Booking.com

喺香港發短訊我估九成人都係用 whatsapp,但係發覺台灣哩方面原來同香港幾唔同,嗰邊似乎大部份人都係用 line 發電話短訊;哩幾日搭巴士嗰陣望見當地人啲手機都係開住個 line 嘅畫面;而我亦係要用 line 同預約帶我上合歡山嗰個邱教官團隊嘅人聯絡。

查實喺香港同教官嗰邊預約嗰陣,佢哋已經講咗我知上山當日係晏晝一點喺清境集合上車,而當時我亦已經知會咗佢哋我喺清境將會入住邊間民宿。到去完溪頭返嚟嗰晚,我經 line 再同教官嗰邊聯絡,主要係通知佢哋我喺台中嘅電話號碼,同單聲過佢哋知我大約十二點零鐘會去到清境。



跟住就係上合歡山嘅行程嘞。首先講吓哩日朝早搭公車去清境嘅攻略。喺台中去清境,可以喺干城站坐一程南投客運嘅公車去到埔里站,再喺埔里轉車去清境。

不過南投客運朝早由干城站開去埔里站嘅公車班次查實好疏,萬一嗰日多人搭車令我上唔到朝早頭幾班開出嘅公車,我就有可能會錯過去合歡山嘅預約時間。為求萬無一失,所以決定哩日一早去干城站攞定朝早 8:25 am 南投客運第一班開出去埔里嘅公車號碼牌。



查實之前一日喺干城站搭車去溪頭嗰陣已經問過南投客運嘅櫃位,知道佢哋朝早六點幾鐘就會開舖派籌;我住嗰間酒店同干城站都只係十分鐘嘅步行距離,所以哩日朝早六點零鐘就先行過去干城站南投客運嘅舖位,攞咗 8:25 am 開出嗰班車嘅號碼牌,之後先返酒店食早餐、執行李同辦妥退房手續,跟住就咩埋件行李行返去干城站等 8:25 am 哩班開去埔里嘅公車嘞。

上咗車之後發覺原來哩個朝早搭車嘅人唔係太多,咁啫係話就算我一早唔過嚟攞籌,要上到哩班公車查實都係冇乜問題嘅。不過哩度啲公車邊日邊班車多人查實好難講同都幾睇彩數,預早嚟攞定籌此終比較穩陣。



南投客運由干城站開去埔里站嘅公車路線號碼係 6899 路。哩條公車線每日有 6 班車由干城站開去埔里站,首班車喺朝早 8:25 開出,尾班車就喺晏晝 14:25 開出。南投客運叫哩 6 班車做清境農場無縫接駁公車,事關哩 6 班車去到埔里站之後都唔使轉乘其他班次嘅公車,可以原車轉為 6664 號公車直接開去清境。



既然有無縫嘅公車,咁有冇有縫嘅公車呢?有嘅話咁哩啲有縫公車又係啲乜東東嚟呢 ?我估非無縫嘅公車應該係指南投客運另一班開去埔里嘅 6670 號公車;哩條公車線有部份班次係開到日月潭嘅。除咗南投客運,另一間台中的客運公司全航客運亦有一條由台中開去埔里嘅 6268 路公車線;哩條公車線啲班次比較密,首班車朝早 5:30 開出,尾班車夜晚 23:05 開出。不過哩條公車線亦只係去到埔里,到咗埔里之後就要用自己方式 想辦法轉車去清境嘞。



今次搭公車去清境我係拍悠遊卡俾錢冇買南投客運嘅套票,喺干城站上車嗰陣我要先拍一次悠遊卡。部巴士由干城站開出,行咗大約一個鐘鬆啲嘅車程就到達埔里站嘞。



正如先前所講,哩班係無縫接駁公車,所以去到埔里站之後唔使攞行李轉車,到站之後只需要拍一次悠遊卡支付干城站到埔里站嘅車費,而哩程車嘅車費就盛惠台幣 $125。



拍完卡快手快腳落車影幾張埔里站嘅資料相,跟住再上返車拍多次 6664 路由埔里到清境去程嘅悠遊卡,坐番低等部巴士上齊人之後就直踩去清境嘞。

除咗 6664 路嘅無縫接駁班次之外,查實南投客運重有一程 6659 同 6658 路公車都係由埔里開去清境嘅。6664 路公車清境嗰邊嘅終點站就去到青青草原,6659 路多六個站終點站去到松崗,而 6658 路就多九個站,終點站去到翠峰。下面個地圖就記低咗哩三路公車喺清境一啲主要站點嘅位置。



