Booking.com

我哋坐嘅哩班機係零辰 00:25 嘅夜機嚟,班機準時出發。我哋由香港去赫爾辛基機程大約 14 個鐘,上機冇耐就開始派飯,食完飯冇耐就熄燈瞓覺。哩班芬航班機剛剛轉咗用 A350 客機,機倉個內籠都好新淨吓。



班機到赫爾辛基之前會再派早餐,食完個早餐磨多兩個零鐘,大約朝早六點鐘就到達赫爾辛基嘅 Vantaa Airport。雖然我哋嘅目的地係冰島,不過因為冰島同芬蘭都係申根國家,所以我哋係喺芬蘭哩度過海關嘅。



過咗海關之後就係申根區同內陸線嘅候機區,如果轉機夠時間嘅話,查實可以由哩度落樓出去巴士站或者火車站搭車去赫爾辛基玩一陣,玩完返機場再過一次行李檢查就可以返嚟哩個候機區繼續等上機。



不過哩程轉機時間唔夠 3 個鐘所以我哋冇咁樣出去玩。我哋之後回程嗰程嘅轉機時間就多好多,哩部份之後講到去赫爾辛基嗰段行程嗰陣先再詳細講吓。



我哋喺候機區哩度周圍行行企企睇吓啲舖頭咁,等 08:45 出發去冰島嘅班機。



哩次去冰島嘅班機都一樣準時。上機之後只會派杯嘢飲冇派嘢食,機程就大約三個鐘,朝早九點幾我哋就到達 Keflavik Airport。



感覺冰島機場入境區哩度似商場多過似機場;我哋預約咗租車公司喺機場哩度攞車,喺商場哩度攞返件行李再行出去機場大堂,第一件事先要搵租車公司嚟湊我哋嘅職員。



租車公司啲人嚟遲咗少少,我哋喺機場大堂四圍蕩咗陣都唔見租車公司啲人,正想揾舖頭諗住買張電話卡打電話俾佢哋嗰陣佢哋先嚟到。



佢哋係先揸車到機場,再接我哋去佢喺機場附近嘅舖頭度攞車嘅。查實間舖離機場大堂唔遠,由機場大堂步行過去嘅話行大約十分鐘都去得到;下面個地圖都有個圖釘記低咗喺機場附近哩間租車公司嘅位置。



去到佢舖頭辦妥租車手續攞咗部車,之後嘅第一站先去 Reykjavik 我哋哩日入住嗰間民宿附近諗住先泊低架車。



Reykjavik (雷克雅維克) 應該係冰島唯一有收費泊車區嘅市鎮嚟,哩個網站有個詳細嘅列表列出雷市唔同嘅收費泊車區嘅收費時段同費用。



查實我哋哩個時間去到民宿係重未夠鐘辦入住手續嘅,第一站去嗰度嘅主要原因係哩間民宿剛好喺 Reykjavik 嘅收費泊車區外面,喺嗰頭附近可以免費泊低部車,跟住我哋就可以喺附近行吓街食完個晏,到夠鐘 check-in 先返民宿,諗住入到屋之後唞吓再煮個早啲嘅晚飯,食完再揸車出去已經過晒收費泊車時段,咁就慳返唔使煩搵現金散銀泊車嘞



泊低架車之後第一站先去行吓 Hallgrimskirkja 穿梭機大教堂,哩個景點距離我哋住嗰間民宿只係隔條街咁近。喺教堂行咗陣,跟住就沿住海傍方向行,一路行吓街一路搵吓晏晝哩餐有乜啱食。



