Booking.com

未開始講哩日嘅行程之前,又先睇睇我哋喺 Selfoss 哩一站入住嘅哩間 Gesthus Selfoss 係點環境。



哩間民宿係一座獨立屋嚟,房租一晚盛惠 ISK 38,400。



我哋訂民宿嗰陣網上資料應該係寫間屋有一間房有一張雙人床,一間房就有兩張單人床嘅,不過實際入住嗰陣就發覺原來間屋有三間房,多咗間有張雙人床嘅房。



哩間屋算係我喺冰島住咁多間民宿當中值得推薦嘅其中一間,首先四個人住三間房咁自然會覺得間屋好寬敞啦。



除咗空間夠之外,間屋亦執得好企理,廚房浴室床舖毛巾都好乾淨。



間屋出面有個露台,露台度安裝咗個 hotpot,不過我哋食完晚飯已經幾夜,早啲瞓覺比較緊要,所以都冇時間試試開著佢嚟浸吓。



間屋喺大廳度有個開放式廚房,廚具杯碟一應俱全,最正嘅係個廚房有部洗碗碟機,朝早整完早餐將啲碗碟放晒入去開機就走得,唔使自己洗碗,慳返好多時間。