Booking.com

我哋大約晏晝八點到達 Varmahlíð,未去民宿之前我哋先去附近一間舖號叫 Hesta Sport 嘅地方,諗住碰吓運氣睇吓嗰度會唔會重未收舖,可以問吓第二日朝早有冇騎冰島馬嘅初級團可以報。又幾好彩雖然去到舖頭已經打咗烊,不過舖頭重有職員未走,問到第二日朝早可以出到十一點鐘嘅初級團之後,我哋就開車踩去哩晚落腳嘅民宿嘞。



上面個地圖就記錄咗哩間 Hesta Sport 同我哋落腳嗰間民宿嘅位置。哩間民宿舖號叫 Syðra-Skörðugil Guesthouse,哩度喺今次我哋冰島行程中住過咁多間民宿當中唯一一間冇獨立浴廁嘅住宿嚟;不過哩度亦係我哋住過咁多間民宿當中收費最相宜嘅一間,哩度一間可以住四個人嘅客房房租一晚盛惠 ISK 25,000,比起之前嗰啲住宿平咗一截。



不過一分錢一分貨,慳家嘅代價就係間房真係劏房咁細間,一張雙人床加張碌架床,剩返嘅地方打開晒四隻篋之後真係行都冇地方行。

 

間民宿一屋三伙共用一個廚房同兩個浴廁;民宿嘅廚房、浴廁同客飯廳等等嘅共用空間都算打理得幾乾淨,啲廚具床舖同毛巾亦尚算清潔。

哩間民宿嘅房租係包埋個早餐嘅,佢哋早餐嘅包法都幾特別,係喺雪櫃度放滿食物,住客想食乜就自己喺雪櫃攞出嚟煮就可以。



除咗房間比較細之外,哩間民宿另一個問題係哩度真係好多烏蠅,今次啲烏蠅並唔係我哋喺 Reykjahlíð 見到嗰啲細細隻嘅 Black Flies,而係一般喺香港見到嗰啲咁上下大隻嘅烏蠅嚟。不過又公平啲咁講句,嗰度多烏蠅似乎唔太關嗰間屋打掃得乾唔乾淨嘅事,間屋本身係執得幾企理嘅。我估問題係 Varmahlíð 本身唔係大城鎮,嗰度啲屋起得比較疏落,好多屋、包括我哋住嗰間嘅四周都係啲草地嚟。喺冰島似乎哩類咁嘅城鎮環境會比較容易多烏蠅,打掃完過一陣間屋外嘅烏蠅一飛到入屋,就會出現我哋見到嘅狀況;查實我哋之前喺 Hofn 嗰站住嘅民宿都有類似嘅情况,所以我估真係要避免咁嘅情況,就唯有盡量選擇啲比較大同人口集中啲嘅市鎮嚟落腳嘞。

哩晚我哋係最後一批住客用個廚房煮飯嘅,我哋之前喺超市買咗包肉眼扒諗住哩晚煎一煎佢嚟做餸喇,點知煎牛扒嗰陣啲油煙又試整響咗屋入面個火警鐘 ! 同之前喺 Húsavík 嗰晚一樣,唯有一路同啲同屋住客沙冧一路揾警鐘個 panel 撳返停佢喇 ,好彩今次都好快揾到嗰個 panel 整停個警鐘。



查實寫哩篇遊記嗰陣喺網上討論區同另一個剛去完冰島玩嘅香港人交流過,佢哋喺冰島亦同樣試過煮飯嗰陣整響咗住宿嗰度嘅火警鐘。似乎冰島民宿啲火警鐘好多都設定得比較敏感,有機會去到嗰邊啲民宿煮飯嘅話,家陣我會建議要認真考慮吓避免用煎炒炸哩類容易產生油煙嘅煮法嘞。