Godafoss 高莎瀑布 ‧ Akureyri - 冰島夏日環島自駕遊

由 Reykjahlíð 去 Akureyri 途中會經過 Goðafoss 高莎瀑布，一場嚟到當然要喺度停一停車影張相打個卡先再起錨繼續行程喇。



影完瀑布繼續向 Akureyri 進發，我哋大約晏晝五點到達 Akureyri，嚟到第一件事先想揾個 N1 油站喂返飽部車同我哋自己。



冰島好多比較大嘅 N1 油站都附設有快餐店，哩啲油站附設嘅快餐店又有位坐又有得免費上網，一般有返咁上下份量食得飽嘅套餐都係一嚿水港紙有找，喺冰島嚟講算係比較相宜嘅外出用膳嘅選擇。



就好似哩日我哋哎哩個家庭套餐咁，四個大大個嘅漢堡包，加一大碟薯條同每人一杯汽水，都係收 ISK 3,790，維返港紙平均每位都係 HKD 70 有找。我哋嚟到 Akureyri 嗰陣已經過晒泊車限制時段，所以部車點泊都冇乜所謂。不過如果喺泊車限制時段嚟到 Akureyri 嘅話，就要留意哩度泊車嘅規舉嘞。Akureyri 係冰島嘅第二大城市，Reykjavik 同 Akureyri 係據我所知喺冰島唯一有泊車限制嘅兩個城市嚟。

Reykjavik 限制時段內喺收費泊車區內泊車就要俾錢啦，而 Akureyri 喺限制時段內就只係限時泊車唔使收費。喺 Akureyri 各大油站、超市、酒店民宿同銀行都可以免費攞到一張好似咁樣嘅泊車計時卡。

唔同車位會有唔同嘅泊車時限，泊好架車之後只要將計時卡撥到泊車嗰刻鐘嘅時間，跟住再將計時卡放喺車頭當眼嘅地方就可以。如果手頭上冇哩啲計時卡嘅話，查實揾張紙仔寫低開始泊車嘅時間就咁放佢喺擋風玻璃度一樣可以。萬一過咗鐘都未返去泊車位度湊返部車，又或者偷雞將計時卡撥去開始泊車之後嘅時間又俾白炸捉到嘅話就要破財收罰單嘞。喺網上見有啲人寫話 Akureyri 啲白炸開工都幾勤力吓，所以揸車去到嗰度就要留意跟啱嗰度啲規舉嚟泊車嘞。



食完餐快餐已經差唔多晏晝六點鐘，唔想咁晏去到下一站嘅民宿所以我哋都冇花時間喺 Akureyri 哩度行吓，食完嘢我哋先去隔離油站打返爆個油缸，之後就出車去附近一間 Bónus 超市上貨，補充完糧草之後就直向下一站喺 Varmahlíð 嘅民宿進發嘞。