九號風車站 - 搭客運公車台中自由行

Blog in Progress
查實熟食檔哩邊個環境都有啲似香港市政局啲熟食街市㗎。行過一兩個檔口,見好幾檔賣嘅菜色都差唔多,於是都係求其搵檔覺得啲枱櫈企理啲嘅坐底。



一個人去旅行比較麻煩嘅都係食哩個問題;好多嘢食,好似蒸魚鮮蝦炒蟹之類嘅海鮮,此終都係人多嗰陣先點得落手。單拖嚟哩度食晏嘅話,都係覺得整碟小炒再配個麵飯會比較適合



吔飽飯,跟住就準備起行去哩日行程嘅第二站,九號風車站嘞。由梧棲漁港可以坐一程 111 號公車到 9 號風車站;哩個 9 號風車站嘅下一站係 18 號風車站,再下一站就係高美濕地遊客中心站。不過哩條公車線啲班次都幾疏吓;想喺梧棲漁港食完晏晝飯之後坐哩條公車線去到九號風車站,hea 一輪影吓相,之後又要穩穩陣陣喺日落之前去到高美濕地嘅話,就只可以坐晏晝 12:50 開出嘅班次去到九號風車站,落車行完影完之後再等 14:50 開出嘅班次上車,先可以喺日落之前去到高美濕地。



不過我哩日食完個晏晝飯嗰陣已經幾接近 12:50 嗰班車開出嘅時間,查實如果要趕嘅話當時係可以趕上哩班車嘅;不過諗住就算上到哩班車去到九號風車站都係要 hea 兩個鐘等下一班車坐去高美濕地;反正天氣又唔係太熱,於是決定唔上哩班車,當散吓步咁,由梧棲漁港步行過去九號風車站嘞。由梧棲漁港到九號風車站話就話只係相隔一個車站,不過哩一個站步行嘅話查實都要行大半個鐘嘅時間。



我由梧棲漁港起行,先經過一座人魚地標;之後沿住北堤路一路行。



北堤路哩段路查實都算幾好行;不過行完哩段路,再轉入去環港北路就比較難行嘞。



做得風力發電站嘅地方,可想而知嗰頭附近定必大風。我由北堤路一轉入去環港北路,四周就突然間變得好大風;風大本身查實唔係太大問題,不過哩段路對出有個泥灘,所以啲風會夾雜住好多黑沙,咁嘅情況下逆風而行就會行得比較辛苦。



大約行咗大半個鐘就嚟到哩個九號風車站;未去高美濕地睇日落之前,想先嚟哩度近距離咁睇吓嗰幾座風車。



今次出發前查實曾經試過用 Google Maps 街景想睇吓搵唔搵到九號風車站哩個位置嘅站牌;是關如果喺 Google Maps 度搵到站牌嘅話,我就可以確定哩個車站真係存在,唔怕到時嚟到冇車搭。不過嗰陣喺網上嘅街景係睇唔到哩個位置有公車站嘅站牌。到哩日嚟到現場,竟然俾我搵到之前一直想搵嘅哩個站牌。原來個站牌經過長年累月同哩度嘅風沙搏鬥,一早已經壯列殉職;佢條屍重要一路瞓咗喺路邊冇人理,真陰功



查實哩度啲風沙嘅破壞力實在係唔講得少;今年八月一個颱風蘇迪勒,已經 KO 咗哩度 7 座風力發電機組 ;可以見到幾座之前被攔腰吹斷咗嘅風車,到依家都重未安裝番好。



嗰日喺風車站磨到兩點半咁上下,就行番過去對面馬路準備搭 14:50 喺梧棲漁港開去高美濕地嘅 111 號公車嘞。



是關哩個九號風車站根本冇公車站牌,加上我亦唔係百份之百肯定嗰個位置真係有哩個公車站存在,所以當時亦唔敢太老定,未夠鐘就早早企定定等車。



九號風車站哩個位置近海旁嗰條行車線係開往梧棲漁港嘅方向。搭車去高美濕地方向嘅話,就要過一過對面馬路企定定等車嘞。



大約三點鐘咁上下終於見到哩班 111 號公車駛到。上車發覺原來哩班車全車得我一個乘客;部巴士行咗一陣,跟住我竟然聽到佢個報站系統廣播話下一站係梧棲漁港 ;聽到哩個廣播我當堂俾佢嚇咗一跳,即刻拎部電話出嚟對一對個地圖睇吓自己係咪上錯咗反方向嘅巴士。好彩開個 GPS 又睇見自己的確係向住高美濕地方向行緊,原來只係個司機開錯咗個報站廣播,虛驚一場



不過我覺得咁樣某程度上亦反映哩條行車線平日應該好少人搭,所以啲司機先會渣得咁 hea 。亦因為咁,如果諗住喺九號風車站哩啲中途站上車嘅話,就要小心留意部車到站同主動截車,唔係嘅話好易俾架公車飛站上唔到車。



無驚無險終於坐到高美濕地遊客中心站落車嘞。原本我係諗住由哩度步行過去高美濕地木棧道嗰邊嘅;於是落咗車就自然係拎部電話出嚟四圍望再諗吓跟住應該點行喇 ~ 完全冇留意我前面有部巴士停咗喺度。可能巴士入面嗰位司機大哥見我傻吓傻吓咁有啲睇唔過眼,於是佢大喝一聲叫我埋去佢度 ,跟住問我係咪想去高美濕地 …… 我先醒水原來嚟到剛啱有架可以接駁去高美濕地嘅公車準備開車。



哩條 178 號公車線係由高美濕地遊客中心開往清水火車站,途經高美濕地。本來坐哩條行車線去高美濕地嘅話,最近我估應該係喺高美濕地站落車嘅;不過好奇怪,部巴士去到西安朝天宮站嗰位司機大哥就叫咗我落車。



不過哩個我都係番嚟香港之後對番啲公車 Apps 先至發覺嘅;嗰陣我根本冇預過自己會上哩班車,所以當時亦冇睇清楚條行車線啲車站嘅位置。至於點解嗰位司機大哥要喺西安朝天宮站而唔係高美濕地站放我落車,查實到依家我都唔係好明

留言