草悟道 - 搭客運公車台中自由行

哩日係今次行程嘅最後一日，晏啲就要去台中機場搭飛機返香港；所以哩日都唔去得太遠，諗住都係喺台中市 hea 一陣磨到夠鐘出機場。食完早餐慢慢執好啲行李，喺飯店櫃位辦好退房手續同擺低件行李，跟住就出發去行街嘞。



查實哩日主要係諗住喺草悟道附近一帶行吓；我喺台中火車站上咗部 81 號公車，坐到去市民廣場附近嘅草悟道站落車，跟住就開始喺嗰頭行街嘞。



之前原本係諗住嚟哩度影夜景嘅，不過嗰晚嚟到草悟道發覺廣場啲燈熄晒，結果嗰晚個夜景就影唔成；於是哩日臨上機之前就嚟哩度行吓補返個日景嘞。

喺草悟道廣場附近有間勤美誠品，入面個格局同香港啲商場分別不大，冇乜特別嘢好行，不過天氣熱嗰陣入去凉吓冷氣過個冷河都唔錯的說 。



沿住市民廣場方向前行，途中經過漾 der 市集。



哩個市集應該係每逢假日就會喺台中市舉辦，每次舉辦嘅地點都唔同。



見佢入面賣嘅好多都係啲二手貨同古著，亦有幾檔賣吓啲飲品小食咁。

喺草悟道廣場重有幾檔街頭藝人表演，幾有假日氣氛 。



到午飯時間要搵個地方坐低食啲嘢，行到去中美街見條街好似幾多食嘢嘅舖頭於是就行入去撞吓睇睇有乜啱食嘞。嗰日查實都相當熱又猛太陽，晒到成個人都冇乜胃口，結果都只係求其搵間好樣啲嘅麵店食咗個排骨麵。




哩次嚟草悟道行街，其中一個主要嘅目的係想去勤美術館行吓，事關出發前搵資料嗰陣見哩個美術館啲展品幾得意，重要可以免費入場，見咁著數於是想過嚟參觀吓 。



食完個晏跟住行返過去草悟道廣場嗰邊嘅勤美術館。



去到先發覺原來間美術館裝修梗。



不過好彩個裝修只係影響到啲室內展品，室外嘅展覽重可以行入去睇。



查實我最想過嚟睇吓嘅就係哩件叫做融化的車子嘅藝術擺設。





喺美術館巡咗一轉，亦差唔多夠鐘出發去機場嘞。都係喺市民廣場附近嘅草悟道站上車，不過哩次等到部 27 號公車，坐返台中火車站。



跟住搭 302 號公車去機場；喺機場食過晚飯跟住就過關等上機。喺 2015 年 11 月一個天朗氣清嘅晚上，終於平平安安冇穿冇爛返到香港，完成今次台中公車之旅 。