龍平滑雪渡假村 - 韓國自由行

Blog in Progress
先講吓呢度龍平滑雪渡假村係點環境。我哋到步落車嘅地方係呢度一個穿梭巴士停車場;喺呢個停車場會見到兩隻唔同顏色嘅巴士;紫色呢隻 Purple Bus 就係我哋由首爾坐過嚟龍平嘅巴士,相信主要係用嚟行長途線嘅巴士嚟。



另外呢隻橙紅色嘅,相信主要係行區內嘅短途線;我哋第二日去橫溪食飯,就係坐呢隻橙紅色嘅巴士過去。呢啲由龍平去區內嘅穿梭巴士線我會喺之後行程嘅篇幅度再詳細講吓。



下面個地圖記低咗幾個呢條渡假村入面嘅大樓同搭車嘅位置。唔計滑雪場本身,我哋喺呢條渡假村主要有三個活動位置。



由停車場可以進入渡假村入面一座叫 Tower Plaza 嘅大樓。呢座大樓有好幾間食肆同啲賣滑雪用品之類嘅店舖;渡假村入面其中一座酒店 Tower Condo 亦係喺呢度。因為呢間 Tower Condo 既近停車場亦近買 Ski Pass 同租滑雪用具嘅地方 Dragon Plaza,所以我個人就覺得如果預訂呢度啲酒店嘅話,Tower Condo 應該係最理想嘅選擇。不過我哋呢次入住嘅係距離呢度遠啲啲嘅 Greenpia Condo,咁嚟同走嗰陣我哋都要拖一段遠啲啲嘅篋,有啲啲冇咁方便咁囉



由 Tower Plaza 行多兩步就去到呢個渡假村入面另一座大樓 Dragon Plaza。



買 Lift Pass 同租滑雪用具全部都係嚟呢座大樓度搞掂。呢座大樓亦有好幾間唔同款式嘅食肆,特別係呢度一間 canteen,我見嚟呢度集訓啲學生,一日三餐就係喺呢間 canteen 度搞掂。



喺呢度玩滑雪嚟講,主要係要俾錢買兩樣嘢;先講吓第一樣 Lift Pass。Lift Pass 係一個証嚟;滑雪嗰陣要將個 Lift Pass 掛喺身上當眼嘅地方;滑雪場場內每條 Ski Lift 閘口度都有工作人員站崗檢查你掛住個 Pass,如果冇 Pass 又或者個 Pass 已經過咗鐘,就當然唔會放你入去搭 Lift 喇

另一樣係租滑雪用具;家陣你可以選擇雙板 Ski 又或者型啲嘅單板 Board。Ski 嘅租金比較平,同以我所見通常啲人都話初學嘅話 Ski 會比較易上手;不過要型嘅話就當然係 Board 型啲啦 。買 Pass 同租 Ski 或 Board 都係分唔同時段;你可以選擇踩足一日,玩早午晚是但一晝,又或者踩夜場。呢度個官方網頁就列出咗買 pass 同租用具喺唔同場次嘅價目嘞。



喺 Dragon Plaza 有個俾錢買 Lift Pass 同租用具嘅購票櫃位;如果你喺自備架生嘅話喺呢度買咗 Lift Pass 就出得去玩。如果要喺度租用具嘅話就必須要買埋 Lift Pass。買咗 Lift Pass 櫃位會印個証出嚟同俾條膠帶過你,方便你將個 Pass 掛喺身上當眼嘅地方。



租用具嘅話,購票櫃位會出張飛俾你,你就拎住張飛飛去樓下用具櫃位度出滑雪用具。出 Ski 同出 Board 係分開兩個唔同嘅櫃位。



租用具張飛度有地方俾你填你嘅姓名、聯絡電話同著幾多號鞋等等嘅資料;交咗張飛俾櫃位嘅職員,櫃位職員拎咗架生出嚟,你就要將一張你自己嘅証件,例如身份証、護照又或者酒店門匙卡之類同櫃位一手交一手;到你玩完還番晒啲用具俾櫃位職員之後就用張飛嘅票尾拎番自己張証件;所以去租滑雪用具之前記得要有張証件跟身。