結果撞咗入去海傍附近一間食炸魚嘅餐廳,唔知係冰島近年多咗華人嚟哩度旅行定還是哩度本身都興食飯,哩間嘢啲套餐好多都可以跟飯上,估唔到嚟到冰島第一餐就有飯食



哩頭搞掂咗晏晝嗰餐,嗰頭就要諗定一陣夜晚嗰餐點搞嘞。哩日晚飯諗住喺民宿度自煮,所以食完晏就沿住海傍行過去附近一間 Bónus 超市上貨嘞。

講開超市,喺冰島都有好多 grocery store 嘅店舖品牌,例如 Bónus、Krónan、Nettó、Víðir、Nóatún、Hagkaup、Samkaup Úrval、Samkaup Strax、Kaskó、10-11、Kjarval、Melabúðin、Sunnubúðin、Pétursbúð 同 Kjötborg 等等。喺 Reykjavik、Selfoss 同 Akureyri 哩啲比較大嘅城市,比較容易搵到好似 Bónus 同 Krónan 哩類大型超市;大型超市賣嘅貨品種類比較多,價錢亦通常會比較平。而去到東南部,東北部啲比較細嘅市鎮要買餸煮飯就要幫襯啲好似 Samkaup 哩類比較細嘅 grocery store 嘞。哩啲細啲嘅舖頭有時啲價錢會比大超市貴啲啲;雖然凍肉蔬菜生果飲品零食都可以買到,不過貨品選擇就比大超市少。哩次行程我哋經過幾間 Samkaup 都有賣埋漢堡包熱狗薯條之類嘅熟食,亦可以借到洗手間方便。旅途中要搵個平靚正嘅地方食啲熱嘢同愒一愒腳嘅話,除咗油站以外,哩啲細超市都係一個唔錯嘅選擇嚟。

查實喺哩次行程同個廚房相關嘅嘢基本上都唔係好關我事 ,所以趁住我啲團友走去搵啲俾一般人食嘅嘢嗰陣,我就走咗去發掘啲喺超市入面可以買到嘅冰島傳統極限食材。



首先俾我搵到哩包 Hákarl ~ 傳說中嘅冰島臭鯊魚肉,佢本身係格陵蘭鯊嘅魚肉嚟。新鮮嘅格陵蘭鯊魚肉含有一種叫三甲胺氧化物 (亦啫係尿素) 嘅毒素,食咗會出現腸胃不適痾嘔肚痛小兒驚風外感發冷無名腫毒四時感冒腰酸背痛小便不暢前列腺發大眼叮噹發嘔竇發雞盲飛蚊症發耳賺眼啤啤鬼鼠肉拜拜肉痴孖筋長短腳鴨那腳主婦手~un~un~腳香港腳等等嘅症狀。哩啲鯊魚肉要經過四至五個月時間嘅發酵同晾乾處理,等肉裡面嘅尿素分解成阿摩尼亞先至食唔死人。不過豐富嘅阿摩尼亞亦等於濃烈嘅尿餲味 ,所以哩隻 Hákarl 並唔係一般嘅難食咁簡單,佢係全球數一數二極具挑戰性嘅暗黑極限食材嚟。



跟住又俾我搵到另一包 ~ 就咁睇個包裝估唔估到係啲乜東東嚟呢 ~ 冇錯,就係一個羊頭,Svið 烤羊頭查實係冰島一道傳統嘅名菜嚟。Svið 嘅食法,係先將羊頭上面嘅皮肉用刀叉刮落嚟食,刮到個羊頭開始見骨嗰陣,再用刀叉撬開佢個咀再割佢條脷落嚟一啖咬落去,跟住撐開佢雙眼皮,再用匙羹挖佢隻眼珠出嚟再一啖咁含落個咀入面 …… 哩種豪邁得嚟帶一點野性,放蕩得嚟帶一點不羈嘅食法,亦係冰島一道充滿原始風味嘅暗黑料理嚟。



好多去冰島玩嘅人都會專登去當地嘅餐廳,特別係喺 Hofn 嗰頭,試試冰島一隻叫 Langoustine ~ 挪威海螯蝦,(好多台灣博客會叫佢做冰島龍蝦) 嘅美食。查實除咗去餐廳可以食到 Langoustine 之外,亦可以去超市買返嚟自己煮嘅。今晚哩餐晚飯我哋就喺超市買咗包,返民宿用佢整咗個海鮮焗飯嚟試試嘞。