Booking.com

哩日係我哋今次韓國之旅嘅最後一日,夜晚八點就要由仁川機場坐飛機番香港。得大半日時間唔去得太遠嘅地方,哩日我哋都係喺番明洞行街買嘢。唔使遠行可以玩得 Hea 啲,哩日朝早十點先出門,先搞掂酒店 checkout 同放低啲行李喺酒店度,跟住就出街食早餐嘞。



酒店附近有間飯卷天國,見哩間食店網上多人推介,於是入去試試。



去到飯卷天國叫幾款唔同款式嘅飯卷試吓就當然唔少得,另外亦加咗啲餃子同年糕湯。



食飽飽就起行去行街買嘢嘞。今日其中一個主要目標係樂天免稅店,是關要去幫朋友買啲韓國護膚品。我哋向住樂天百貨嘅方向一邊行一邊睇吓沿途啲店舖,感覺明洞賣嘅衫褲鞋比起香港唔算話係特別平,不過同一隻牌子佢哋就真係有賣好多香港冇嘅款式。

 

查實嚟之前已經上網查過知道樂天百貨哩度嘅化妝品部喺九至十樓;嚟到樂天百貨哩兩層化妝品部真係好似進入咗一個結界一樣 ;喺哩個結界入面所有人忽然間會全部由講韓文轉晒講普通話,用嘅貨幣亦突然由韓圜變成美金

哩度間間專櫃都人山人海,同朋友 whatsapp 拆掂要買邊款嘢之後,跟住就要去排一條長長嘅人龍等俾錢囉貨嘞。講開嚟免稅店買嘢,嚟之前記得護照同機票要跟身,是關買嘢俾錢嗰陣店員會問你囉哩兩樣嘢登記。我嚟買嘢之前查實都冇注意到哩點,好彩剛啱嗰日上機本身都有帶住護照同機票喺身,唔係嘅話又要白行一趟



同行朋友當然唔會企定定等我排隊喇,佢哋就先去咗新世界百貨嗰邊行。幾經辛苦由結界入面衝番出嚟 ,跟住就行過去會合番朋友,再過去哈莫妮超市嗰邊諗住買啲零食做手信嘞。



哩間超市應該細間過我屋企附近間惠X;時間許可嘅話查實好想去首爾站嗰間樂天超市行吓。不過現實係喺哩度買完手信已經差唔多夠鐘要番酒店囉番啲行李 ,跟住去搭巴士出機場走人喇。



我哋四點鐘咁上下番到酒店執番啲行李,跟住過對面馬路嘅機場巴士站,準備坐 6015 號巴士去仁川機場嘞。哩程車算幾好彩唔係太塞車,五點零鐘就到達仁川機場。喺機場 Hea 咗陣食啲嘢,跟住就去排隊 check-in 嘞。



原本諗住哩日我哋喺機場啲時間已經預到好鬆動,不過等 check-in 條龍真係又慢又長;搞掂 check-in 同行李寄倉之後過海關又排多轉,結果去到登機閘嗰陣,距離原本上機嘅時間唔夠半個鐘 ;實在估唔到我哋預到啲時間咁鬆動結果都可以搞成咁。



不過班機實際上都遲咗大半個鐘先上得機。我哋夜晚八點幾喺仁川機場上機,到差唔多香港時間零晨十二點,終於平平安安冇穿冇爛番到香港,完成哩趟韓國滑雪𠽌之旅