由 Dragon Plaza 穿過一個停車場,就係我哋呢幾日入住嘅酒店 ~ Greenpia Condo。10 月頭我哋搞預訂機票酒店陣時本來一路都幾擔心一到雪季呢度好快會客滿冇房。不過嚟到 Check in 嗰陣個櫃位職員仲識 sell 我 upgrade 間房做滑雪場景房,又有得揀全榻榻米又或者其中一間雙人床房,咁睇查實間酒店都冇我當初想像中咁爆



Check in 嗰陣記得要問櫃位職員拎啲咁樣嘅折扣優惠券;去 Dragon Plaza 嗰邊買 Ski Pass 同租用具出示呢啲優惠券都會有七折優惠。



呢次我哋住嘅就係呢隻一廳兩房嘅單位。其中一間睡房有張雙人床,另一間就放咗四套榻榻米喺衣櫃度。間房可以舖到三張榻榻米,要舖埋第四張的話我覺得舖出廳會好啲。



個廳嘅面積都幾大吓咖,啫以我呢啲見慣劏房嘅香港人嚟講



廳度有個開放式廚房,有微波爐同明火爐,碗碟砂煲甖罉一應俱全,要煮九大簋都冇問題。房間有兩個浴廁,毛巾設備都相當乾淨。同滑雪場其他 Condo 樓座一樣,呢座 Greenpia Condo 都有幾間食肆可以去搵吓嘢食。呢邊 Condo 仲有一間便利店,我哋出入搭電梯時不時都見到呢度啲住客由便利店將一車車即食麵車上房開餐的說



我哋今次入住呢度滑雪場嘅酒店房間環境算係唔錯,入房嗰陣啲設備亦相當乾淨衛生。不過呢間酒店並唔係好似一般酒店咁日日幫我哋執房嗰隻;可能因為咁佢個酒店名先叫 Condo。我哋住到第二晚發覺酒店冇幫我哋換毛巾,要打電話叫酒店職員拎新毛巾俾我哋;同埋房間啲垃圾要倒的話都係要自己處理。除咗呢啲小問題之外呢間酒店都算係企理乾淨住得舒服嗰隻。

留言

  1. 非常感謝樓主的詳細資料. 我們一家三口, 下周首次出發龍平. 請問Check In 龍平Resort, 是否一定可以取到有 30% 折扣 COUPON? 我想到時幾時落去滑雪才在龍平雪場訂 Lift Pass/Rental. 因為同 Grace Travel 訂 Bus Ticket 也有30% 折扣, 但時間定了就無得改. 在龍平訂的, 時間有彈性.

    回覆刪除
  2. 因為我只在我們今次入住的 Greenpia Condo 拿過折扣券,所以就親身經驗來說,我只可以確定入住 Greenpia Condo 是可以拿到這些 30% 折扣優惠。
    但根據我出發前看過的資料,龍平滑雪場場內其他酒店亦會給住客派發這些 30% 折扣券的。因為我們已經預期入住滑雪場場內酒店會拿到折扣,所以我們亦沒有跟 Grace Travel 預訂滑雪用具和 Ski Pass。
    據我所知,在橫溪很多出租滑雪用具的店鋪還可以給幫襯他們租用具的顧客拿到 35% 折扣的 Ski Pass。所以我相信這些折扣優惠在龍平其實是很普遍,應該很少人會用原價跟滑雪場租用具和買 Ski Pass 的說 ;)。

    回覆刪除
  3. 請問樓主知唔知龍平12月頭D 雪掂唔掂?

