日落合歡山 - 搭客運公車台中自由行

由楓之谷起行向住武嶺方向進發，大約行咗廿分鐘車程，教官再喺路邊停車俾我哋落車影相。



離開楓之谷之後嗰段車程已經明顯感覺到啲氣溫下降得好快，去到哩個位置落車嗰陣我已經要著起晒帶嚟嘅厚衫。



都係大約十分鐘嘅逗留時間，跟住教官再叫我哋上車去下一個景點位置。



哩個位置可以遠遠望見松雪樓。查實一陣睇完日落之後我哋都會去嗰度食晚飯嘅。



又係大約十分鐘嘅逗留時間，我哋再上返車去下一站武嶺亭。



出發前刨人哋啲遊記見到好多人都係喺武嶺亭哩個位置度睇日出嘅。不過我哋哩次嚟睇日落嘅係另一個位置，喺武嶺亭哩度只係逗留一陣，參觀吓喺合歡山哩個咁著名嘅地標。



嚟到武嶺亭哩度我已經連教官幫團友預備定嘅外套都著埋上身 。武嶺亭對面有洗手間，之前行楓之谷嗰陣搞到雙手污糟晒，嚟到哩度終於搵到地方洗洗雙手。



喺哩度停留咗大約廿分鐘，教官再吹雞叫我哋返上車。



跟住下一站就係我哋哩日睇日落嘅位置嘞，我哋喺哩度同其他參加咗夕陽團嘅團友會合一齊上山，目測參加哩個夕陽團嘅應該起碼有數十人。



唔知係我冇留心聽書定係教官佢查實都冇同我哋講解過，總之嚟到嗰陣查實我係矇查查完全唔知哩度係啲乜地方嚟。



不過好彩我都醒目嚟到嗰陣用電話個 GPS 地圖軟件記低咗哩度嘅座標 ，返到香港查番先知原來自己哩日嚟咗合歡山嘅主峰度睇日落。



哩座合歡山主峰係合歡群峰入面其中一座山峰嚟，山峰高度有 3,417 公尺。



合歡群峰係由七座山峰相連組成，哩七座山峰分別係我哩日嚟睇日落嘅合歡山主峰、合歡山北峰(3,422公尺)、合歡山東峰(3,421公尺)、合歡山西峰(3,145公尺)、石門山(3,237公尺)、石門北峰(3,278公尺)同埋合歡尖山(3,217公尺)。



當中合歡山嘅主峰、北峰、東峰、西峰同石門山都係名列於台灣百岳當中。



不過我哋睇日落嗰個位置查實只係喺登山口附近，哩度距離主峰嘅峰頂查實重有一段距離。



如果真係由我哋落車起行嘅登山口出發步行上去哩個主峰嘅峰頂嘅話，應該起碼要大半個鐘嘅時間。上峰頂睇日落嘅可行性查實唔大，事關日落之後要摸黑行返落登山口應該會相當危險。



行上去我哋睇日落嗰個位置嘅山路唔算難行，開頭嗰段山路重係用石屎鋪好嘅行人路嚟；上高少少嗰段雖然係啲冇鋪過嘅山徑，但係條山徑唔算太斜，行嚟講唔使好花體力都可以好輕鬆咁行到上去。



不過喺嗰條山徑上面行嗰陣查實都會有少少腳軟嘅感覺；事關嗰段山路兩邊都係啲幾斜嘅斜坡嚟，特別係向住日落嗰邊嘅山坡，感覺如果叉錯腳碌咗落去嘅話會碌到落山腳下面渣都冇得剩嗰隻 。我喺嗰度行上行落搵位影相嗰陣都係驚驚青青細細步咁行；不過嗰度啲好攝之徒就大胆好多，見佢哋啲腳架係一排排咁戙晒出個斜坡出面。



大約五點零鐘個日頭收得七七八八，教官就吹雞召集各方團友行返去登山口集合上車嘞。哩晚入黑之後我哋重有一場觀星嘅夜場，不過喺踩埋哩晚嘅夜場之前，先要去搵地方醫肚食晚飯。