Booking.com

係香港住嘅我哋,平時接觸到海洋生態嘅機會,不外乎係去吓海洋公園睇吓嗰道啲受過晒訓練嘅海獅,又或者去睇吓啲住係水族館入面嘅動物。難得嚟到紐西蘭一趟,當然希望搵多啲機會睇吓當地嘅自然生態。今日晏晝係咁兒行過吓 Dunedin 市區,跟住我哋就出車踩去 Otago Peninsula,第一站先去 Sandfly Bay 睇睇。

講開又講,紐西蘭嘅 Sandfly 查實係一種幾討厭嘅昆蟲嚟,同蚊一樣啲 Sandfly 係會針人吸血嘅。南島係 Milford Sound 個碼頭係紐西蘭其中一個出名多 Sandfly 嘅地方。不過今次我哋去呢個 Sandfly Bay 查實係冇 Sandfly 嘅;啲人改個沙灘做呢個名係因為嗰道有啲好高吓嘅沙丘,一大風啲沙就係個沙灘道四圍飛,於是嗰道就俾人改咗個咁嘅名嘞。

我哋由市區出發去奧搭哥半島陣時都落緊幾大雨;正正因為去 Sandfly Bay 必需要行過啲幾高幾難行吓嘅沙丘,所以起行時都有啲擔心係咁嘅天氣下過去玩有冇問題


在較大的地圖上查看紐西蘭南島自駕遊 2014 - Dunedin

上面個地圖就記低咗呢個 Sandfly Bay 嘅位置。去到 Seal Point Road 盡頭有個停車場可以泊低架車,落車後好容易就可以搵到呢個路牌。同之前講啲景點一樣,又係打開個閘門仔自己行入去就可以。



我哋剛剛行入個閘門冇幾奈,就碰到一家回程嘅西方遊客;佢哋唔知係咪擔心我哋怕條路難行唔敢行落去,一見到我哋就好興奮咁同我哋數佢哋頭先見過幾多隻海獅行得有幾近行呢轉路幾值回票價咁;既然先頭部隊都講到話咁掂,燒賣就燒賣落去睇過係乜環境先



入咗個閘門之後先嚟一段比較易行嘅山路。



行完呢段山路,就進入嗰段沙丘地帶。



要去到海邊,就要先行過一大片咁嘅斜度嘅沙丘。呢段路雖然未至於話係好危險嗰隻,但要行過去查實都要有一定體力,特別係回程行番上去陣時,基本上係好似用腳踢開啲沙自製一級級樓梯咁踩番上去。



望番轉頭呢段沙丘路個斜度就係咁嘅樣咖嘞。



行咗十零分鐘,終於去到海邊嘅沙灘嘞。



呢日嘅運氣唔錯,一隻海獅已經係個沙灘道擺好晒甫士等我哋



查實經過呢一日接觸過啲海獅,覺得佢哋係紐西蘭查實都見慣世面已經唔係太抗拒人類。



不過呢啲此終係野生動物嚟,同佢哋玩點都係小心為上唔好行得太近。



係網上有啲人會教路話唔好企係佢哋同個海之間,但去到 Sandfly Bay 睇啲介紹牌就話企係佢哋同個海之間查實係冇問題嘅,最重要此終都係要安靜同唔好行得太近。



嗰日我哋係個沙灘道大約就係咁嘅距離同佢哋接觸咖嘞。



除咗海鷗外,嗰道時不時會見到幾隻 Oystercatcher 係個沙灘道搵食。

Sandfly Bay 係個幾長嘅沙灘;由個沙丘落到去沙灘嗰個位,向東面一路行,要行差唔多半個鐘先行到去沙灘另一邊盡頭嘅一個石灘道,係嗰道就見到幾隻,我估應係當地人叫 Kekeno 嘅毛皮海獅 (Fur Seal)。



首先係沙丘見到一隻瞓到好似隻海豬咁嘅



個石灘道就有兩隻比較活躍少少嘅。



行過去陣時已經見嗰兩隻海獅係個石灘道走嚟走去,佢哋係個石灘上活動嘅速度比我想像中快好多。



係平地我估我會跑得快過佢哋,但如果係石灘上面我估我應該唔夠佢哋走得快,所以影佢哋陣時都唔敢行得太入個石灘道。



回程番到沙丘個位又見番之前嗰隻海獅,又係瞓到隻海豬咁嘅樣



由個沙丘道行番上停車嗰個位的確係唔少嘢行到扯晒蝦,番到上車成對鞋都係沙。都花咗唔少時間先清理好對鞋入面啲沙,之後就開車出發去奧塔哥半島呢段旅程嘅下一站 ~ Pilot Beach。