 玩嘅朋友入住呢間旅舍。