Booking.com

Helsinki 嘅教堂嚟講,我個人最想去行吓嘅係 Temppeliaukion Church,不過我預計返到赫爾辛基再搭車去到哩間教堂嗰陣嗰邊應該已經關咗門入唔到去;望返手上有限嘅資料,當時我哋唯一去到重開梗門夠時間俾我哋入去行吓嘅教堂就只得 Tuomiokirkko 赫爾辛基主教座堂。



Tuomiokirkko 本身亦就近我哋落船嘅碼頭,由碼頭出發唔使十分鐘就行到過去。



赫爾辛基主教座堂嘅芬蘭語係 Helsingin Tuomiokirkko,係芬蘭信義會赫爾辛基教區嘅主教座堂,位於芬蘭首都赫爾辛基市中心嘅參議院廣場,亦係赫爾辛基其中一座著名嘅地標嚟。



哩座教堂屋頂中間有一個綠色嘅大圓頂,大圓頂嘅四邊各有一個小圓頂,圍住屋頂上方重有十二聖徒嘅雕像。



教堂係喺 1830-1852 年間興建,可以容納 1,300 人,教堂入面係一個十字形嘅大禮堂,主入口位於西側,祭壇就位於東側。



喺 Tuomiokirkko 出面嘅參議院廣場亦係赫爾辛基一個著名嘅景點嚟,Senaatintor 係一個正方形嘅大廣場,廣場中間有座沙皇亞歷山大二世紀念碑。



哩座大理石紀念碑豎立於一八六三年,企喺紀念碑上面嘅係沙皇兼芬蘭大公爵亞歷山大二世嘅雕像,雕像下方四面就係工、農、科技、法律四神嘅雕像。



我哋晏晝五點幾行完 Senate Square,到哩個鐘數亦差唔多要去揾個地方坐低食啲嘢跟住返機場嘞。



打開地圖見 Kamppi Chapel 康比木頭教堂附近有個商場應該都方便揾地方食嘢,加上又可以順便去睇吓嗰座教堂,於是我哋決定去嗰頭行一陣食個飯先返機場。



由 Senate Square 行去 Kamppi Chapel 查實都唔係好遠,不過喺 Senate Square 對出有個電車站,可以坐一程 2 號線電車過去,而我哋手上嗰張 day pass 又可以免費坐 Helsinki 市內嘅電車,於是就算近近哋都好,我哋都照坐一程電車過去。



哩個網站可以揾到一個幾詳細嘅赫爾辛基電車路線圖。



哩條 2 號電車線途經好幾個赫爾辛基嘅旅遊景點,例如 Rautatieasema 站附近嘅中央車站、Simonkatu 站附近嘅 Kamppi Chapel、Sammonkatu 站附近嘅 Temppeliaukion Kirkko 等等,喺赫爾辛基坐公共交通工具玩自由行嘅話,哩條電車線差唔多可以話係一條必坐嘅路線嚟。



我哋喺 Simonkatu 站落車行兩步就到 Kamppi Chapel,不過我哋去到嗰陣已經過咗教堂嘅關門時間入唔到去入面祈禱,只可以喺門外影吓相。間教堂隔離就係一座叫 Kamppi Center 嘅商場,我哋入去揾咗間餐廳坐低食啲嘢,哩餐晚飯都唔算食得太貴,我哋平均每位落樓都係港銀一嚿水有找。

 

商場入面重有間 K Supermarket,可以平平哋俾我哋清一清啲歐羅散銀。喺超市買完嘢,跟住我哋就行返過去火車站嗰頭準備揾巴士站搭車返機場嘞。



喺火車站門口剛啱見到幾個赫爾辛基嘅 ~ 真·騎警



返機場都喺坐返同一條 615 號巴士線,上車嘅地方就喺火車站對出一個廣場附近嘅一個巴士總站。



我哋黃昏八點幾返到機場,到咗機場之後先去儲物櫃攞返啲手提行李,跟住過一過行李檢查關閘就入返去內陸線嘅候機區嘞。



國際線候機區喺 32 至 40 號登機閘,過哩邊嘅登機閘之前要先過海關,之前嗰篇 Blog 都有提過,轉機嘅話過咗海關去到 32 到 40 號登機閘嗰邊之後就唔可以再離開機場,只可以喺機場入面等上機。



喺國際線候機區嗰邊都有個商場有啲舖頭可以行吓嘅,我哋今次坐返香港嘅班機都準時,差唔多零晨十二點正上機,機程大約十粒鐘,途中派一次晚餐同一次早餐;喺 2016 年六月一個晴朗嘅中午,我哋終於平平安安冇穿冇爛返到香港,完成今次冰島嘅環島旅程