Booking.com

當我哋離開 High Country Salmon Farm 繼續去 Oamaru 嘅行程途中;開車行咗冇幾奈就係公路上發生咗段小插曲。

查實呢段插曲都插得有啲戇居。話說我哋開車行行吓見到公路對面線有部車俾架警車截停咗;見到咁車上啲朋友就開始討論嗰架車到底發生咗啲乜事喇,當時我就搭咀話可能係嗰架車超速所以俾差佬截停抄牌都唔定喎。講到呢道我哋成車竟然冇一個人意識到提司機收油,就咁保持住個車速行咗幾分鐘,就有架警車追咗上嚟要我哋停車。

嗰段公路車速限制係 100 公里,而當時我哋就行緊 110 公里;因為的確係自己超速唔啱,冇計唯有乖乖地收罰單。當地罰超速駕駛係超速得越勁罰錢就越多;個警察測到我哋超速咗十幾公里,今次買呢張紐西蘭鮮製牛肉乾就盛惠紐幣 80 大元。



唔知當地啲警察係咪特別照顧我哋呢啲遊客,之後第二日我哋係去 Dunedin 途中又再次俾另一架警車吊尾;受過之前一日嘅教訓,諗住今次醒目唔超速之餘仲放慢啲個車速喇,一來驚佢個測速唔準車速太貼上限出事,二來都希望佢唔耐煩過我哋頭唔使渣到提心吊胆咁;點乜知原來咁渣都係咄事,又再一次俾架警車截停。

好彩今次個警察唔係要抄牌罰錢 。原來今次問題係我哋車速太慢,阻住後面啲車行。佢話如果後面啲車唔耐煩越過對面線爬頭的話,就好容易發生意外咁話。

紐西蘭啲 highway 好多都係得兩條線,向每個方向都只係得一條行車線用。因為咁嘅原因,係紐西蘭啲 highway 渣車嘅正確車速應該係盡量貼住個車速上限嚟行。又因為當地啲公路彎多,條路啲車速上限會成日變,入彎前要減速出直路後就要加速,所以要時不時留意住啲路牌或者個 GPS 嘅車速提示,適時增減車速。如果渣唔慣車唔敢渣到條路個車速上限咁快,就要時不時搵避車處停一停讓後面啲車行先。經過今次事件,就學識咗以上係紐西蘭公路渣車嘅正確禮儀嘞



番嚟個行程先。由 Tekapo 去 Oamaru 呢段路都成三個幾鐘車程,如果人有三急,途中有個叫 Kurow 嘅地方係一個借洗手間方便吓嘅好去處。嗰道有間細細間嘅博物館,入面除咗可以借個洗手間用一用之外,仲可以順便參觀吓當地啲歷史文物。



係 Kurow 落車鬆一鬆,之後上番車再行冇幾遠,就係今次行程其中一個我覺得幾值得去一去嘅景點 ~ 大象岩。



今次行程我哋主要用嘅兩款地圖,TomTom 同 Google Map,入面都冇標記到呢個大象岩嘅明確位置。下面個地圖就記低咗呢個大象岩嘅位置係邊。


在較大的地圖上查看紐西蘭南島自駕遊 2014 - Oamaru

由 83 號 highway 去 Oamaru 途中會經過一個叫 Duntroon 嘅小鎮;過咗呢個小鎮後留意右手邊一條路叫 Livingstone Duntroon Road;



轉入去呢條路行冇幾奈再左轉,大象岩就係 Island Cliff-Duntroon Road 道。



去到嗰個位置會見到一個細細個嘅停車位,個停車位旁邊就棟起咗個寫住 Elephant Rocks 嘅路牌;



對面有個圍欄同一個細細個嘅閘門,閘門側邊有個介紹牌,就咁打開個閘門就可以行入去。



紐西蘭好多景點都係因為做過啲賣座電影嘅拍攝場境而出名。2005 年迪士尼有套賣座電影《納尼亞傳奇:獅子•女巫•魔衣櫥》,而大象岩就係呢部電影入面最後嗰場大戰嘅其中一個主要場境。



大象岩呢個地方原本係一個私人嘅農莊嚟;農莊個主人都幾好人,唔收費冇任何限制俾啲遊客自由咁入去玩 。入面應該係一個主要用嚟放羊嘅地方,所以通地都係啲羊咩咩留低嘅地雷



入到去睇見啲唔同形狀嘅石頭一排一排咁座落係大片草地上面,個情景就好似入咗去一個大自然雕塑藝術展咁。



呢啲石頭據說係二千五百萬年前本來係海底下嘅沙泥嚟嘅,長年累月嘅擠壓令呢啲沙泥慢慢變成石灰岩;地殼變動令呢道由海底變成陸地,風沙流水嘅侵蝕又令呢啲石灰岩露出地面,最後就變成依家咁嘅地貌嘞。



入面啲石頭有大有細,大舊啲嗰啲石頭直頭可以用嚟玩攀石,而呢道事實亦係一個玩攀石嘅熱點嚟。查實俾番啲想像力,上面舊石頭可以叫恐龍頭石,下面舊叫企鵝石又得,冬菇石又得

 

行完大象岩上番車,下一站直踩去今日落腳嘅地點 ~ Oamaru。