哩日係我哋喺冰島最後一日嘅行程，朝早我哋都係喺民宿度自己早餐自己煮，食完早餐就執行李出車，第一站先去 Grundarfjörður 一個必遊景點 Kirkjufell Mountain ~ 教會山。

今集嘅樓盤傳真就等我哋嚟睇吓哩個位於 Grundarfjörður 嘅租盤 Grundarfjordur Guesthouse and Apartments 啦。首先要提醒各位準租客，租盤同租務接待處係位於唔同嘅位置，參觀示範單位之前就要先睇清楚下面個地圖，清楚知道去邊度安排入住手續，同邊度先係樓盤真正嘅位置嘞。

原本我預計大約中午十二點可以騎完馬離場，如果嗰日咁嘅鐘數可以離場嘅話或者我會考慮哩日 Chur 少少去埋 Hvitserkur 先去下一站嘅民宿；可惜哩個朝早我哋騎完馬可以上得返車離場已經係晏晝一點幾，比預計晏咁多離場嘅話就冇乜懸念嘞，大伙兒一於開車直踩到下一站嘅民宿，所以哩日晏晝查實冇乜特别嘅景點會去到。

之前一日我哋喺到達民宿之前，先去今早諗住幫襯嗰間辦騎馬活動嘅 Hesta Sport 打咗個招呼，因為咁我哋知道哩日朝早可以十點半先過去搞報團手續，加上嗰間 Hesta Sport 距離我哋住宿嘅位置只係幾分鐘車程，所以哩日朝早我哋就可以瞓到黃朝百晏先起身再慢慢煮個早餐，到民宿其他住客個個都出晒門，我哋重喺個廳度搲梗腳趾；腳趾搲到十點零鐘我哋就起錨出車去哩間 Hesta Sport 度報團嘞。報團嗰陣除咗要填一份有關一般個人資料嘅表格之外，重要每人簽一張生死狀。查實我哋今次報嘅只係一個俾冇騎馬經驗初學者玩嘅初級團，團費就盛惠每位 ISK 6,805 大元。

我哋大約晏晝八點到達 Varmahlíð，未去民宿之前我哋先去附近一間舖號叫 Hesta Sport 嘅地方，諗住碰吓運氣睇吓嗰度會唔會重未收舖，可以問吓第二日朝早有冇騎冰島馬嘅初級團可以報。又幾好彩雖然去到舖頭已經打咗烊，不過舖頭重有職員未走，問到第二日朝早可以出到十一點鐘嘅初級團之後，我哋就開車踩去哩晚落腳嘅民宿嘞。

由 Reykjahlíð 去 Akureyri 途中會經過 Goðafoss 高莎瀑布，一場嚟到當然要喺度停一停車影張相打個卡先再起錨繼續行程喇。

Dimmuborgir 喺一個遍佈著火山活動特有地形嘅一個景點嚟，話說二千三百年前，喺 Þrengslaborgir 同 Lúdentsborgir Crater 一次嘅火山爆發，當時岩漿流入位於 Dimmuborgir 嘅一個湖度，湖中嘅水份被岩漿蒸發，水蒸氣由岩漿冒出，當岩漿喺咁嘅狀況之下冷卻凝結，最後就形成家陣喺 Dimmuborgir 所見咁一座座岩柱咁嘅地貌。

開始我哋喺冰島第八日嘅行程嘞，哩日我哋諗住喺夠鐘離開 Diamond Circle 出發去下一站嘅民宿之前，盡可能走訪位於 Reykjahlíð 一帶嘅地熱景點。