Varmahlid 騎冰島馬體驗 - 冰島夏日環島自駕遊

Blog in Progress
之前一日我哋喺到達民宿之前,先去今早諗住幫襯嗰間辦騎馬活動嘅 Hesta Sport 打咗個招呼,因為咁我哋知道哩日朝早可以十點半先過去搞報團手續,加上嗰間 Hesta Sport 距離我哋住宿嘅位置只係幾分鐘車程,所以哩日朝早我哋就可以瞓到黃朝百晏先起身再慢慢煮個早餐,到民宿其他住客個個都出晒門,我哋重喺個廳度搲梗腳趾;腳趾搲到十點零鐘我哋就起錨出車去哩間 Hesta Sport 度報團嘞。報團嗰陣除咗要填一份有關一般個人資料嘅表格之外,重要每人簽一張生死狀。查實我哋今次報嘅只係一個俾冇騎馬經驗初學者玩嘅初級團,團費就盛惠每位 ISK 6,805 大元。



填好晒啲文件俾晒錢,舖頭啲職員先帶我哋去間舖後欄一個休息室飲杯茶去個洗手間等出發。



查實我估我哋等嘅應該係哩個團另一組嘅團友,而哩組團友只係得兩個外國人。我哋喺之前嗰晚去間舖問嗰陣,見佢哋好似係查過哩日朝早本身有團先至約我哋朝早十一點過嚟跟埋個團出發嘅,所以我估幾大機會哩度有兩個人或以上就已經可以成到團都唔定。



哩次跟哩個初級騎馬體驗團整體嘅質素我覺得算係中規中舉,不過今次有兩樣嘢我覺得哩間 Hesta Sport 唔係做得咁好嘅,先講第一樣;查實我哋並唔係喺報團哩間 Hesta Sport 嘅辦公室度上馬出發,出發前間舖俾咗一張好簡陋、手畫嘅地圖教我哋去真正上馬嘅地點;我哋嘗試跟住張地圖開車揾嗰個馬房嘅位置,不過去到佢地圖所標示嗰個位置嗰陣我哋搲晒頭揾極都揾唔到嗰個馬房喺邊度。好彩後來馬房啲人遠遠見到我哋架車,最後係佢哋揸車出嚟截返我哋再帶我哋去真正上馬出發嘅地點,而上面個地圖就記錄咗哩個馬房正確嘅位置。

我哋跟住佢哋架車行嗰陣先發現原來之前我哋揾路嗰陣係有經過佢哋馬房圍欄個入口嘅,不過因為個入口只係得一個細細嘅馬頭公仔嘅水牌又冇字寫清楚佢個舖號,所以我哋經過咗都睇唔到。查實由我哋報名嗰間舖去到嗰個馬房都只係幾分鐘車程,就算你唔車我哋往返嗰個馬場,我覺得最起碼都應該揸車帶一帶我哋過去吖



去到馬場,我哋先喺一個細啲嘅圍欄度分配馬匹同上馬,今次帶我哋出團嘅係一位粗曠得嚟帶一點霸氣嘅馬男嚟,我哋一團 6 個人全程就係得佢一個人湊晒我哋咁多個。



上馬嗰吓馬男領隊會逐個扶一扶我哋上馬嘅,上咗馬之後領隊會簡單講解吓例如點拉韁繩去教隻馬轉左轉右停步等等嘅心法,傳授完心法之後無論你領唔領悟得到,都要跟領隊去馬出發㗎嘞。



不過事實上沿途我哋都唔使點去控制隻馬嘅,啲馬匹基本上係識得跟大隊慢慢行,我哋只要有辦法坐喺隻馬上面唔跌落嚟就冇問題。哩次騎馬行程沿途嘅景色我就覺得只係普普通通冇乜特别,睇風景嚟講哩個場就老老實實冇乜嘢特別好睇,騎哩轉馬主要都係叫做攞個同啲冰島馬接觸吓嘅體驗咁囉。



頭先講話哩個團有兩樣嘢我係唔多老黎嘅,之前講咗第一樣依家講埋第二樣。旅程途中我哋會走過一段我估應該係山谷中嘅一個斜坡,嗰段斜坡我估個斜度冇 60° 都應該有 45°,斜坡中間有一條大約一至兩呎闊,我估係由馬行出嚟嘅山徑。我喺馬上面向下望,係望唔到谷底係啲乜環境嚟嘅 。雖然我都明白北歐民族無論戰鬥力 HP 值同經驗值各方面都相當之出眾,個個都玩開鐵人哩啲山路對佢哋嚟講只係小兒科,不過一個講明係俾冇騎馬經驗嘅人玩嘅初心團,你一條友帶團五六個冇準備過嘅人走去行埋哩啲路線點計我都覺得有啲魯莽,亦都反映哩間公司辦團嘅安全意識唔多足夠,基於哩個考慮嘅話我個人就對於推介哩個騎馬團會有少少保留嘞



行程去到尾聲領隊會帶我哋快放一小段路,之後再橫過一條唔係好深嘅河流。事關河水唔深,坐喺馬上過河基本上係唔會點濕身嘅,過完河之後嘅路段都係啲平坦嘅草地。



成個騎馬行程大約一個鐘,終點亦係起步嗰陣嗰個圍欄。



未落馬之前領隊會用我哋嘅相機幫我哋影吓相,落咗馬之後會派啲一粒粒綠色好似波子咁上下大細嘅馬糧俾我哋試吓喂自己騎過嗰隻馬,不過喂馬嗰陣我先發現原來啲馬係用條脷去舐啲波子入口嘅 ~ 哩個故事教訓我哋如果下次有機會再喂馬嘅話,我估我會帶定個方便即棄嘅薄身膠袋去薦一薦隻手先去喂嘞

留言