Booking.com

我哋呢轉過嚟 Wanaka 只係夠時間走馬看花咁睇吓啲主要景點同食個快嘅午飯;Wanaka 嘅湖景係南島其中一個馳名嘅景點嚟;除咗遊湖逛商店,呢道亦有得玩各類水上活動同極限運動;夠時間嘅話係呢道留兩三日都唔會覺得悶。


在較大的地圖上查看紐西蘭南島自駕遊 2014 - Queenstown

嚟到 Wanaka 我哋先過去呢道嘅 Puzzling World 睇吓同影吓相。呢個 Puzzling World 係一個以古怪創意作為主題嘅主題公園嚟。



遊客可以試試一個鐘內走唔走得出入面一個有 1.5 公里長嘅大迷宮;有個 Ames Forced Perspective Room 可以玩魔戒式哈比人特技攝影;仲有各式幻象雕塑、傾斜房間、羅馬公廁等等嘅古怪玩意。就算唔想俾錢入場玩,都可以係佢門前呢幾座 Tumbling Tower 前面扮比薩斜塔影番幾張例景留念



行完 Puzzling World 我哋番過去停車場囉車陣時俾我哋見到呢部新束束嘅 Volkswagen Campervan。記得呢部古車我只係響睇粵語殘片時係電視機見過,真車印象中都係第一次見到



我哋跟住就揸部車過湖邊,諗住搵位泊低架車之後就去食晏行街街嘞。



我哋原本只係諗住過嚟 Wanaka 逗留一兩個鐘係咁兒打個白鴿轉就走人,所以都冇好詳細咁搜集有關呢道啲資料。



又幾好彩嚟到先發現原來今日呢道都有市集行



查實我都係番到香港先搵番有關呢個市集嘅資料。呢個 Wanaka Sunday Craft Market 係逢星期日上晝 10:00 到晏晝 3:00 係 Pembroke Park 道開市嘅。



不過呢個市集應該係有季節性嘅;如果想過去行吓呢個市集,我估事先最好去佢哋個 Facebook 網頁,又或者呢個 Wanaka 嘅 local calendar 對一對,睇吓佢哋邊個星期日會開檔先至過去。



查實我哋可以逗留係 Wanaka 嘅時間唔多,係咁兒行咗個市集一陣我哋就要去搵地方食晏。



食完晏個天又開始落雨,我哋係湖邊行咗陣就夠鐘要出車番皇后鎮機場嘞。



由 Wanaka 去皇后鎮會經過一段由 Cardrona Valley Road 同 Crown Range Road 連成嘅公路。



呢條公路有好幾段上落斜度嘅落差都幾大,加上啲路段沿住山崖而建,當中有幾個彎度彼大嘅髮夾彎道,係南島呢邊其中一段比較難揸嘅公路嚟。



不過呢段亦係我哋今次旅程中見過其中最靚嘅一段公路嚟;今次旅程我算係比較懶係汽車開行中影相嘅,事關呢邊公路開車有一定車速彎又多,影相好難影得靚;但行到嚟呢道都忍唔住手要多影幾張



最後講吓皇后鎮機場呢邊點還車。首先去到機場還車前記得要係附近市區打爆咗個油缸先;唔係還車之後要租車公司幫你入番滿缸油嘅話,呢缸油值幾錢就會由租車公司話事,之後再 charge 番你張信用卡陣時我估應該會相當肉赤



皇后鎮機場有租車專用泊車位;搵番架車所屬公司嘅泊車位泊好架車,就可以去機場租車公司嘅櫃位交車匙同辦理還車手續嘞。



我哋晏晝三點鐘咁上下到達皇后鎮機場還車,等一陣 6:00 pm 起飛去 Auckland 班機。



距離起飛大把時間,於是又係機場行行企企四圍影相。



皇后鎮機場嘅位置查實好近我哋早一日去嗰個 Remarkables Market,兩道地方都可以睇到 Remarkables Mountain 嘅 360° 山巒景致。



我哋差唔多夜晚 8:00 到達 Auckland 機場,係機場食住晚飯等零晨 12:00 番香港班機。



時間係 2014 年 1 月 6 日早上 6:00,我哋終於平平安安冇穿冇爛番到香港,完成呢趟紐西蘭南島嘅自駕之旅