韓國冬日滑雪自由行 2015 - 準備篇

Blog in Progress
今年年尾又嚟一次跨年旅行;今次我哋嘅目的地係韓國。喺呢次旅程嘅頭幾日我哋會先去龍平玩幾日滑雪,同參加當地一個冬日節興活動。之後番去首爾作為基地,從首爾出發再去春川同安山玩嗰度一帶啲景點。

行程前嘅準備方面,首先係要預訂好來回仁川嘅機票,首爾同滑雪場嘅住宿,同埋來回滑雪場嘅交通安排。

我哋十月頭出咗幾個電郵去龍平、High One、同鳯凰城幾個滑雪場嘅官方電郵地址想睇吓可唔可以直接同酒店訂到住宿,但 High One 同鳯凰城兩間都覆話雪季未開始未有得預訂住,龍平嗰邊就直頭冇覆我哋電郵

經官方網站訂唔到,但又唔想太遲訂滑雪場嘅住宿,咁唯有搵番香港啲 Agent 幫手;最後我哋都係經一間香港嘅 Agent 預訂仁川來回香港嘅機票同三晚龍平滑雪場嘅住宿;今次我哋飛就坐大韓來回仁川嘅經濟客位,連稅大人盛惠港幣五千零蚊一位,小朋友就收四千有找。住宿就訂咗龍平滑雪場場內嘅 Greenpia Condo 一間兩房一廳嘅客房,其中一間客房有張雙人床,另一間就有四套 Tatami,每晚房租港幣三千零蚊。

至於來往龍平嘅交通,我會喺之後講到去龍平嗰段行程陣時再詳細講吓。

搞掂機票同滑雪場住宿,跟住就要預訂埋首爾嘅住宿嘞。我哋到仁川嗰日差唔多要晏晝五點落機,今次帶住小朋友唔想咁夜轉車去滑雪場,所以到步之後先喺東大門住一晚;我哋經 Booking.com 訂咗 24 Guesthouse Dongdaemun Market 兩間雙人房,每間房租七萬零 won 一晚。滑完雪番去首爾嘅住宿就經 Expedia 訂咗 Hotel Prince Seoul,雙人房房租千三港銀一晚。

通訊方面,我哋今次買咗兩張人仔台 7 日 5 GB 嘅上網卡,鴨記賣 $160 一張。呢張卡放喺我部 Samsung Galaxy Note 1 度用查實都收得唔錯,喺龍平、春川同安山幾個首爾外嘅地區用我部手機上網全程都冇問題;我就算番到酒店房入面都係多數用呢張卡上網冇乜點用酒店嘅 wifi;不過我朋友用緊部新啲嘅 LG 機就話張卡上網時得時唔得

換錢方面,本來喺明洞換韓圜個匯率應該係比香港靚啲嘅,不過我哋喺龍平滑完雪再番去首爾之前都冇乜可能搵到時間去明洞嗰邊換錢。所以我哋先喺香港換咗足夠喺滑雪場用嘅韓圜現金,滑完雪由龍平番去明洞之後再換呢段行程所需嘅使費。

行程計劃方面,最主要係預備好啲行程資料放落部手機度方便去到當地隨時有得查。呢次行程有幾個手機 Apps 我係用得比較多嘅 :
Subway Korea : 雖然韓國地鐵站入面好多指示牌都有顯示中文站名,但今次行程中我都碰過一次上錯車但車上 LCD 顯示屏只出韓文同英文站名嘅事件,好彩當時有呢個 App 跟身可以即時查到自己去緊邊度同點轉車
Metroid HD : 喺首爾搭地鐵開得最多都係呢個 App,此終我都係比較習慣睇中文站名。
Google Translate : 去之前下載定中英韓嘅翻譯資料庫,就算上唔到網都用得。上到網嘅話仲可以玩 OCR,影張相就知韓國啲符號文講乜東東
Go 輸入法 : 可以裝埋個韓文輸入鍵盤;好多時用 Google Translate 翻譯嘅字數唔多嘅話我會先試吓打唔打到啲字出嚟,唔得先影相 OCR 翻譯。

另外以防萬一我去之前都有裝埋 Daum MapSeoulBus 落部手機度。因為驚去到嗰邊未必度度都上到網,所以我部手機入面都儲定好多有關地圖同巴士路線嘅離線資料,去到韓國嗰邊要查呢啲資料陣時我多數都係查啲離線嘅資料,所以呢個旅程就比較少用呢兩個 Apps 嘞。

