芬蘭堡 Suomenlinna ‧ Sveaborg - 冰島夏日環島自駕遊

喺 Senate Square 對出近海旁有個碼頭，可以喺嗰度上船乘搭去芬蘭堡嘅渡海小輪，哩程小輪嘅班次都好密，每日 0620-2200、每隔一小時有兩班船開出，我哋用 HSL Region Ticket 就可以上船唔使另外俾錢。





都好耐未見過可以載車嘅渡海小輪。





開船之後，我哋可以先從船上一個唔同嘅角度睇返 Market Square 同 Torikorttelit 一帶嘅風景。



跟住就係赫爾辛基南港嘅海港風光嘞。



船程大約廿分鐘，到晏晝三點咁上下我哋就到達芬蘭堡哩邊嘅碼頭嘞。



芬蘭城堡芬蘭語嘅寫法係 Suomenlinna，而瑞典語嘅寫法就係 Sveaborg。





芬蘭堡最初係一座建於赫爾辛基東南六個相鄰小島上嘅防禦工事嚟，哩座城堡原來嘅名稱係基於瑞典語嘅斯韋堡 (Sveaborg)。



芬蘭人出於愛國情懷，將哩度重新命名為芬蘭城堡 (Suomenlinna)，而家陣瑞典人同講瑞典語嘅芬蘭人依然係叫哩度做 Sveaborg。



上船嚟哩度嗰陣，睇到 Suomenlinna 同 Sveaborg 兩種語文嘅寫法都會用喺船上嘅水牌度。



瑞典人喺 1748 年開始建造哩座用嚟防禦俄國人嘅防禦工事，後來經過俄國統治時期，到第一次世界大戰，哩六座小島都曾經係一處用作軍事基地嘅地方嚟。



到 1973 年芬蘭城堡唔再作為一個軍事基地，芬蘭政府成立咗一個獨立嘅部門負責管理芬蘭城堡，而家陣哩度已經成為當地社區嘅一部分。



依家大約有 700人住喺島上，當中一半人喺島上工作，而芬蘭海軍學院亦係位於其中一座島上。



雖然芬蘭城堡哩度有佢嘅歷史意義，不過以景色嚟講，哩座城堡感覺上就真係冇乜特别。



查實我哋嚟哩度主要嘅目的都只係想借啲意喺赫爾辛基坐吓渡輪睇吓海景，亦因為咁我哋都冇行晒六座小島。



係咁兒巡咗兩個島我哋就決定班師回朝，想話爭取時間喺 Helsinki 行多座教堂先返機場。



我哋大約晏晝四點鐘喺芬蘭堡哩邊嘅碼頭上船，返到赫爾辛基已經差唔多晏晝四點半。