Grand Canyon 住宿 ‧ La Casa Bonita of Old Town - 自駕巡遊美國西岸國家公園

Blog in Progress
大約夜晚七點半我哋揸車到達呢晚落腳嘅小鎮 Flagstaff,未返民宿之前我哋先喺鎮上一間 Safeway 超市買餸準備一陣自己晚飯自己煮。呢晚我哋落腳嘅呢間 La Casa Bonita of Old Town,都喺經 Airbnb 租嘅,間屋一廳三房,有一個浴廁,租金一晚就盛惠 HK$1,180 大元。



呢間算係今次行程中我哋揀得比較差嘅一間民宿嚟,先數幾個呢間民宿唔多掂嘅地方。首先屋主標示間屋嘅位置真係好唔清楚,佢只係話到俾我哋知要喺間屋對出嗰條 West Phoenix Avenue 度揾一個寫住 116 1/2 編號嘅郵箱,之但係我哋去到嗰陣已經天黑條街真係暗到伸手不見五指嘅地步,黑嘛嘛乜都睇唔到,起初我哋揾極都揾唔到嗰個郵箱。後來我哋打電話揾到個屋主,但係佢喺電話度講嗰啲街名我哋喺地圖度完全揾唔到,好彩後來揾揾吓終於俾我哋撞棍揾到嗰個郵箱先至入到間屋



間屋外面睇個賣相查實認真嘛嘛,不過睇過 Airbnb 啲評語又覺得間屋應該似打理得乾淨,加上我揾屋嗰陣以呢個價位喺大峽谷一帶要揾間又乾淨又有三張床位嘅屋都唔係太容易,嗰陣見都冇乜其他更好嘅選擇於是就扑鎚去馬租呢間。



間屋有三間房每間房都有一張瞓到兩個人嘅睡床,另外客廳有張擺到好似梳化嘅彈簧床,窄窄哋免強都瞓到兩個人嘅。



屋本身都叫做執得企理,不過啲裝修同傢俬都好殘舊吓。



浴廁都算打理得乾淨嘅,不過間屋啲床鋪同毛巾嘅清潔度就只算係一般。屋入面有洗衣乾衣機可以用,我哋今次行程所住過嘅民宿當中都唔係好多間有得免費洗衫的說。



廚房啲用具嘅清潔度叫做免強合格咁喇,不過啲設備就真係有啲殘舊,特別係佢個煮食爐頭,四個爐頭當中有兩個係撻唔著火嘅;最初我哋撻咗兩個爐頭都唔著重以為個爐壞咗,好彩冇放棄試埋第三個先撻得著個火,如果嗰晚用唔到呢個明火煮食爐嘅話,齋靠個微波爐煮嗰晚餐飯都會幾頭痕

留言