Booking.com

我哋今朝十一點零鐘到步,但酒店嗰邊要到晏晝兩點至可以 check in ;冇計唯有放低啲行李先去食晏。我哋喺 Dragon Plaza 搵咗間中華料理醫肚;食完飯行番去酒店 Check in 同換衫,再番到滑雪場嗰陣查實都已經幾晏吓。雖然有啲蝕鐘,但我哋都照玩咗 12:30 - 16:30 嗰場嘅滑雪時段。



之前一篇講呢個渡假村嗰陣咪講過買 Lift Pass 嘅 ~ 下面左邊張圖見到嘅就係 Ski Lift 嘞。一般去玩買 Lift Pass 就係坐呢隻 Lift 上去啲斜坡頂度再滑番落嚟。右邊嗰張圖見到嘅係 Gondola;可以坐佢上滑雪場嘅山頂,由一條長好多嘅雪道滑番落嚟;不過要坐佢嘅話就要買一隻貴啲嘅 Lift & Gondola Pass 嘞。

 

滑完雪我哋喺滑雪場度 Hea 咗陣就番酒店房換衫,再打的出去滑雪場外面食飯。

講開搭的士又分享吓一個喺韓國打的嘅小小心得吖。我哋出發前搵資料都成日見網上啲人講喺韓國搭的士啲麻煩嘢 ~ 一來同啲司機語言唔通講同寫都好難溝通到,二來就算渣住張韓文酒店卡片俾個司機睇,嗰邊好多司機都有老花,卡片上面印啲字太細佢哋睇唔清楚就會嫌麻煩拒載

 

為咗避免呢啲搭的士陣時可能會遇到嘅麻煩,我哋今次就喺出發前用小畫家整啲好似上面咁嘅 jpeg 公仔紙放定喺部手機度,每張公仔紙嘅大細跟番手機嘅解像度。咁上咗的士之後只要用部手機打開張公仔紙大大隻字咁俾司機睇,就好容易話到俾啲的士司機知我哋想去邊度嘞



呢晚我哋要去食飯嘅地方叫橫溪 (횡계),呢處係龍平滑雪場附近一個小區嚟。橫溪呢度有一間當地幾出名嘅韓牛超市食店,舖號叫大關嶺韓牛村 (대관령한우타운)。上面個地圖就顯示咗橫溪呢個小區嘅位置喺邊嘞。



由龍平滑雪場去橫溪如果係坐的士去嘅話,車費大約係 W10,000 左右;龍平滑雪場入面唔會好似香港啲酒店咁有的士站平時大把的士排晒隊喺度等客嗰隻。喺龍平同橫溪要搵的士嘅話都要搵人幫手打電話電召;每程的士嘅電召附加費係 W1,000,電召費會喺的士嘅咪錶度顯示出嚟。



喺呢間韓牛村食嘢俾錢嘅方式都幾特別吓;嚟到首先要喺佢哋超市嗰邊買齊啲肉類食品。



同我哋平時行超市一樣,買齊嘢食之後就先去收銀櫃嗰邊俾錢。



然後拎住喺超市嗰邊買咗嘅肉食跟舖頭嘅店小二過去隔離開枱起爐開餐。



呢邊開枱每位茶芥收 W4,000,茶芥包括泡菜,大碟用嚟包住啲燒肉食嘅菜葉,同清水無限供應。



白飯、酒水飲品同小菜就另外收費。



嗰度啲雪花韓牛賣相非常吸引,睇見都食指大動 !



呢餐我哋三大兩小五個人連埋酒水食到捧住個肚,埋單都唔使 W120,000,算係嚟韓國咁多餐當中相當抵食嘅一餐。



我哋食完飯喺附近啲雜貨店買咗啲即食麵第二朝做早餐,跟住搵餐廳啲職員幫手叫的士番歸;呢日嘅節目就此完滿結束嘞