向首爾進發 - 韓國冬日滑雪自由行

Blog in Progress
哩日係我哋今次龍平滑雪之行嘅最後一日,玩埋哩個朝早我哋就要搭晏晝三點班穿梭巴士番去首爾。



哩一日一早起身就見到天陰陰,行出露台睇真啲先知原來出面落緊雪。



雖然都已經唔係第一次見到落雪,不過我哩啲亞熱帶老年 Subtropical Old Cake,一見到落雪,第一個反應此終都係即時舉起部相機



查實當時我哋喺酒店房望出去滑雪場嗰邊,見到個滑雪場都好靜吓冇乜人喺度玩緊,都有啲擔心係咪今日天氣會好差所以先會少咗咁多人去玩



驚住哩日會比較凍,穩陣啲出門之前我都著多咗件毛衣同加咗條打底褲。嚟到韓國咁多日,條虧佬褲哩日先第一次出動



出到室外,可能因為著多咗衫,發覺啲氣溫並冇想像中咁凍。



大伙兒先喺酒店搞掂 Check Out 手續同擺低啲行李喺酒店大堂櫃位度,跟住就行過去 Dragon Plaza 嗰邊買 Ski Pass 同租用具,玩埋哩個朝早場滑雪嘞。



出到滑雪場,發覺哩個朝早的確係比之前兩日靜咗好多。



搭 Ski Lift 嗰陣完全唔使排隊,又唔使同其他唔識嘅人一齊坐一架 Ski Lift,仲經常可以一個人覇一部 Ski Lift 嚟坐



同埋最最最緊要嗰樣,人少少我碌落山嗰陣唔使點顧住避人,碌都碌得安心啲 ;天氣差滑雪原來都有哩啲好處。



我估我哋哩個朝早起身之前已經落咗一段時間雪,所以哩個朝早滑雪場啲雪道都感覺係平坦咗冇之前兩日咁崎嶇;同埋啲真雪滑起上嚟的確係比之前兩日感覺流暢好多。



哩一日我哋嘅運氣實在係相當唔錯,個天哩日唔係陰咗好奈;我哋睇完落雪滑過真雪之後,個太陽又慢慢走番出嚟。



不過哩個朝早我諗住天陰陰冇帶太陽眼鏡,後來個太陽出番嚟,我滑完哩場雪入番室內陣時都眼花花咗幾分鐘



我哋玩到 12 點半朝早場滑雪完場之後,就要快快手手還番啲雪具俾櫃位,食過快嘅午飯同換衫,希望爭取多啲時間臨走前再四圍行多陣影多陣相。



差唔多到晏晝三點,我哋由酒店嗰邊拖番隻篋過去 Tower Plaza 出面個停車場,搭上由龍平開往首爾蠶室嘅穿梭巴士 ~ 哩次我地韓國旅程嘅第一階段,龍平滑雪之旅,亦就此完滿結束

留言

  1. 多謝有咁詳盡既資料,可惜我訂既酒店係近龍平既Alpensia holiday inn resort,但至今好似冇咩資料教点由首爾乘巴士去呀……😰_

    回覆刪除
  2. 當時我哋幫襯訂 Purple Bus 去龍平嗰間 Grace Travel,應該都有辦去 Alpensia 嘅巴士線的說。
    不過家陣經佢哋訂巴士飛已經方便好多,可以直接網上填表同付款,唔使好似早兩年咁要寄電郵等佢哋覆咁麻煩。
    我見 Alpensia Resort 個官方網站入面 Transportation 嗰頁都係指去哩個網址 ~ http://www.tourtokorea.com/bus-2/
    你跟住哩個網站個預訂流程填啱啲資料,最後一步去 PayPal 度俾錢,搞掂晒之後應該會收到一封確認電郵。之後就同我喺遊記所寫嘅一樣,封確認電郵入面會有車飛嘅附件,車飛上面有個 barcode,出發前記得要印定張車飛出嚟帶過去,事關查飛嗰陣一定要出示到哩個 barcode 先可以上車。

    回覆刪除

發佈留言