Booking.com

喺講呢日嘅行程之前,先講吓我哋今次去龍平嘅交通安排。我哋大約十一月頭跟住呢個龍平官方網頁俾嘅電郵地址,出咗封電郵問點買飛搭穿梭巴士去龍平。佢哋嗰邊都覆得好快,第二日就經電郵俾齊成套買車飛嘅資料過我哋。

呢間營運 Ski Bus 嘅公司叫 Grace Travel,喺準備篇塊懶人包入面有個 SkiBus 資料夾,資料夾入面裝咗當時 Grace Travel 嗰邊覆俾我哋啲附件;詳細嘅巴士路線、車站位置、價目表等等嘅資料都可以喺入面搵到。

跟據佢哋俾我嘅資料,佢哋辦去龍平嘅巴士線主線有兩條;一條係仁川機場來往龍平,成人單程票價每位 US$ 35,雙程 US$ 70。另一條係首爾來往龍平,成人單程票價每位 US$19,雙程 US$34。首爾去龍平嘅巴士線有 5 條支線,啲支線喺好多首爾主要嘅旅遊區都有車站,例如弘大、仁寺洞、首爾站等等;所有支線尾二嗰個站都係蠶室站,由蠶室出發就直開去龍平嘞。

呢間巴士公司同香港啲紅 Van 有個相同嘅營運方針,就係搏上唔搏落 ~ 佢哋由龍平番首爾只得蠶室一個終點站。

張 Ski Bus Reservation Form 主要係填番啲聯絡資料、買邊條巴士線、買幾多張飛、想喺邊度上車等等嘅資料俾佢哋;填好份表格跟住表格入面個地址電郵番份表格過佢哋,嗰邊即日就覆番個電郵確認收到我哋張表格同叫我哋等 Paypal 寄電郵過我哋俾錢。

第二日我哋就收到 Paypal 寄過嚟嘅電郵;跟住電郵入面嘅連結去 Paypal 個網站度俾錢,之後 Paypal 嗰邊會俾番封電郵過我哋確認收咗我哋錢。

俾咗錢第二日 Grace Travel 嗰邊會俾個電郵過我哋單聲話佢哋已經收到我哋俾嘅錢。當時係 11 月中,佢哋喺個電郵度話因為佢哋個系統仲未開通,要到 12 月頭先出到車飛過我哋。到 11 月尾我哋就經電郵收到一份好似下面咁嘅車飛。出發前要預先列印定呢張車飛帶埋過去,因為上車查飛就係用機掃描車飛上面印咗嗰個條碼。



講完點買車飛,家陣可以講番個行程嘞。我哋呢個朝早要 8:15 之前去到東大門 Doota 前面廣場個位置上巴士。喺下面張地圖左上角有個表單,表單 Transportation 圖層入面有幾個龍平 Purple Bus 嘅位置坐標,記錄咗我哋搭呢程 5 號線 Ski Bus 由首爾站、明洞、東大門到蠶室各個車站嘅位置。



我哋行到去東大門 Doota 對出個廣場嘅呢個車站嗰陣已經見到一班人都係喺度等緊架巴士。



架巴士非常準時唔遲唔早剛好 8:15 到達;巴士上齊人之後先開車去下一站蠶室。



架巴士行咗廿零分鐘就到達下一站蠶室,呢個車站就喺蠶室 Lotte Mart 前面。



喺蠶室站我哋要落車同搬啲行李轉去另一架 Purple Bus;上咗車會有票務員問我哋囉車飛嘟 barcode 查飛。



到大約九點等齊人司機就開車直踩去龍平。

Loading...

我哋嚟韓國呢幾日天氣都幾凍吓,車程途中一路啲農田山邊都見到積雪。



程車比我想像中快,行咗兩個零鐘到十一點半咁上吓,就到達我哋今次旅程嘅第二站 ~ 龍平滑雪渡假村