Booking.com

未講哩大半日喺赫爾辛基嘅行程之前,想先巡一巡赫爾辛基萬塔機場 Helsinki Vantaa Airport。事原係我哋朝早六點幾就到步,不過跟住要搭嘅下一班返香港嘅飛機要到夜晚十一點幾先起飛,中間十幾個鐘時間,就當然冇可能留喺機場度齋等上機喇。

芬蘭同冰島都係辛根公約國,由冰島出發上機到芬蘭轉機嗰陣要出機場去赫爾辛基市區度行一陣街嘅話理應係冇乜問題嘅,不過穩陣起見喺出發去冰島之前,我都曾經嘗試揾過有冇遊記有講過相關嘅遊歷,不過此終冇辦法揾到好確切地試過話得或者唔得嘅經驗。所以未開始講哩一日嘅行程之前,想先講吓喺萬塔機場哩度轉機入境嘅一啲經驗。萬塔機場嘅國内線同國際線候機大堂係位於兩個唔同嘅區域,兩個候機區之間就有個海關隔開,來回冰島經芬蘭轉機嘅話,過海關嘅手續係出入赫爾辛基嘅國際線同國内線之間嘅候機區嗰陣搞嘅,到達同離開冰島嗰陣我哋都唔需要再過一次海關。



我哋由冰島上機出發,到達芬蘭落機之後就身處於萬塔機場嘅國内線候機區,海關閘口就喺國内線候機區進入 32 至 40 號閘之前嘅通道。



只要未過海關,我哋都可以自由進出國内線嘅候機區。由國内線候機大堂落一層自動電梯之後會見到一個 2A 閘口,出咗哩個 2A 閘口之後,就要過一次檢查行李嘅閘口先至可以返去候機大堂。



喺冰島零晨一點幾上機,坐嗰六個幾鐘機我基本上都唔喺點瞓得到,落咗機我同我啲朋友個個都攰到瘟瘟燉燉咁,好彩萬塔機場哩度有個真係全球數一數二、世界級嘅德政 ~ 免費嘅 Sleep Pods



哩個 Go Sleeping Pods 位於萬塔機場嘅 Gate 31 隔離,每日朝早 6 am 到夜晚 10 pm 哩段時段都可以免費使用。每個 Sleeping Pods 床底有個可以放手提行李嘅行李架,除咗人可以瞓入去义電之外,床位入面亦有 USB 义座可以俾部電話一齊义埋電;床位頂部有個可以拉出嚟嘅簾幕,拉低簾幕之後床位入面就完全係一個私人嘅空間,喺入面瞓覺真係瞓得幾安心幾好瞓㗎你咪話。



除咗 Go Sleeping Pods 之外,查實喺 Gate 31 隔離有間 Kainuu Room 亦可以免費入去攤抖吓嘅,不過哩度可以真係俾人少睡一吓嘅空間就冇 Go Sleeping Pods 嗰邊咁多。



原本我哋幾個朋友約定小睡兩個鐘係咁兒抖吓,跟住就起身出赫爾辛基躝街嘅;不過到夠鐘嗰陣我又唔見我啲朋友嚟耖醒我,咁我咪諗住抖多陣等有人嚟耖我先起身喇,而我估我啲朋友亦係咁諗,結果大家基於哩種默契之下,我哋就由原本諗住抖兩個鐘變成瞓咗四粒鐘,大家起身洗過臉刷完牙已經朝早十一點幾。



未出去揾巴士站搭車出赫爾辛基之前,先要去機場 Gate 29 隔離一間 R-Kioski 便利店買車飛;喺 Helsinki 搭公共交通工具嘅套票有好多種買法,哩個網站有 HSL 唔同票種嘅詳細資料。



而我哋喺 Helsinki 過大半日去到嘅地方唔遠,格過價都係覺得一隻 EUR 12 嘅 HSL One Zone Day Ticket 嘅日票比較啱使,哩張飛 24 小時內喺 Helsinki、Vantaa、Espoo 同 Kauniainen 都通行,搭機場巴士來回 Vantaa Airport 同 Helsinki 市區,同喺 Helsinki 市內搭電車、Metro、巴士、Commuter Trains 同來回芬蘭堡嘅小輪等等嘅交通工具都一律通行。



機場出入境大堂落一層有收費儲物櫃,臨出機場之前我哋先將啲冇必要隨身嘅行李鎖入儲物櫃度;哩啲儲物櫃有兩種容量可以選擇,細櫃每 24 小時租金盛惠 EUR 5,我哋租嘅係大櫃,每 24 小時租金就盛惠 EUR 6 大元。