Booking.com

今次計劃十一月中近近哋去台中玩幾日。未開始講詳細嘅行程之前,先講講出發前要準備嘅嘢。

首先係訂機票;格過幾間航空公司,此終最平都係 HK Express。機票連稅加 20 kg 寄倉行李盛惠千零蚊港銀。

住宿方面,喺台中市嗰幾晚想盡量住喺台中車站附近,是關由台中車站同附近嘅干城站搭公車去今次計劃中想去嘅幾個景點都比較方便。上網格過幾個選擇,最後經 booking.com 訂咗達欣商務精品飯店一隻單人房,房租每晚台幣千四有找。

今次會喺清境逗留一晚,而哩晚喺清境嘅住宿都係經 booking.com 預訂,搵咗間舖號叫維也納小木屋嘅民宿雙人房,房租一晚台幣三千有找。

搞掂住宿同機票,跟住就要搞點上合歡山哩個問題嘞。喺清境上合歡山嚟講,一般大路嘅玩法我估都係去到搵民宿幫手約日出團。不過如果去睇日出嘅話,一來天寒地凍要凌晨兩三點剷自己起身你都咪話唔囉命 ;二來除咗睇日出之外,自己今次都幾想有多啲時間可以睇埋合歡山嘅星空。基於哩兩個考慮,於是決定嚟個冇咁大路嘅玩法,今次上合歡山改玩睇日落同觀星。

出發前搵資料陣時見幾多講去合歡山嘅博客文章都提過邱教官哩個當地辦合歡山團嘅團隊;加上清境搞合歡山日落觀星團嘅團隊唔多,於是決定跟一個刨過嘅博客入面留低嘅資料試試寄電郵聯絡哩個團隊嘞。

據我嗰日跟哩個團上合歡山嘅觀察,我估嗰日跟哩個團上山嘅,當中大部份都係台灣本地人;台灣本地人約團嘅話,相信佢哋多數都係經電話預約。可能因為咁,哩個團隊好似唔係太習慣經電郵去接啲由外地嚟嘅預約

大約出發前一個月,我跟住網上嘅資料嘗試寄電郵過嗰邊報團。過咗兩日都唔見嗰邊有回覆,於是試吓喺邱教官個 Facebook 網頁度留個口訊。結果再過多兩日之後教官嗰邊先有人回覆我之前個電郵。而 Facebook 嗰邊,就隔咗成個月之後佢哋先發現我喺佢個 Facebook Page 度留咗個短訊

佢哋啲合歡山團嘅花款都幾多吓,由日出到入夜都有唔同嘅玩法;下面就係當時佢哋經電郵覆我嘅各類團種同出團嘅價錢。

  • 日出團約 04:00 出發,每位台幣 500
  • 半日遊約 08:30 出發,每位台幣 800
  • 日出+半日遊約 04:00 出發,每位台幣 1200
  • 夕陽約 16:00 出發,每位台幣 800
  • 銀河約 19:00 出發,每位台幣 800
  • 夕陽+銀河約 15:30 出發,每位台幣 1200
  • 銀河+日出,每位台幣 800
  • 夕陽+楓之谷,每位台幣 1500
  • 夕陽+楓之谷+銀河約 13:00 出發,每位台幣 1800
咁樣經電郵同佢哋報團查實只係一個口頭嘅預約;科水嚟講,查實係到玩嗰日去到見到佢哋上到車 (同玩埋 ) 先至要俾錢 。

佢哋覆我個電郵入面除咗俾咗報團嘅大約行程同價錢資料外,亦有留低佢哋聯絡人嘅手提電話號碼同 Line ID;去到台中之後我主要都係用 Line 同嗰邊聯絡。

原本諗住一個月前先嚟報團已經有啲遲,不過當時嗰邊原來都只係可以確定我去台中嗰幾日當中嘅其中一日係已經有人報咗隻楓之谷夕陽觀星團;如果當時我報其他日子,萬一到嗰日都冇其他人報同一個團嘅話,咁我就有可能要俾兩個人嘅錢包團先可以成團。而最後我都係揀咗嗰日嘅楓之谷夕陽觀星團,團費盛惠台幣 1800。查實嗰日跟哩個楓之谷夕陽觀星團嘅計埋我總共有五個人,不過唔去楓之谷同觀星,齋去睇日落嘅,我估應該有幾十人;所以如果只係諗住報佢哋個夕陽團嘅話,我估應該唔係太需要擔心唔夠人成團哩個問題。哩部份之後講到上合歡山嗰日我會再詳細啲講吓。

行同住嘅預訂基本上搞掂,剩番要做嘅就主要係搵齊各大景點嘅位置同去嗰度嘅交通路線。

過往我出自由行都會盡可能喺部電話度裝定個離線地圖,以防萬一部電話因乜事上唔到網都唔會冇地圖睇。今次去台中亦唔例外,離線地圖就用咗導航王哩個離線地圖 App。哩個 App 可以用地名關鍵字搜尋地點位置,記錄地點座標,同佢啲公車路線資料都好新好齊;我出發前準備行程資料陣時哩個 App 都幫咗我唔少忙。

今次遊台中嘅交通主要係靠坐公車,所以自然唔少得要裝定啲查詢當地公車路線嘅 Apps。出發前搵資料陣時我發覺台中啲公車路線都變得幾快吓;我要坐嘅好幾條公車路線喺我出發前嘅數個月之間,都有過路線或者路線號碼嘅變動。所以去台中諗住坐公車嘅話,除咗睇人哋寫低嘅網上資訊外,一定要對一對啲已經更新咗嘅公車 Apps 資料,唔係嘅話真係有機會上咗車之後先發覺唔知架巴士載咗自己去邊蕩失路㗎

喺台中嗰幾日用過兩個台中公車 Apps 我覺得都幾好用幾值得推介吓。一個係台中公車通;哩個 App 最正嘅地方係佢整合咗 Google 地圖,可以用佢嚟打開個 Google Map,而地圖上面可以顯示所查詢公車路線每一個車站嘅位置,同我本人當時嘅 GPS 位置。過往我出自由行通常都係睇離線地圖多,不過今次去台中,就大部份時間都係睇哩個 App 嘅地圖。

不過哩個 App 有個問題,就係佢啲公車到站時間好似唔係幾準。我去台中嗰幾日,如果等車等得奈想要查清楚班車嘅到站時間,發覺另一個叫台中公車嘅 App 所報嘅到站時間好似比較準確。

另外哩個公車資訊網站我覺得入面啲路線資料都算幾新幾齊全,俾個路線號碼就可以搵到個畫得幾清晰嘅公車路線圖。出發前我將啲有可能坐嘅公車路線圖放定落部電話度,就算萬一電話上唔到網,都有個離線嘅辦法去查番啲公車路線。

台幣方面,以往出門我好多時都係幫嚫獅子錢莊換外幣嘅;之但係今次換台幣佢哋做個 rate 真係好貴吓。結果今次換台幣都係跟大隊去幫嚫番中環百年,兌換匯率 4.03。

有便宜唔使洗頸,出發前搵咗日經開廣東道嗰頭,上去台灣觀光協會出埋張免費嘅悠遊卡

 

一切準備功夫搞得九九十十,亦差唔多到出發嘅時間嘞。喺 2015 年 11 月一個晴朗嘅朝早,禾單拖踏上哩班香港快運嘅 UO182 班機,正式展開今次喺台中嘅旅程