Booking.com

我哋坐架 Purple Bus 差唔多晏晝五點鐘到達蠶室;落車第一件事先要截的士車我哋去之前預訂咗喺明洞嘅酒店。哩晚都好塞車吓,由蠶室差唔多坐咗成個鐘車我哋先到達明洞。



哩兩晚我哋住嘅就係哩間首爾王子飯店 (프린스호텔) 嘞。上面個地圖就記低咗哩晚我哋嘅幾個活動位置,包括 Hotel Prince Seoul、酒店對面嘅機場巴士站、大使館換錢所同埋全州中央會館。



哩間酒店一樣幾正嘅地方就係佢對面馬路有個機場巴士站,一出酒店拖篋過一條班馬線就可以排隊上 6015 或者 6001 號開去仁川機場嘅巴士,非常方便。



哩間酒店啲房間嘅衛生環境算係唔錯,床舖乾淨整潔;不過房間唔算係好大,打開兩個篋之後都冇乜活動空間。



房間嘅浴室亦算係乾淨企理,熱水供應充足夠熱夠力,浴缸亦去水暢通。整體嚟講哩間酒店算係一個交通方便乾淨衛生住得舒適嘅選擇。

我哋喺香港唔係換咗好多韓圜,喺龍平玩咗幾日番到首爾已經山窮水盡 ;所以喺酒店安頓好啲行李之後,先要過去大使館換錢所唱番啲韓圜至有錢開飯。補充番啲彈葯,大伙兒就行過去明洞全州中央會館 (전주중앙회관 - 명동본점) 嗰邊醫肚嘞。



唔知點解哩間食店嘅門口要搞隻咁陰森嘅綠色燈光;如果唔係之前睇到網上咁多人推介哩度有好嘢食,就咁第一眼望埋去佢個門口,實在未必夠膽行入去



間鋪頭都好旺場吓,不過又幾好彩嚟到剛好有吉枱唔使等位。哩間餐廳揍慣遊客,啲餐牌有齊中日韓文對照圖文並茂,我哋點餐完全冇難度。



佢哋嘅招牌菜石鍋拌飯一定係必食之選。



哩度嘅蔘雞湯都好多人推介,我哋亦叫咗個嚟試吓。



食完飯大伙兒就出街行吓哩度嘅夜市嘞。夜晚嘅明洞好熱鬧,四圍都係街邊檔,街頭小食衫褲鞋襪手機配件乜都有得賣。

剛啱出呢篇文章嘅前一日年初二,喺深水埗有幾個團體發起支持桂林街夜市嘅擺賣活動,結果市民之間同食環署仲爆發咗激烈嘅爭執同推撞。睇見哩單新聞再望番我當時喺明洞夜市影嘅相,感覺實在係有啲唏噓;哩啲夜市喺亞洲好多大城市都非常普及,為乜事偏偏喺香港哩啲小販攤檔會咁難生存



就我喺東大門同明洞所見,哩啲街頭小販可以話係無處不在。唔似得香港政府咁將小販管理變成行業扼殺,南韓當地政府就可以將哩啲小販攤檔管理得井井有條,俾好多年青人有個做吓小生意嘅機會,亦為當地旅遊業增添不少特色。



哩啲小販攤檔擺滿明洞中央路一帶嘅街道,當中有唔少仲係賣熟食嘅攤檔嚟;但佢哋每個檔口都佈置得整齊乾淨,條街行落完全冇任何污糟邋遢嘅感覺。我見搞哩啲攤檔嘅好多都係年青人,當中有啲攤檔會整啲又搶眼又特別嘅裝潢設計,有啲檔口幾個後生仔著住同款制服一邊跟住音樂節拍跳舞一邊擺賣,哩啲檔口令成條中央購物大道變得又熱鬧又有特色



查實我覺得喺香港好多購物區都有條件搞啲好似明洞哩隻咁嘅夜市;但為咗趕人上樓捱貴租,為咗維持住個地產泡沫,香港政府偏偏選擇扼殺香港人哩啲應有嘅發展空間 。認真希望將來有一日喺尖沙咀、喺中環都可以見到好似明洞哩啲咁正咁有本土特色嘅夜市出現。