Booking.com

皇后鎮市中心地方查實唔係好大,呢日晏晝我哋係市內觀光全程都係步行冇揸車。


在較大的地圖上查看紐西蘭南島自駕遊 2014 - Queenstown

同行其中一位朋友想今日晏晝去玩 Skydive;我哋去到市中心先過去 Nzone 係 Shotover Street 間舖頭道預約報名。



我估對好多旅客嚟講,皇后鎮嘅 Fergburger 已經唔止係一間賣漢堡包嘅餐店,更加係皇后鎮一個非去不可嘅旅遊景點嚟。



要搵呢間餐廳嘅位置並唔難;行到去皇后鎮最旺嗰條 Shotover Street,向住最多人圍住嘅嗰間店舖行過去就可以。



In Ferg We Trust,實在非常喜歡店舖門前呢個咁搞嘢嘅招牌



呢間漢堡包餐廳自 2001 年開業,冇做過咩嘢特別嘅宣傳,只係靠口耳相傳嘅口碑;到家陣我係網上睇過嘅紐西蘭旅遊討論區同博客,但凡有講開飲食嘅都例必會提到佢;係書局打開是但一本紐西蘭旅遊指南都必定有篇幅介紹佢;我哋係皇后鎮買手信同個售貨員吹水,食晚飯同餐廳個侍應傾計,只要個話題一講到飲食,就必然會講起佢;連 CNN 都有整編報導寫過佢;可想而知呢間漢堡包餐廳嘅風頭有幾勁。



可能有啲人會有呢種感覺 ~ 係呢道嘅收銀櫃檯俾嘅查實唔係嚟買漢堡包嘅錢,而係嚟呢道潮聖嘅入場費。係香港買個漢堡包如果話你知俾完錢仲要等半個鐘先有得食,我估應該有唔少人會即刻爆粗界櫈反枱比武乜都出齊。但呢啲事情係 Fergburger 呢道係絕對唔會發生嘅;因為半個鐘都係剛剛好夠時間俾你影門口影招牌影店員影顧客擺甫士影自己影屋企人影朋友影 ……



人面咁大個漢堡包,厚厚嘅餡料,豐富嘅醬汁同肉汁,大眾化嘅價錢;一間細細嘅餐廳做到國際知名自然有佢嘅原因



一個漢堡包加一罐汽水已經飽到上心口;食完呢個咁有份量嘅午餐之後,亦係時候四周圍行吓幫助消化。皇后鎮嘅中心地帶主要係沿住 Lake Wakatipu,近住 Shotover Street,Beach Street 同 Mall Street 一帶嘅大街店舖。



我哋沿住 Shotover Street 向住湖邊嘅方向前行,街道兩旁都係各式精緻嘅店舖同食肆。



由 Shotover Street 街尾轉個彎行過去 Beach Street,望向右邊係 Earnslaw Park,Earnslaw Park 對出就係 Lake Wakatipu 嘅靚絕湖景嘞。



同 Lake Tekapo 一樣,Lake Wakatipu 嘅水源都係嚟自冰川,所以係呢道都可以欣賞到嗰隻藍色牛奶湖嘅靚靚湖景。



湖邊係 Beach Road 旁邊有個叫 Steamer Wharf 嘅碼頭,碼頭入面有幾間相當唔錯嘅餐廳同酒吧。另外呢道有程古董蒸氣遊船帶遊客去玩一個叫 Walter Peak Farm 嘅 Tour 都係響呢個碼頭道出發嘅。



沿住 Beach Street 行亦可以見到好多幾有特色嘅商店同食肆。不過今日呢道最吸引嘅並唔係呢啲特色店舖。我哋呢日專登行過嚟,主要目標查實係響 Earnslaw Park 舉辦嘅一個露天市集