Booking.com

到達 Oamaru 呢日係 12 月 31 日除夕,第二日 1 月 1 號係紐西蘭嘅法定公眾假期,呢日假期係紐西蘭係連超市都會關門大吉唔做生意嘅;為免呢個假期日去到 Dunedin 時搵唔到食,所以到步 Oamaru 後第一件事先去超市入貨,買定之後嗰日所需物資。

係 Oamaru 市中心 Severn Street 同 Wansbeck Street 交界有間 New World Supermarket,係嗰道入完貨再渣車番去 Thames Street;因為今晚預咗睇企鵝會玩到幾夜吓,於是係 Thames Street 搵咗間快餐食個快嘅為今晚行程打定個底先,之後番旅舍 check-in 同放低啲行理。



今日係 Oamaru 入住呢間旅舍舖號叫 Old Bones Backpacker Lodge,位置唔算太近市中心;由市中心沿住 Beach Road 向海邊方向行,注意右邊草地呢隻大鳥模型,見到佢就右轉入條小路,間旅舍就係條小路旁邊。


在較大的地圖上查看紐西蘭南島自駕遊 2014 - Oamaru

旅舍門外有個用碎石舖嘅泊車位,架車唔使泊係路邊。



同其他係今次旅程中住過嘅旅舍比較,呢間旅舍嘅質素算係中上,整體地方乾淨企理,住得舒適。

間旅舍嘅共用空間係一個設有開放式厨房嘅大廳;之後嗰朝早用過呢個厨房煮早餐,厨房設備齊全啲用具都幾乾淨;大廳嘅木製建築亦好新淨;從大廳前面一排落地玻璃門望出去就係南太平洋。



大廳兩邊係客房;房間嘅被舖床單亦係清潔新淨。



呢間旅舍冇 Ensuite Room,大廳出面玄關兩邊,男女各有一個共用洗手間連浴室;洗手間啲設備亦係光潔新淨,用得舒適。

 

寫呢篇 blog 時呢間旅舍嘅 BPP Rating 有 88%,網上亦有唔少對呢間旅舍嘅好評;住過呢道一晚小弟亦覺得呢道嘅住宿環境確實唔錯,值得推介。