溪頭自然教育園 - 搭客運公車台中自由行

喺妖怪村行到晏晝十二點咁上下，就轉場過去溪頭自然教育園區睇睇嗰邊點環境嘞。哩度平日嘅入場費係台幣 $160，假日入場就盛惠台幣 $200。



今次嚟玩之前一時大意冇查清楚哩度嘅環境，當我由園區入口行去大學池嗰陣，行到半路先開始發覺有啲唔對路 ~ 原來哩度嘅面積比我最初所想像嘅大好多；去到大學池嗰陣我已經可以確定哩日係唔可能行晒成個教育園區。結果就算只係揀咗幾個比較想去嘅景點去行，嗰日全程我都要用比較趕急嘅步伐先行得完個行程。



由園區入口起步，先會經過一條叫翠虹橋嘅吊橋。



沿路嘅山徑都鋪得幾靚，沿途重經常可以見到松鼠出現。



啲松鼠查實俾嚟哩度嘅遊人喂嘢食喂到慣晒已經完全唔驚人，佢哋一見到有人坐抵就會走出嚟等人喂嘢俾佢哋食 。



由園區入口經大學池步道，大約行咗 20 分鐘，就到達大學池嘞。



原來哩個大學池原本係日治時代嗰陣嘅一個伐木貯存場所嚟。



後來台灣光復之後啲伐木作業就停咗，台大實驗林管理處於是將哩個原本荒廢嘅水池加以整治，美化週圍嘅環境，又喺水池中央搭建一座拱形嘅竹橋。





因為哩個水池係台灣大學轄下嘅大學實驗林所管理，咁順理成章就將哩個觀景池取名為「大學池」嘞。



喺大學池影吓相行咗個圈，跟住就起程向神木嗰邊進發嘞。





由大學池回程哩段路改行大學池林道，沿途有一段木屑步道。



再由幽靜步道轉向神木林道，喺神木林道可以見到嗰座有七層樓咁高，穿梭於柳杉林之間嘅空中走廊。



我由大學池出發，大約行咗大半個鐘時間，就到達神木哩度嘞。

據說哩碌神木已經有 2800 年嘅歷史；佢本身係一碌紅檜木嚟，高度大約有 46 公尺，樹圍 16 公尺，樹幹直徑 4.33 公尺。查實哩碌神木樹幹中間因為真菌侵蝕已經枯萎形成中空狀態，不過因為剛啱佢中間包住嚿巨石，嚿石家陣就變咗支撐住哩碌神木嘅基石，令佢就算枯咗都重可以戙直喺度，成為今日園區入面嘅一個奇觀。

喺園區入口、大學池同神木哩度都有休息站，站內有洗手間同熟食攤檔；行到嚟神木哩度已經成一點半鐘過晒食晏時間，於是就喺哩度唞一唞，喺熟食檔買咗個炒米粉做午餐嘞。



大約晏晝兩點鐘就開始由神木出發回程返去園區出口嘞。由神木約莫步行十分鐘，先會去到空中走廊嘅出入口。



哩座空中走廊查實係一條架空廊道嚟；走廊嘅出入口都係喺同一個位置，全程環繞一圈從入口到出口大約 220 公尺長，最高點距離地面有 22.6 公尺，相當於 7 層樓嘅高度。



喺哩個高度穿梭於園區入面嘅柳杉林當中，感覺相當特別。



可能因為走廊嘅地板係鐵網結構嘅關係，喺走廊上面行嗰陣查實可以睇到腳下面嘅景物；因此雖然走廊兩邊都有鐵欄圍住，但係喺上面行嗰陣依然會有少少腳軟嘅感覺 。



喺空中走廊行完一圈，就直往園區嘅出口進發嘞。我由空中走廊大約行咗大半個鐘就行返到園區嘅出口，跟住就行過去巴士站嗰邊等車，搭上三點半鐘開出嘅公車返台中嘞。