錫安國家公園 Zion Park 到聖喬治 St George - 自駕巡遊美國西岸國家公園

Blog in Progress
大約晏晝四點幾我哋返到停車場,跟住落嚟行程嘅路線我哋大至上有兩個選擇。



由 Sunset Point 我哋可以揸車向南沿住一條大約 18 英里路程嘅 Scenic Drive 駕駛,呢條行車徑沿途有好幾個觀景點可以從唔同嘅角度欣賞 Bryce Canyon 嘅風景地貌。



而其中一個叫 Rainbow Point 嘅觀景點係 Bryce Park 入面最高嘅一個觀景點嚟,喺 Rainbow Point 度可以睇到峽谷一個叫做 Bryce Amphitheater 劇院式嘅地貌,係 Bryce Park 入面其中一個幾值得去行吓嘅觀景點嚟。



不過我哋當日選擇嘅就係另一條路線,返到 Sunset Point 之後我哋就揸車經嚟嗰陣嗰個出入關閘離場向住附近另一個國家公園 Zion Park 進發嘞。



查實出發前我所預想嘅日程係去到 Bryce Park 嗰陣只係揾一至兩個 Viewpoints 喺谷頂外圍度影幾張相就走人,跟住再去 Zion Park 揾條易行嘅 trail 行吓睇吓風景嘅;不過嚟到 Sunset Point 嗰陣先發覺唔落去 Navajo Loop Trail 行嘅話真係等如冇嚟過咁濟,結果喺 Sunset Point 就花咗意料之外嘅個幾鐘時間行 trail。



雖然因為咁我哋可以留喺 Zion Park 嘅時間少咗,不過嗰陣我見喺 Zion Park 都有啲係可以就咁停一停車唔使點花時間行就可以睇到嘅景點,所以行完 Navajo Loop Trail 就只係一心諗住盡快踩去 Zion Park,嗰陣完全冇諗起可以放棄唔去 Zion Park,改為近近哋去埋 Rainbow Point 呢個選擇。



查實都有啲關自己計劃行程嗰陣太貪心之過,我哋去到 Zion Park 嗰陣先知道,嗰幾個就咁停低架車唔使點行就睇到嘅景點,可以俾我哋成功達陣嘅,就只得 Checkerboard Mesa 呢一千零一個地方



事原係 Zion Park 好多景點附近嘅泊車位係非常之短缺,要喺景點可步行嘅距離附近泊車嘅話,除非倒塔咁早去到覇車位,否則嘅話就真係要非常之夠運先可以泊到架車喺啲景點附近嘅位置。

查實正路咁預返足夠時間入去 Zion Park 嘅話,通常都預咗喺 Zion Park 入面會有好大機會揾唔到車位;揸車入去玩嘅話,一般會試吓喺遊客中心周圍揾唔揾到車位泊車,如果遊客中心都冇晒車位嘅話,就會選擇喺國家公園外圍,例如 Majestic View Lodge 附近先泊低部車,再坐公園提供嘅免費穿梭巴士來往公園入面嘅景區。



據我所知喺 Zion Park 入面有兩條穿梭巴士線,其中一條巴士線 The Springdale Shuttle 主要係來往 Majestic View Lodge 同公園入面遊客中心附近嘅 Zion Canyon Village,而另一條巴士線 Zion Canyon Shuttle 就係來往遊客中心同公園入面嘅主要景區,喺呢個網站入面可以揾到呢兩條巴士線嘅詳細路線圖同各站點嘅位置,上一篇 Blog 入面個地圖亦記錄咗呢兩條巴士線中幾個主要巴士站嘅位置。



我哋喺 Checkerboard Mesa 逗留咗十零分鐘,之後經過 Overlook Trail 同 Junction Bridge 附近都揾唔到位置泊車,嚟到呢度我哋已經決定放棄喺 Zion Park 繼續蒲落去 ,直接開車向我哋呢晚喺 St George 落腳嘅酒店進發。



我哋去到酒店搞掂入住手續同放低啲行李,跟住上網揾吓附近有乜餐廳啱口胃,最後決定去呢間 Benja Thai & Sushi 試吓。



呢間泰國餐廳位於 W St George Blvd,距離我哋落腳嗰間酒店只係幾分鐘車程。



呢間餐廳嘅地方都相當企理,環境清靜服務亦唔錯。



嘢食嘅水準就不過不失喇,呢次美國之行發覺嗰邊開啲餐廳都幾多樣化,就算一個細細嘅鎮仔,各式東南亞菜日菜韓菜等等都好容易可以揾到。

留言