Booking.com

根據小弟出發前嘅調查所知,係 Oamaru 睇企鵝有兩個熱點,一個係 Bushy Beach Road,呢道主要睇黃眼企鵝;另一個係 Waterfront Road,呢道就主要睇藍企鵝。下面個地圖就記低咗呢兩個熱點嘅位置。


在較大的地圖上查看紐西蘭南島自駕遊 2014 - Oamaru

因為黃眼企鵝嘅習性係日頭出海搵食,到旁晚六點咁上下就番上岸歸巢休息,所以我哋今日第一場企鵝騷先去 Bushy Beach Road 碰碰運氣。



渣車去到 Bushy Beach Road 嘅盡頭,就咁係路邊泊低架車;



向住海邊方向好容易就可以搵到呢個路牌,行入去路牌旁邊個閘門就係睇黃眼企鵝嘅地點。



啲遊客就係呢個位置望落去下面個沙灘道睇啲企鵝上岸歸巢咖嘞;因為保育嘅原因,每日晏晝 4 點打後係唔俾啲人行落去個沙灘道,以免嚇嚫啲番歸嘅企鵝;所以圍欄呢道已經係最近可以望到晏晝歸巢啲企鵝嘅位置。不過呢個位置離開個沙灘查實都幾遠,要睇得清楚最好都係帶定支望遠鏡,要影得清楚就盡可能用長啲嘅鏡頭嘞。



今次我哋都算幾好彩,一嚟到已經聽到在場啲遊客一陣騷動嘅聲音 ;立刻走到人堆入面往下望,就見到隻黃眼企鵝係個沙灘道。佢一時就係沙灘道行嚟行去,一時就落水游吓好似又想去搵番啲同伴但又唔想出海咁。我哋係嗰個位捕咗個零鐘咁上下,遠嘅近嘅大約見過兩三隻黃眼企鵝係嗰個沙灘道上岸。捕到 7 點零鐘,我哋就離場出車去睇下一場企鵝騷嘞。

Loading...


藍企鵝又名神仙企鵝,係全球體型最細嘅企鵝嚟。藍企鵝嘅習性係日頭出海搵食,到天剛剛入黑時至番上岸歸巢休息;初夏時節係藍企鵝嘅繁殖高峰期,所以我哋嚟到呢段時間係當地藍企鵝最多嘅其中一段時間;因為唔同季節當地藍企鵝嘅數量同日落嘅時間差別都幾大,所以去 Oamaru 睇藍企鵝之前最好先去呢個網站,下載下面呢個圖表睇睇事先計劃一吓。因為你去陣時啲藍企鵝嘅數量如果唔多,去到見到佢哋嘅機會就會相對地細啲;同如果諗住去睇亦要由個圖表對照番啲企鵝大約幾點鐘上岸,就啱時間到場。



係 Waterfront Road 有兩個途徑可以睇到啲藍企鵝嘅;一個係俾錢參加呢個由 Oamaru Blue Penguin Colony 主辦嘅 Evening tour,入場費由紐幣 28 到 40 大元不等。入場睇嘅好處係可以舒舒服服咁坐係個大看台上面,睇到最多成二百幾隻藍企鵝歸巢嘅盛況。不過要留意入去個看台睇企鵝陣時係嚴禁攝影嘅,啫話俾錢入場嘅話係只可以齋睇,冇得影相留念



而我哋今次就選擇咗另一個比較慳家嘅途徑睇藍企鵝嘞。Oamaru Blue Penguin Colony 同我哋一陣睇企鵝嗰道都係近住 Waterfront Road 盡頭嘅位置。我哋渣車去到 Waterfront Road,首先搵個離開一陣睇企鵝嗰道比較遠嘅位置泊低架車,因為驚一陣入黑睇唔清楚條路走陣時一個唔覺意車嚫啲企鵝就唔係幾好。去到查實仲有一排先到企鵝仔出場嘅時間,可以先落車四圍行一陣觀察一吓嗰道啲環境。



行咗冇幾奈就見到海邊一個封咗過唔到去嘅碼頭聚居咗一大群鸕鶿



係 Oamaru 睇藍企鵝,除咗參加 Oamaru Blue Penguin Colony 嘅 tour 外,查實有少部份藍企鵝會係 Waterfront Road 嘅呢個位置上岸。我哋去嗰日睇見啲藍企鵝就係由紅色箭嘴嗰個位置上岸,沿住條欄杆下面個位行去 Waterfront Road 道過馬路番屋企咖嘞。



係呢個位睇企鵝嘅好處首先當然係唔使俾錢都有得睇喇,另外係呢道睇企鵝可以偷吓雞影吓相;不過影還影,要記住千萬、一定、絕對唔可以開閃光燈影

睇番呢條 2010 年陣時嘅 youtube 片段。當時啲遊客見到啲企鵝係條街出現就係咁用閃光燈追住啲企鵝仔嚟射 。可能見啲遊客真係幾失控吓,我哋去嗰日已經見到有啲當地嘅保育人員出嚟維持秩序欄住啲遊客唔俾我哋行得太近啲企鵝。



啲企鵝仔上岸後就會沿住紅色箭嘴示意嘅呢條路線過馬路,我估佢哋應該就係馬路對面個荒廢咗嘅貨倉道築巢。

睇完附近啲環境,我哋就入去 Oamaru Blue Penguin Colony 道坐咗陣休息吓,到 9 點咁上吓,就出番去捕企鵝嗰個位置坐底等運到。等到 9 點半咁上下,終於聽到啲企鵝傳嚟嘅叫聲。



幾隻藍企鵝先由呢個位置上岸



可能佢哋對面都集中咗幾大班包括我哋呢班睇企鵝嘅人群,見佢哋一上岸就驚驚青青咁哩埋係個欄杆下面



佢哋一時就整理吓啲羽毛,一時就好似未齊腳等緊啲同伴咁。



搞咗一大輪,終於都儲夠勇氣起步番屋企喇



行到出馬路邊又停低左望右望。



好似班小學雞 ~ 呀唔係 ~ 小學鵝先啱,唔識過馬路企咗係路邊唔知典算添



係馬路邊又係整理吓啲羽毛左望望右望望搞完一輪,再一次儲夠勇氣,一鼓作氣衝過馬路走過去對面貨倉嗰邊,終於番到屋企覺覺豬喇



呢幾隻企鵝去到馬路邊時個天查實已經黑齊,但佢哋番歸後好多睇企鵝嘅人群都仲係意猶未盡,又再行番去佢哋頭先上岸嗰個位等 encore。但我哋幾個今日踩到呢個鐘數實在已經夠晒皮,冇跟大隊埋位等睇第二場騷,決定打道回府出車番旅舍休息。