平昌鱒魚節 (평창송어축제) - 韓國自由行

Blog in Progress
年紀大機器壞,以前去到滑雪場連踩四五日可以面不改容,家陣實在係冇咁嘅體力再咁樣玩法。於是今次計劃去龍平玩呢幾日當中,其中一日我哋會放低塊滑雪板,出走去玩玩當地一個節興活動 ~ 平昌鱒魚節 (평창송어축제)。



呢日都係諗住輕鬆啲 Hea 吓可以晏啲先起床;食過早餐磨到十點幾我哋先出門口。首先搵酒店櫃台幫手 call 的士嚟接我哋。



呢個平昌鱒魚節係喺江原道一處叫珍富面 (진부) 嘅地方度舉辦;今年呢個節興活動嘅舉辦日期係由 2014 年 12 月 20 日到 2015 年 2 月 8 日。



由龍平坐的士去珍富每程大約要 W30,000 車錢;如果想慳家啲,可以考慮先坐龍平嘅免費穿梭巴士去橫溪度食個早餐,再喺橫溪坐的士過去;咁去法嘅話程的士嘅車費應該大約係 W23,000 左右;下面個地圖就記低咗呢個平昌鱒魚節會場嘅位置喺邊嘞。



呢個冰魚節嘅入場費都唔平,呢度個官方網頁有個韓文版嘅入場費價目表;要睇得明呢個價目表講乜,當然要上網做吓翻譯喇;下面個表就係我用網上翻譯整出嚟嘅中文版價目表嘞。

分類
종별
價格
가격
包括
포함사항
釣魚帳篷(普通)
텐트낚시(종합)
W30,000釣魚帳篷
텐트낚시터
帳篷,椅子
康樂設施(雪的經驗,冰體驗11賽事)
排除赤手捉,釣魚竿單獨購買
텐트, 의자
놀이시설(눈체험,얼음체험 11개종목)
[ 맨손잡기 제외, 낚시대 별도구입 ]
冰釣(一般)
얼음낚시(종합)
W25,000一般釣魚
일반낚시터
冰釣
康樂設施(雪的經驗,冰體驗11賽事)
排除赤手捉,釣魚竿,椅子單獨出售
얼음낚시터
놀이시설(눈체험,얼음체험 11개종목)
[ 맨손잡기 제외, 낚시대,의자 별도구입 ]
遊戲種類
놀이종합
W22,000玩廣場
놀이광장
康樂設施(雪的經驗,冰體驗11賽事)
놀이시설(눈체험,얼음체험 11개종목)
釣魚帳篷
텐트낚시
W20,000釣魚帳篷
텐트낚시터
帳篷,椅子
[桿單獨購買]
텐트, 의자
[ 낚시대 별도구입 ]
冰釣(一般)
얼음낚시(일반)
W13,000一般釣魚
일반낚시터
釣魚竿,椅子單獨出售
낚시대,의자 별도구입
冰釣(小學)
얼음낚시(초등학생)
W10,000一般釣魚
일반낚시터
釣魚竿,椅子單獨出售
낚시대,의자 별도구입
捕鱒魚赤手
송어맨손잡기
W15,000徒手抓
맨손잡기장
短袖,短褲
반팔, 반바지

我哋坐咗約莫大半個鐘的士就到達呢個冰魚節嘅會場嘞;進入會場之前要先入去嗰度一間售票大堂度買飛。



售票大堂有識普通話嘅翻譯員現場幫我哋呢啲華人遊客解釋點買飛入場。



呢度有好幾隻唔同嘅票種可以選擇;任何票種都唔包釣魚竿,魚竿係要分開買的說。



喺會場度賣嘅主要係呢兩款魚竿。



喺購票櫃位俾咗錢,櫃位職員就會印啲入場証俾我哋;我哋要將呢啲入場証掛喺身上當眼嘅地方,方便查飛嘅職員檢查入場。



呢個鱒魚節嘅會場主要分開釣魚區同遊樂區兩個主區,而釣魚區又再分開普通區同帳篷區;我哋先入去釣魚區度睇吓嗰度點環境。



喺售票大堂買完飛出到室外,就會見到一個大帳篷,入到去個帳篷入面就會見到釣魚區嘅入口,而喺呢個入口度就有工作人員查飛。睇番上面個價目表,如果買飛嘅票種係包括帳篷冰釣嘅,例如 W30,000 包帳篷冰釣同康樂設施嗰隻,又或者 W20,000 只包帳篷冰釣唔包康樂設施嗰隻,都可以入去帳篷區度玩冰釣。



帳篷冰釣同普通冰釣兩區中間有圍欄隔開,買咗普通冰釣入場券嘅人係過唔到去帳篷區入面玩的說。



冰釣場入面已經有好多預先鋤好咗嘅冰洞;如果想試試自己鋤一個冰洞嚟玩吓嘅話,現場亦隨手可以執到呢隻咁樣嘅架生去用。



我出發前搵資料陣時睇過好幾篇講呢個冰魚節嘅遊記博客,查實都未見過一篇遊記講話喺呢度親手釣到鱒魚現場拎去煮嚟食。而以我哋喺現場玩過嘅經驗嚟講,當時我見身邊大約有十零個冰洞有人釣緊,我哋喺釣魚區釣咗差唔多一個鐘,見到身邊大約有兩三個洞啲人係釣到魚嘅;以我呢次嘅經驗咁嚟計嘅話,喺呢度企個零鐘,釣到魚嘅機率應該低過三成 ~ 喺呢個冰魚節度釣到魚查實並唔係一件容易嘅事

