Booking.com

今日想晏少少先去奧塔哥半島,希望夠運嘅話可以碰到啲比較早番歸嘅黃眼企鵝;所以去奧塔哥半島之前有少少時間,可以係 Dunedin 市區嚟個快嘅 city tour。而呢個 city tour 嘅第一站,先去呢條全球最斜大街 ~ Baldwin Street。


在較大的地圖上查看紐西蘭南島自駕遊 2014 - Dunedin

鮑德溫街係但尼丁一條獲健力士世界紀錄大全認證為全球最陡大街嘅街道。上面個地圖就記低咗呢條街個位置係邊嘞。



呢條街總長度大約係 350 公尺。街道由 Lindsay Creek 嘅山谷開始,向東沿住 Signal Hill 而上。

街道斜度最低嘅 200 公尺段嘅坡度比較普通,用瀝青舖都仲頂得住。而呢條路較高嘅一段,如果用瀝青舖嘅話,係呢種坡度啲瀝青就會向下流,所以舖呢段路面就要用混凝土嘞。呢條街道開端嘅海拔大約係 30 公尺,而街道終端嘅海拔就有 100 公尺。街道係以奧塔哥議員同新聞紙創辦人威廉•鮑德溫命名嘅。

話說係但尼丁,以至整個紐西蘭,好多街道嘅規劃都係統一咁以格仔狀咁嚟佈置,而唔考慮到實際嘅地形。因為當年呢條街道嘅規劃係由老遠倫敦嗰邊啲負責人搞,結果呢條鮑德溫街就咁俾人劃到家陣斜一斜咁嘅樣嘞。
在全球最斜大街上飛

呢條街每年有兩個大型活動;首先每年夏天 (通常係 2 月),有個叫(Baldwin Street Gutbuster)嘅競跑比賽;另外呢道每年 7 月有個鬥快碌啲 Jaffas 朱古力落條街道嘅競賽。

 

如果係正咁上下時間過開去玩,計劃行程時就可以試吓就唔就到個時間過去趁吓熱鬧嘞。



行完 Baldwin Street 跟住出車去下一站,但尼丁火車站。



呢個但尼丁火車站已經係 1873 至 1906 年,超過一個世紀前嘅建築,亦係紐西蘭最後興建嘅 3 座火車站嘅其中之一;佢曾經係紐西蘭最大最繁忙嘅火車站嚟。

但自從民航飛機同汽車嘅普及,家陣紐西蘭啲人長途嘅交通就坐飛機,短途嘅就渣車,搭火車嘅人就變得越嚟越少嘞。目前除咗泰伊里峽谷景觀列車(Taieri Gorge Railway)之外,呢道已經冇無固定嘅火車班次。

呢個車站內部設計採用溫暖嘅鵝黃色調,陽光可以從正中央嘅圓拱頂照落下面。

當年呢棟咁壯觀嘅建築係由鐵路部首席工程師特魯普(George Troup)設計,採用法蘭德斯文藝復興形式,半圓拱頂、對稱門窗、半圓形窗等,都係呢座建築嘅特式嚟。

車站地板上面可以睇見啲精細嘅馬賽克鑲嵌,正中央係紐西蘭鐵路嘅標誌。



呢個火車站嘅裝飾有好多小細節都幾值得細細品味。除咗參觀個火車站本身嘅建築之外,車站二樓仲有個藝廊可以入去睇睇。

 

樓梯欄杆上面亦有好多繁複嘅裝飾;二樓兩側嘅彩繪玻璃窗,亦係另一個參觀嘅重點嚟。



家陣從但尼丁火車站出發嘅觀光列車,每日早上 9:30 出發,沿住河谷開向當年採礦區,到終點站 Middle-March 回程,大約係下午 15:00 左右番到但尼丁。你亦可以選擇先搭程觀光列車,係終點站再接駁 Track & Trail 巴士到皇后鎮繼續觀光。



參觀完個火車站,亦差唔多係時候過去奧搭哥半島嘞。不過見出面場雨越落越大,而奧搭哥半島嗰邊無論人行同車行嘅路都唔容易走,當時都有啲擔心咁嘅天氣下之後嗰段行程行唔行得成