Booking.com

行完市集,我哋先過去 Mall Street 嗰邊行吓啲商店,之後行番過去 Nzone 間舖頭,一心諗住朋友起程之後再係附近行多陣,就出車去跳傘場地幫朋友影佢降落嘅一刻。

可惜去到 Nzone 先知朋友預約咗嗰程跳傘因為風大取消咗;估唔到呢日咁好天個活動都會因為天氣嘅原因取消



朋友去唔到跳傘結果我哋呢日就無端端多咗幾個鐘頭唔知點用好。結果我哋番咗旅舍休息咗一陣,之後就行過去 Skyline 嘅纜車站,坐纜車上去 Bob's Peak 睇吓風景嘞。



我哋去到 Skyline 係 Brecon Street 街尾嘅纜車站買飛。由呢個纜車站先坐一程纜車上到 Bob's Peak。


在較大的地圖上查看紐西蘭南島自駕遊 2014 - Queenstown

查實我哋原本係諗住呢一晚上到 Bob's Peak 食上面餐廳個自助晚餐,咁就可以留夜啲係山上睇埋皇后鎮個夜景至坐纜車落山嘅。不過我哋之前係 Mall Street 行咗入去間賣 Manuka 蜂蜜嘅店舖想話買啲手信,剛啱店舖個售貨員係個移咗民過去嘅香港人嚟;大家同聲同氣自然吹多兩咀



講到我哋一陣會去坐纜車上去 Bob's Peak 食晚飯同睇夜景,嗰位地膽售貨員就話 Skyline 個自助餐查實唔係咁好食;山上面睇皇后鎮個日景係靚,但夜景就冇乜睇頭;佢又推介咗間食海鮮嘅餐廳俾我哋



既然係同鄉地膽介紹,我哋一於跟佢建議改變計劃,去到 Skyline 只買咗 Gondola 同玩一程 Luge 嘅套票。



山上面有個跳 Bungy Jump 嘅跳台;我哋坐緊纜車上山陣時剛好見到有人係嗰道跳落嚟;不過上到山之後就一路都見唔到有其他人係嗰道笨豬跳了



落咗纜車之後我哋先四周圍行吓影吓相睇吓風景。



跟住就去坐呢隻咁樣嘅吊車上去玩 Luge ~ 下坡道滑車嘅起點。坐吊車之前要先係吊車站揀啱自己大細嘅頭盔帶好,先可以上車。



起點道有訓練員教啲初次玩 Luge 嘅人一啲例如轉左右加減速嘅基本操作技考。



當啲訓練員確認我哋揸得掂部車仔之後,就放我哋落去滑坡道俾我哋自己揸落去;係起點道有唔同難度嘅滑道俾我哋選擇。



落坡途中有位置裝咗自動攝影機幫我哋影相;玩完落到終點有個檔口仔,可以睇住屏幕揀番自己揸車張相買番家鄉留念



由 Bob's Peak 可以從鳥瞰嘅角度,睇到由皇后鎮、Lake Wakatipu 到 Remarkables Mountains 組成嘅湖光山色;加上天氣好藍天白雲,呢日係山頂睇到嘅景緻,實在係靚得無話可說



到差唔多晚飯時間我哋先坐纜車落番山。跟住之前係 Mall Street 嗰位地膽介紹,行番過去 Steamer Wharf 搵嗰間食海鮮嘅餐廳。



間餐廳都幾爆吓;侍應同我哋先留定張枱,不過都要成個鐘後先至有位;我哋一邊等位一邊係附近四圍行吓。晏晝係 Earnslaw Park 個市集雖然已經曲終人散,不過有位小鼓手仲未放工,係湖邊一邊自娛一邊賺吓零用錢



呢間地膽介紹嘅餐廳食物質素同侍應服務都相當不俗,價錢亦唔算太貴;我哋四個人食到飽飽落樓都係紐紙 $160 大元有找

 

我哋食完餐晚飯天亦已經入黑,四圍啲店舖好多亦已經打烊。我哋一邊行吓啲仲未收舖嘅商店,一邊散吓步慢慢行番去旅舍休息。