    回覆刪除
  4. 查實嗰邊12 月頭係點環境我冇親身經歷,下面講嗰啲主要都係喺網上面睇返嚟。上年龍平應該係十一月中開始開放滑雪場,我估 12 月頭去到應該都好大機會有雪滑。雪況嚟講當然係一、二月陣時最好;上年我 12 月尾 1 月頭過去,感覺嗰陣啲雪都係偏硬;所以我估 12 月頭去嘅話都唔好對嗰陣啲雪況有太大期望。如果可以就到時間嘅話就當然遲多個零月先過去滑就最好啦;但如果時間唔就事必要 12 月頭去,咁就唯有望嗰邊今年早啲凍早啲落吓雪喇。滑雪場嘅雪質查實都好睇天氣,去到滑唔滑到靚雪此終都係幾睇運氣架。

    回覆刪除
  5. 你好樓主, 感謝你的詳盡分享! 我們正考慮該選擇Dragon Valley Hotel 還是Tower Condo. Valley 好像位置幾好但Tower Condo 房裡有kitchen. 請問你們在龍平時是否都在酒店吃早餐? 還是自己煮? 龍平有沒有大的便利店可買食物? 謝謝喔!

    回覆刪除
  6. 你好樓主, 感謝你的詳盡分享! 我們正考慮該選擇Dragon Valley Hotel 還是Tower Condo. Valley 好像位置幾好但Tower Condo 房裡有kitchen. 請問你們在龍平時是否都在酒店吃早餐? 還是自己煮? 龍平有沒有大的便利店可買食物? 謝謝喔!

    回覆刪除
  7. 我哋當時買嗰個 Package 冇包酒店早餐,所以喺滑雪場嗰幾日都係自己煮早餐嚟食;都算好彩住著間房有個唔錯嘅厨房,嗰幾日早餐啲伙食先至唔使食得咁寡 (:=|。
    龍平喺 Greenpia Condo 有間算係中型嘅便利店。仲記得嗰晚喺橫溪食完韓牛,諗住橫溪買嘢應該會平過滑雪場入面,於是食完飯喺橫溪一間舊式雜貨舖買咗叠即食麵諗住第二朝做早餐。返到滑雪場經過哩間便利店,身痕走入去對吓啲價錢,先發覺原來間便利店賣嘅價錢同間雜貨舖一樣。所以我估哩間便利店喺滑雪場入面雖然算係做緊獨市生意,但佢哋都冇話收得特別貴。
    我記得哩間便利店有賣各式飲品零食、即食麵、雞蛋、同各類急凍包裝食品。啲急凍食品有乜款式詳細就唔係太記得,只係記得嗰陣時買過幾包急凍餃子,可以就咁放落煲滾水度煲熟佢嚟食;另外亦買過包 pancake 可以就咁用煎鍋乾煎。哩間便利店賣嘅嘢要解決早餐嚟講應該冇乜問題。
    講開早餐仲記得有晚喺橫溪見到有間麵包舖門面幾靚,於是入去買咗啲麵包第二朝做早餐。後來返咗香港一排,先知哩間連鎖麵包店 Paris Baguette,原來曾經上過一集 Running Man 的說 :~。

    回覆刪除
  8. 你好樓主,我想问lift pass 係唔係坐几多次都得啊?

    回覆刪除
  9. Lift Pass 一般都係限時而不限次數;例如買當日 08:30~12:30 早場嘅 Pass,咁喺嗰日 08:30 至 12:30 呢段時間入面,只要 Ski Lift 閘口查飛嘅職員睇到你身上有掛住啱時段嘅 Lift Pass,就會不限次數咁俾你上 Ski Lift。
    不過我印象中有啲滑雪場好似係有隻單次嘅 Lift Pass 俾啲初心者平平地體驗吓嗰隻;龍平我就唔係好覺有賣哩隻 Pass;不過如果係諗住認真玩想唔限次數咁玩一日半日嗰隻,都係最好睇清楚注意要買啱限時段嗰隻 Pass 唔好買錯。

    回覆刪除

發佈留言