以上講呢啲都係比較易裝易搞嘅 Apps 嚟;不過今次旅程我開得最多嗰個 App 應該係呢個叫 Oruxmaps 嘅離線地圖。今次行程都要幾靠個 GPS 地圖先可以行得順利;因為唔可以肯定去到嗰邊處處都網絡暢通,特別係首爾以外嘅地區,所以唔想單靠 Google 個 online map,點都要整定個離線地圖帶埋過去至去得放心。雖然結果今次行程我自己部手機喺去過嘅所有地方上網都冇問題,但因為個離線地圖啲圖資喺晒部手機入面,開起上嚟會比 Google Map 吓吓要 download 反應快好多,所以全程要睇地圖陣時我都係睇離線呢個。

要用 Oruxmaps 嘅離線地圖功能,比較麻煩嘅地方就係個地圖嘅圖資要用一個叫 Mobile Atlas Creator 嘅免費軟件自己整;是關喺網上已經有大量嘅教學講點用呢個 Mobile Atlas Creator 整離線地圖,例如呢度,同點用 Oruxmaps,例如呢度,所以喺呢篇遊記就唔詳細講點整離線地圖同點用 Oruxmaps 呢家嘢嘞。

不過有關 Oruxmaps 離線地圖有樣嘢我見網上比較少人提但查實係幾好用我覺得值得打多幾隻字講吓嘅。今次我計劃行程嗰陣時開咗下面呢張 Google 我的地圖,出發前我一路搵資料就一路將啲有用地點嘅坐標分門別類咁記錄喺張地圖上面;只要將呢張地圖同啲同行朋友分享同分配讀寫權限,就可以幾個人合作記錄啲有用地點嘅坐標,同時亦方便幾個朋友網上溝通個行程。



呢張地圖之後講到我哋啲行程陣時我都會時不時拎佢出嚟俾大家對吓啲地點位置嘅。而我哋喺臨出發前幾日,啲有用地點記錄得九九十十之後,我哋就好似下面個截圖咁將張我的地圖入面記錄咗嘅坐標分類匯出成一啲 kml 檔案。



呢啲 kml 檔案可以匯入另一張 Google 我的地圖度,又或者抄去手機 Oruxmaps 入面個 overlay 資料夾度。之後喺手機用我的地圖上網睇番啲坐標又得,開 Oruxmaps 離線地圖好似下面張截圖咁載入啲地點坐標又得,相當好用。



要注意由官方網站下載嘅 Mobile Atlas Creator 本身係開唔到 Google Map 整離線地圖嘅;要用呢個 Mobile Atlas Creator 開 Google Map 要喺軟件包入面 mapsources 個資料夾度加番個專開 Google Map 嘅 bsh 檔案先可以用佢嚟開 Google Map 整地圖。

呢度有一大塊懶人包 ,可以下載一個壓縮檔,個壓縮檔入面有個 Mobile Atlas Creator 資料夾,裝咗一個已經可以開到 Google Map 嘅 Mobile Atlas Creator,有興趣自己整離線地圖嘅話可以用呢個開到 Google Map 嘅軟件包去整。用呢個軟件包開咗個 Mobile Atlas Creator 之後,喺 Map Source 揀 BeanShell map source 0 就係 Google 地圖。

話明係懶人包就當然不論你幾懶都有辦法幫到你喇 。如果唔想自己整離線地圖嘅話,懶人包入面有個 Korea Maps 資料夾,放咗我今次行程已經整好咗嘅幾個離線地圖。要用嘅話,手機先去 Google Playstore 裝咗個免費嘅 Oruxmaps,再將 Korea Maps 入面成個 Google 資料夾抄去手機 sdcard/oruxmaps/mapfiles/ 呢個資料夾度,手機打開 Oruxmaps,再切換地圖 => offline,選個 Google 資料夾就可以。個 Google 資料夾入面查實包含咗幾個地圖圖層。Korea 資料夾係一個包括首爾、江原道同京畿道嘅圖層,呢個係整個離線地圖一個用嚟打底嘅低解像圖層,係必需抄去手機度嘅。呢個資料夾以外嘅其他資料夾都係打底圖層上面唔同地區嘅詳細地圖,你可以跟據自己需要選擇抄同用唔同嘅圖層。Seoul 資料夾係首爾嘅詳細圖層;春川就分開 Chuncheon 1 同 2 兩個資料夾;Yongpyong 係龍平滑雪場同橫溪一帶;JinBu 係珍富面一帶;YangPyeong 係陽平鐵路自行車站附近一帶;Ansan 係安山站附近一帶,Daebudo 就係大阜島一帶嘅詳細圖資嘞。

