San Francisco 住宿 ‧ 1565 Sunnyslope Avenue - 自駕巡遊美國西岸國家公園

又到睇樓嘅時間，最後呢一站我哋喺 San Francisco 落腳嘅呢一間民宿舖號叫 1565 Sunnyslope Avenue，民宿位於三藩市嘅 Belmont，租金一晚盛惠 HK$1,808 大元。



民宿只得一廳一房，睡房入面有一張雙人床。



大廳有兩張床；床鋪同毛巾都好乾淨，今次旅程我哋經 Airbnb 預訂咗 5 間民宿，當中啲毛巾同被鋪嘅清潔程度我覺得滿意嘅查實得兩間，而呢間就係其中一間嚟。

廚房雖然細啲，只係喺大門側邊裝咗個洗碗盤同一座爐頭，不過佢啲刀叉碗碟砂煲罌罉都洗得乾淨，摸上手冇乜油淋淋嘅感覺，唔使點再洗過都可以放心使用。



同埋呢間屋係我哋呢次旅程中唯一一間廚房有電熱水煲用嘅民宿，嚟到最後呢一站我哋終於有一次可以唔使用煎鍋煲水 。