不過上面個地圖只係簡略咁記低程公車喺清境啲主要嘅站點,詳細嘅班次時間表同站點資訊,最好都係查番南投客運清境線南投客運 6670 線、或者全航客運嘅官方網站,又或者跟番上面啲路線號碼用我喺準備篇度提過嘅台中公車通手機程式去番查會比較詳細同準確。



部巴士喺大約朝早 11 點鐘就開到清境嘞。我哩晚喺清境入住嘅係一間舖號叫維也納小木屋嘅民宿,間民宿就喺定遠新村站對面。



到站落車之前要先拍一次悠遊卡俾車錢,跟住就可以落車開行李架攞番件行李嘞;哩程巴士車費就盛惠台幣 $80。



過一條馬路行兩步就去到哩間維也納小木屋,不過十一點鐘嚟到太早未入得客房住,只可以將件大件行李暫存喺櫃位度。



辦妥入住手續之後,先經 line 留個口訊俾教官嗰邊話佢知我已經到咗民宿,會先出外食啲嘢之後大約十二點半鐘返到民宿等佢;交帶妥當之後就行去遊客中心嗰邊搵地方食晏嘞。



離出發唔係太多時間,見遊客中心有間 MOS Burger,咁就快靚正整個台幣 $155 嘅套餐,食完再過馬路對面一間便利店買定啲乾糧以防上山嗰陣肚餓,跟住就返去民宿等教官架車嘞。



教官架車準時晏晝一點鐘到達民宿。揸車嘅係邱教官本人,同行嘅另外重有兩對男女。我哋一行 5 人就係哩日去晒楓之谷、夕陽同銀河觀星 3 個行程嘅團友嘞。而去夕陽團嘅團友就會晏啲 16:00 跟另一架車出發,銀河團就夜晚 19:00 出發。之後會詳細啲講到,哩日應該大部份團友都係跟夕陽團上山嘅,由楓之谷開始行程嘅查實就係得我哋小貓五隻。

感覺上教官手車都幾辣吓,沿住多彎嘅上坡路行咗大半個鐘,先到達一處景點,教官就停低大約十分鐘俾我哋落車影相。



之後上返車再行多大約半個鐘,就去到哩日嘅第一站楓之谷嘞。



查實哩個楓之谷啲紅葉唔係好多,只係遠處山上見到哩幾棵。影咗一陣相跟住教官就問大伙兒夠唔夠胆落去谷下面睇睇。其他兩對男女二話不說就答佢冇問題 ,查實當時我都唔係太清楚谷下面係乜頭乜路,不過成團人都冇問題嘅話,諗住咪跟大隊去睇睇好過一個人留低喇。



點知原來落谷下面係要游繩而下,手腳並用咁爬落去一個十幾米高嘅斜坡,再沿住一條溪澗行一段山路先可以到達 ;條山路崎嶇之餘重相當濕滑,必需要手腳並用咁先行到過去。



完全冇心理準備要行一段咁高難度嘅山路,加上哩日著住嗰對鞋唔係太適合行山,結果行到終點嗰陣搞到成手損晒



谷底哩度查實都只係遠遠咁睇見幾棵紅葉;當時啲陽光又唔多夠加上條溪澗上面俾啲大樹遮住啲光源;距離遠加上唔夠光,樹上面啲紅葉真係好難影得靚。



樹上面嘅紅葉雖然麻麻,不過條溪澗上面啲紅色落葉襯托住啲流水出嚟個畫面就反而相當唔錯 ;聽教官講話哩度遲啲天氣再凍啲嗰陣,條溪澗會鋪滿紅葉,到時哩條溪澗嘅景色會更加靚咁話。



回程又係嗰段要手腳並用先過到嘅山路,同埋又要游繩爬返上嗰個斜坡上面 。上返馬路之後再 hea 咗陣就跟教官上番車,繼續向下一站進發嘞。經過哩次嘅實地考察,我覺得哩個楓之谷嘅紅葉數量少加上只可以從好遠嘅距離觀賞,要俾多 $600 -700 台幣同花多幾個鐘時間去哩度感覺性價比太低,如果俾我再揀一次嘅話相信我會選擇唔去哩個行程齋去夕陽團同觀星團。哩日去夕陽團同觀星團嘅人數我估都有數十人,比較番今次去楓之谷嘅人數,相信某程度亦反映到哩個楓之谷團似乎唔係咁抵玩嘞。