清境農場．青青草原．觀山牧區 - 搭客運公車台中自由行

未開始講哩日嘅行程之前，先同大家睇睇今次喺清境落腳嘅哩間維也納小木屋係點環境。



今次我入住嘅係一間雙人房，房間相當闊絡，入面嘅裝修傢俬感覺上有少少殘舊，不過床舖尚算乾淨企理。



浴室嘅設備亦唔算係好新淨，浴缸廁盤洗手盤都算乾淨，不過地板感覺有啲殘舊，浴室嘅窗邊亦有少少污漬；房間整體嘅質素只係中規中舉。



巡完我間房跟住一齊嚟睇睇哩度嘅早餐有啲乜嘢食先；哩度食嘅係中式早餐，有粥有麵有餸有多士有嘢飲，食物嘅款式同質素都相當唔錯 。



食完早餐之後先返房執拾行李同辦理退房手續，將啲行李暫存喺民宿嘅櫃位，一切準備妥當之後就起行出門，哩日嘅第一站係清境農場。



由國民賓館去清境農場嘅青青草原一般嚟講都係先乘坐交通工具去到清境農場嘅售票入口，買飛入場之後喺青青草原場內向下坡方向遊玩，先經過觀山牧區嘅出入口，喺牧區繼續向下坡路行進，喺牧區出口離場之後再向下行一段階梯，就可以返到國民賓館附近。



喺清境有一程 2 號公車由國民賓館站出發，途經清境農場旅遊服務中心，觀山牧區，總站到清境農場嘅售票入口，每程車費盛惠台幣 $20 大元；哩日我就係坐哩程公車由國民賓館去清境農場㗎嘞。



清境農場平日嘅入場票價盛惠台幣 $160 元，假日收費就盛惠台幣 $200 大元。



喺青青草原買飛入場之後，第一件事一定要記得喺入口先幫自己打個入場手印，事關一陣由草原區進入觀山牧區嗰陣要先通過一個出入口，牧區入口查飛嘅工作人員會檢查你有蓋手印先會俾你進場。



萬一行出草原區出口之前忘記幫自己蓋手印，之後想進入牧區嘅話就要重新買飛㗎嘞。



哩日嘅天氣相當唔錯，成個草原都係藍天綠草咁嘅風景；沿住下坡嘅路徑慢慢散步影相，感覺都幾舒服。



一路散步嗰陣查實已經聽到遠處傳嚟睇梗綿羊秀人群嘅聲音。



不過自己對哩類騷嘅興趣不大，亦都冇專登加快腳步趕去睇騷。行到嚟綿羊秀會場嗰陣個騷已經到尾聲。



綿羊秀完咗之後，個會場啲工作人就開始拉啲馬匹出嚟俾人玩試騎，哩個騎馬活動好似係要額外收費嘅。





一路向住觀山牧區嘅方向慢慢行，途中行經一條兩旁都種滿楓葉樹嘅下坡小徑。





感覺上清境啲天氣都重未係話好凍，條小徑兩旁啲紅葉查實唔係好多。





台灣始終唔係好凍嘅地方，就算清境係喺海拔比較高嘅位置，要出到好似日本韓國嗰啲地方咁嘅紅葉盛況應該都唔容易。



行吓行吓就去到青青草原區嘅出口，出咗青青草原之後先會經過一排熟食攤檔，喺嗰度厾咗幾串口垃濕，一路食一路向住觀山牧區嘅入口行過去。牧區入口有工作人員查飛，出示之前喺青青草原入口打嘅手印就可以入場。



大約十一點半咁上下入到觀山牧區，剛剛好做梗場馬術表演。



睇完表演就喺牧區四圍行吓。



牧區哩邊同青青草原嗰邊最唔同嘅地方，係牧區哩邊多好多動物睇。



場入面有個圍欄，圍欄圍住幾隻騾仔同馬匹；啲遊客可以喺場入面嘅商店買飼料去喂入面啲動物。





而圍欄入面啲馬仔騾仔亦知道有人就代表有好嘢食，所以隻隻都好識做咁沿住欄邊行嚟行去搲嘢食 。



啲馬仔同騾仔就要困喺圍欄入面，而性情比較温純嘅羊仔就自由好多，可以喺牧區入面嘅草地上面通山走。



啲羊仔唔係太驚人，基本上佢哋隻隻都係好專心咁不停喺度食草。



佢哋好似唔係太喜歡正面咁向住人，只要一企喺佢哋前面，佢哋就會轉身用個 pat pat 向住你再繼續耷低頭努力食草 。



逗咗好耐先至逗到隻肯正面咁望吓個鏡頭。



係嘞 ~ 啱嘞望鏡頭 ~ 1 ~ 2 ~ 3 ~ 笑 ~ 。



喺睇馬仔嗰個圍欄側邊有間小商店，好多人入到去都會買支羊奶雪條食。



繼續向住下坡方向行多陣，就去到一個牧區嘅出口。



由哩個出口可以沿住一條長長嘅階梯向下行，大約行十分鐘左右就可以返到國民賓館附近嘅遊客中心。