因為啲地圖嘅圖資相當大食,所以你會見到上面個大包都成 500MB 有突相當大份。呢度有個將個 Korea Maps 資料夾刪咗,檔案容量細好多嘅懶人包 ;如果你冇需要用到啲離線地圖嘅圖資但有興趣睇吓我之後講到嘅其他資料,可以下載呢個輕盈版嘅懶人包嚟睇吓。

另外懶人包入面有個 KML 資料夾,裝咗我哋今次行程記錄咗嘅地點坐標。覺得呢啲坐標有用嘅話可以將啲 kml 檔匯入你自己個 Google Map 再改又得,直接抄啲 kml 檔去手機 sdcard/oruxmaps/overlay 個 folder 度用都可以。

懶人包入面仲有其他資料,之後講到詳細行程陣時會再講吓。



講完一大堆豬噏,都差唔多係時候要出發嘞;我哋一行五人齊齊搭上大韓呢班 KE604 號班機,正式展開我哋今次韓國冬日滑雪𠽌之旅

留言

  1. 你好呀, 我都 PLAN 緊 下年 2 月會去龍平自由行呀, 想問下你O係邊間 AGENT 到買 PACKAGE 架?

    回覆刪除
  2. 嗰陣我哋幫嚫間 Travel Agent 舖號叫 JBC Travel,喺哩個網址度有聯絡佢哋嘅資料。當時佢哋有位姓謝嘅 Agent 跟我哋張單,你亦可以試吓打去佢個直線電話 22180819 問吓。
    除咗哩間 Agent 外,當時我哋亦格過另一間旅行社Korea Travel Service,佢哋都有做類似嘅機票加滑雪場住宿套票。不過嗰陣 JBC 報啲價平過 KTS 啲啲,加上 JBC 我哋之前幫嚫過冇乜出事,於是嗰次我哋就幫嚫咗 JBC 買佢哋個 Package。

    回覆刪除
  3. 我年尾會去首爾~中間應該僧去龍山,但我想問下邊度有得睇到龍平滑雪場最新既開放時間,價錢?上官網無><

    回覆刪除
  4. 我估家陣離雪季仲有一段時間,龍平官網入面應該未有咁快可以睇到哩啲資料住。我上年就冇乜點留意龍平滑雪場新一季嘅開放時間喺邊度有得睇 :-?;我估你可以間唔時望吓《哩個日曆》睇吓有冇咩新料公報;哩個雪道嘅《開放狀態表》我覺得都可以參考吓。
    Ski Pass 同租用具嘅價目表我估應該喺《哩個網頁》度;不過哩個桌面版嘅網頁未見有咩資料公報住。而哩個《手機版嘅價目表》未必係新一季嘅準確價錢,但囉佢嚟因一因個大約使費,我估出入應該唔會太大呱 8-|。

    回覆刪除
  5. 你好呀!我第一次去韓國滑雪,好彩有你個BLOG咋,我完全跟住去BOOK, 我依家BOOK左龍平住兩晚,車就篾佢覆!想問下呢個啲滑雪裝備同LIFT PASS可唔可以去到先租?係咪唔洗BOOK定先架?麻煩哂!!

    回覆刪除
  6. 我哋上年去嗰陣,都係嗰日諗住滑邊場,開場前先至買嗰場嘅 Lift Pass 同租用具嘅。嗰邊除咗滑雪場本身有櫃位買 Lift Pass 同租用具之外,去附近橫溪都有好多店舖可以搞到哩兩家嘢。所以我估出發前唔需要太擔心哩兩樣嘢嘅安排,去到大把選擇可以慢慢格啱價先租同買。

    回覆刪除
  7. thx chi wa!!另外我都想跟你去平昌鱒魚節!希望可以順順利利!!

    回覆刪除

發佈留言