宮原眼科 - 搭客運公車台中自由行

Blog in Progress
晏晝五點鐘返到台中,又未到食晚飯嘅時間,正好去宮原眼科打個白鴿轉順便食個飯前甜品嘞。



宮原眼科算係今次嚟台中其中一個點都想去行吓嘅景點嚟,事關實在係幾喜歡佢將一座舊建築嘅一段歷史用咁聰明嘅方法活化,溶合埋店舖本身嘅商品,到家陣哩座宮原眼科已經係台中嘅一個旅遊地標嚟。



話說上世紀台灣日據年代嗰陣,日本人宮原武雄喺哩度興建咗一間眼科醫院,哩間宮原眼科係當時台中最具規模嘅私人醫院嚟。



二次大戰台灣戰勝之後,宮原武雄被遣返日本,之後哩座眼科醫院經歷改建、占用、戰爭、地震、颱風,最後重荒廢咗好一段嘅日子。



後來日出集團接手咗哩座廢宅,保留宮原眼科嘅名稱同原本嘅牆垣,將哩座原本幾近頹傾嘅建築改建成為日出一間最有特色嘅旗艦店。



家陣哩度除咗日出自己嘅產品之外,重有下午茶、餐廳、同埋最多人排隊買嘅宮原冰淇淋。



睇完好似霍格華茲學院一樣嘅店內裝潢之後,就行返出去迴廊外面買雪糕食嘞。



本來諗住都差唔多到晚飯時間,應該冇咁多人會喺哩啲咁嘅時段走嚟食雪糕喇呱 ~ 結果原來咁諗係錯嘅 。嚟到見到哩度買雪糕條人龍一樣排晒出門口,想喺迴廊出面搵個位坐低基本上係諗都唔使諗



嚟哩度食雪糕嘅目的似係嚟朝聖多過真係想搵好嘢食,所以一開始對哩度啲雪糕味道嘅期望查實唔大。



不過試過之後又發覺哩度啲雪糕嘅味道原來都相當唔錯,感覺比喺香港 Häagen-Dazs 賣啲雪糕滑好多,同埋啲甜味亦冇咁單調;套用番啲飲食節目嘅形容詞,就係杯雪糕啲甜味食落真係幾有層次感



不過喺嗰度食雪糕我發覺有個問題真係幾難搞嘅,就係嗰度附近冇洗手間洗手亦搵唔到垃圾筒掉個雪糕杯。結果我要拎住個雪糕杯返到酒店先搵到垃圾筒掉咗佢。查實返酒店除咗想洗手同掉雪糕杯之外,主要係想返去拎番支腳架,諗住一陣喺草悟道食完飯之後去影吓夜景。



喺酒店 hea 咗陣攤唞吓,跟住就落樓去搭 81 號公車去草悟道嗰頭食晚飯嘞。



出發前睇食評,搵到草悟道嗰頭有間艾可先生漢堡好似幾啱單拖去食。



雖然哩間嘢主打食漢堡包,不過唔想食包嘅話佢哋都有賣意粉同意大利飯。



發覺台中好多食店啲汽水都可以無限添飲,哩度都唔例外。斟汽水嘅話行去汽水機自己拎個膠杯就任斟唔嬲。



查實哩晚嚟草悟道食飯嘅主要目的係想去草悟道個廣場度影吓夜景嘅,可惜哩晚九點幾嚟到發覺廣場啲燈已經熄晒 。夜景影唔成咁唯有早啲返歸嘞。我沿住草悟道廣場向住誠品嗰邊行咗陣夜街,跟住就喺誠品對出個巴士站上咗一程 27 號公車返酒店瞓覺嘞。

留言

  1. 你好, 想問下你台中食評睇邊個 web? thanks

    回覆刪除
  2. 其實真係好難特定講話睇邊個 web 搵食評,我大部份搵啱心水想去嘅都係上 Google,用地方名加美食之類嘅關鍵字 (例如: 草悟道 美食) 去搵,不過當中都見有啲組織得比較有心機嘅食評 Blog 或者你用得著:

    http://coolmac.tw/30714#a0

    http://sunny5738.pixnet.net/blog/post/143502748

    https://tags.pixnet.net/blog/site/%E5%8F%B0%E4%B8%AD%E7%BE%8E%E9%A3%9F#user/jason123455

    https://tags.pixnet.net/blog/user/DREAM3S/%E6%B8%85%E6%B0%B4%E7%BE%8E%E9%A3%9F

    至於你另一條問題唔係好明你想要啲乜料,哩個我試試覆個電郵過你啦。

    回覆刪除

發佈留言