Booking.com

Jökulsárlón 係冰島最大嘅冰川湖,哩個冰川湖嘅南邊近海岸線有個出海口,沿住一號公路有一條行車橋橫過哩個出海口嘅河道。喺哩條橋嘅東面同西面近出海口有幾個停車場,下面個地圖就標示咗哩幾個停車場嘅位置。



嚟 Jökulsárlón 當然係為咗睇湖面上嘅浮冰喇 ~ 咁圍住湖邊咁多個停車場嘅位置當中,到低邊個位置睇浮冰係最正嘅呢?



出發之前我刨過嘅遊記一般都講話喺橋東面嗰個停車場位置嘅湖邊,應該係比較理想嘅觀賞浮冰嘅位置嚟;而以我哋去到當日親身嘅觀察嚟講,似乎亦係咁嘅情況。



我哋大約晏晝四點幾揸車到達東面嗰個停車場。



哩個停車場亦係附近啲 Jökulsárlón Boat Tours 上落船嘅位置嚟。



喺冰島我覺得有兩個景點就咁睇相係感受唔到現場睇嗰份震憾嘅感覺,一個係喺 Dyrhólaey 嗰座 Rock Arch,而另一個就係 Jökulsárlón 哩個冰川湖嘞。



查實我之前喺飛嚟冰島嗰程機上面都曾經喺空中俯瞰望見哩個冰湖,嗰陣見到冰湖上面好似唔係好多冰塊。



跟住喺行冰川嗰陣同一位台灣嚟嘅冰川團團友吹水,佢亦係早一日去過哩個冰川湖,都話唔係睇到好多冰塊。



本來哩次去都有少少打定咗個輸數,諗住可能真係到夏天天氣熱嘅關係,未必有好正嘅冰湖景色睇到,不過好彩今次嚟到都可以睇到好多幾巨型嘅冰塊。



綜合以上嘅觀察,我估喺 Jökulsárlón 要睇到壯觀嘅冰塊,查實都要睇到步嗰陣剛啱有幾多冰塊由冰川度沖咗落個湖度又未流出大海,所以嚟哩度有冇靚景睇查實都要講少少運氣㗎。



出海口條橋西面岸有幾個停車場,Google Maps 就冇標記到哩幾個停車場嘅位置,不過 maps.me 嘅 Open Street Maps 圖資就有記錄到哩幾個停車場嘅詳細位置。



一來覺得喺橋西邊嗰幾個停車位置嘅岸邊未必會睇到太大差别嘅風景,事關目測見湖上嘅冰塊都係比較接近東面岸哩邊嘅湖畔。



二來最重要都係時間,事關之後我哋重要去民宿辦入住手續,跟住再去 Hofn 食晚飯。



如果大晏起錨離場嘅話驚去到 Hofn 啲餐廳打晒烊冇地方食飯咁就麻煩,所以我哋都冇揸車過去橋西面啲停車位置,直接停咗喺橋西面嘅沙灘度。

Jökulsárlón 嘅冰塊由冰川湖經出海口流出大海,好多時啲冰塊會由出海口沖到橋東西兩邊嘅沙灘上面,所以一般遊客喺冰川湖睇完浮冰之後,都會去哩兩邊嘅沙灘碰吓運氣,睇吓有冇機會可以近距離咁喺沙灘上面接觸到哩啲大型嘅冰塊。



可惜我哋哩次去到嗰陣海邊冇乜大嚿嘅冰塊沖到上沙灘上面;喺哩度停留咗一陣,見冇乜收穫於是我哋再去橋東面嗰個沙灘停一陣睇睇個環境,點知哩邊沙灘直頭想揾粒冰粒睇吓都冇



大約喺 Jökulsárlón 留到晏晝五點半,我哋就出車向 Hofn 嘅方向進發嘞。我哋喺 Hofn 附近預訂咗哩晚落腳嘅民宿,未去 Hofn 開飯之前,我哋先去民宿辦理入住手續同放低啲行李。



喺民宿安頓好啲家當,跟住就出車去 Hofn 開飯嘞。Hofn 係冰島有名嘅龍蝦小鎮嚟,哩度食小龍蝦大路嘅有兩間餐廳喺網上係比較多人推薦嘅,一間係 Humarhöfnin Veitingahús,而我哋哩日幫襯嘅就係另一間都出名、舖號叫 Kaffi Hornið 嘅餐廳。



哩間餐廳嘅地方唔係好大,我哋去到嗰陣雖然都幾多人客,不過又幾好彩剛啱有吉位,唔使點等位一陣間就有位坐。



查實喺講我哋到步第一日喺 Reykjavik 嗰集都有提過,哩隻小龍蝦應該係一隻叫 Langoustine ~ 挪威海螯蝦嘅生物嚟。哩隻蝦種同我哋喺香港食開嗰啲龍蝦並唔係同一種類,不過好多台灣嘅遊記博客都叫咗哩種蝦做冰島龍蝦。



今年九月喺深圳有人因為進食一隻小龍蝦引致橫紋肌溶解症入咗廠,嗰隻小龍蝦據報導原來同我哋喺冰島食到嘅都係相同種類嘅海螯蝦嚟。當然就算品種係屬於同類,喺挪威出產同深圳出產肯定品質同衛生方面會有好大出入,食嚟講喺冰島食哩隻小龍蝦我覺得就應該唔會有乜大問題嘅。不過以食味嚟計,我個人就覺得哩隻小龍蝦並冇網上啲人講到咁正;啫唔係話佢唔好食,不過亦唔係話正到味皇食一啖跟住大哎 “好好味呀” 嗰隻咁囉。

反而嗰餐食到其中一味小龍蝦配羊扒入面啲羊扒我就覺得相當之有驚喜嘞;老老實實喺冰島食哩味羊扒之前,我真係唔知道羊扒原來係可以嫩口到咁嘅地步 。因為我哋同行有朋友好怕羊肉嘅騒味,所以除咗喺 Hofn 食嘅哩餐之外,我哋都冇喺其他地方或者喺超市買過羊肉食。如果本身食得羊嘅話,強烈推薦羊肉哩家嘢去到冰島真係好值得多啲去探索一吓。



食完飯我哋去咗 Hofn 海邊一處觀景位置度吹吓海風;到大約夜晚九點我哋由 Hofn 回程返民宿休息,哩日緊湊嘅行程亦就此完滿結束嘞。