嗰日冰釣場嗰邊都好大風同幾凍吓,我哋喺冰釣區試咗個零鐘,我鞋底已經俾腳下面啲冰雪到凍一凍,腳板底頂唔順最後都係要舉腳投降,行過去遊樂區嗰邊繼續玩。



遊樂區同冰釣區唔同,呢邊係冇查飛嘅閘口;咁啫話如果你唔係諗住去玩入面啲遊樂設施嘅話,就算冇買飛你都可以就咁行入去參觀吓影吓相。



由售票大堂經過一排雪雕公仔,就去到呢個冰魚節嘅遊樂區嘞。要玩遊樂區呢邊嘅遊戲,就要買可以玩遊樂設施嘅門票,例如 W25,000 包普通冰釣同遊樂設施嗰隻,又或者 W22,000 唔包冰釣齋玩遊樂設施嗰隻嘅門票。



呢個遊樂區總共有十一個遊樂設施,玩呢啲遊戲都要出示入場証俾工作人員查飛。例如呢隻我哋玩得最多轉嘅大水泡雪撬,啲工作人員會先檢查過我哋張入場証先會派個大水泡俾我哋拉去玩。



不過都有個遊戲係例外嘅。呢條冰滑梯係遊樂區入面唯一一個冇買飛都可以任玩嘅遊樂設施嚟



遊樂區呢邊有好幾個遊戲係專為小朋友而設嘅。



例如呢隻氹氹轉 ……



呢隻空中彈跳都只係小朋友至玩到。



呢隻袖珍版嘅海盜船,亦係只有小朋友先坐得落。



再行入啲個遊樂區有個大冰湖,冰湖上面就有啲可以俾大人同細路一齊玩嘅設施嘞。



呢啲設施有冰上三輪車、溜冰、冰上四驅車之類嘅活動。



除咗有冰上嘅四驅車之外,泥上嘅四驅車都有得玩;不過玩完呢隻四驅車之後,番香港前要繼續著番身上啲衫嘅話,睇怕都要番酒店洗衫先得



同小朋友一齊嚟玩,好自然呢日我哋幾大部份嘅時間都係花喺遊樂區呢邊



呢個冰魚節大約晏晝五點咁上下就開始收檔;我哋離開呢個會場行咗冇幾遠,搵到個地方有幾部的士停咗喺嗰度,我哋就上咗其中一部的士,直接驅車番龍平嗰邊食晚飯嘞。

留言

  1. 想請問係橫溪係咪一定要搭的士去平昌?係咪冇公車去個度架?thx

    回覆刪除
  2. 如果你上 map.daum.net 搵搵,查實係可以搵到下面三條來往橫溪同珍富之間嘅巴士路線:

    진부터미널 <-> 횡계
    首班車06:30 | 末班車10:20 | 一日兩班
    簡化路線 : 진부터미널 (珍富) -> 시외버스터미널 (橫溪) -> 진부터미널 (珍富)
    횡계터미널 <-> 진부터미널
    首班車10:45 | 末班車10:45 | 一日一班
    簡化路線 : 시외버스터미널 (橫溪) -> 진부터미널 (珍富) -> 시외버스터미널 (橫溪)
    진부터미널 <-> 용산
    首班車17:50 | 末班車17:50 | 一日一班
    簡化路線 : 진부터미널 (珍富) -> 시외버스터미널 (橫溪) -> 진부터미널 (珍富)

    哩度有個教學教人點用 Daum Map 查巴士路線。
    你可以試試先喺 Daum Map 用 keyword 진부터미널 捜尋珍富一個巴士站嘅位置,再用 keyword 횡계시외버스공용정류장 捜尋橫溪嘅一個巴士站位置。之後跟住個教學嘅做法,應該就可以搵到我上面講嗰幾條行走珍富至橫溪嘅巴士路線同路線中每一個巴士站嘅位置。

    如果舞唔掂個 Daum Map,可以試吓用下面嘅座標,上 maps.google.com.hk 捜尋我上面講喺橫溪同珍富嗰兩個巴士站嘅位置。

    시외버스터미널 (橫溪) : 37.6729438,128.7045516
    진부터미널 (珍富) : 37.6361804,128.558937

    希望咁樣幫到你啦 ;)。

    回覆刪除
  3. 幫到呀!!!!好感激你咁耐心答我問題!好詳細!!!多謝你!!

    回覆刪除
  4. 請問上面的價錢是每人定每帳篷計?即我2大1小用1個帳篷要比幾多?

    回覆刪除
  5. 個價錢係以每人計嘅。嗰個場分開一邊係帳篷冰釣區,另一邊係普通冰釣區,中間有圍網隔開,入場嗰陣有查飛人員跟據你買嘅門票放你入兩邊場地嘅其中一邊。喺帳篷區係冇人會理你用幾多個帳篷嘅,一人用一個都冇問題。查實嗰度啲帳篷都唔係好大,一個帳篷放咗兩張凳仔,每個帳篷都係預一至兩個人用。

    回覆刪除

發佈留言