Seven Sisters Cliffs - 倫敦近郊景點

行程最後一日，我哋朝早會出車去行吓一個叫 Seven Sisters Cliffs 嘅景點，諗住玩到 11 點零鐘就開車返機場交車。Seven Sisters Cliffs 呢個地方如果認真行嘅話查實係可以行足一整日，挑戰一條超過 20 公里嘅步道。


不過我哋就諗住簡單啲，係咁兒揀兩個 Viewpoints 影吓相打吓卡就夠皮唔使玩得太剌激。


我哋由 Crowborough 開車，大約個零鐘車程先到達第一個 Viewpoint。



呢個 Viewpoint 唔係太熱鬧冇乜人，亦可以隨意免費泊車。


呢度主要係睇一個例景，呢個例景嘅佈局係要以 Seven Sisters Cliffs 為背景，前面再襯托一間有幾支煙囪嘅石屋。



因為呢一日預咗唔係好多時間，影完呢個例景我哋就快手快腳出車向下一個 Viewpoint 進發。呢個 Viewpoint 就比較熱鬧，人比較多停車場亦比較大，不過呢度停車要科水 £3，同之前我哋去過大部份郊外嘅收費停車場一樣，如果冇辨法收到香港信用卡登記電話嘅 SMS 嘅話就只可以入硬幣銀仔，出張 Park and Display 嘅泊車飛放喺車內擋風玻璃嘅當眼處。

我發覺英國都有好多景點係用哈利波特場景嚟做招徠，例如我哋第一站喺倫敦去過嘅 Leadenhall Market，今次行程冇機會去嘅 Millennium Bridge、喺 Oxford University 嘅 Christ Church dining hall 等等，而 Seven Sisters Cliffs 呢度亦係一個哈利波特嘅場景嚟。


喺哈利波特 - 火盃的考驗 (Harry Potter and the Goblet of Fire)，由之前石屋 Viewpoint 望過去嗰個景，喺電影開場後幾分鐘嗰座 Cliff 就出現咗十秒鐘唔夠咁大把。除咗比較出名嘅哈利波特系列之外，呢個景點亦係好多其他影視作品嘅場景嚟，例如 1991 年一套俠盜王子羅賓漢 (Robin Hood: Prince of Thieves)、2015 有套福爾摩斯的最後奇案 (Mr. Holmes)、Netflix 有套醜聞真相 (Anatomy of a Scandal) 等等，都有攞過呢個地方做場景。


講返之前講梗嗰個 Viewpoint，呢個 Viewpoint 比之前講嗰個就比較多地方行，我哋先由停車場出面一條樓梯落去石灘行吓。


喺石灘可以睇吓浪，同近距離接獨吓呢度啲 Chalk Sea Cliffs 嘅地質結構，呢種 Chalky Cliffs 嘅地質主要特點係好鬆散好容易倒塌。


所以到我哋上返停車場嗰層，喺停車場後面個山坡行嗰陣都要留意要跟住啲步道行，唔做得企太近啲崖邊。而喺呢個山坡就可以用一個比較居高臨下嘅角度去欣賞嗰排 Chalk Cliffs 嘅風景。


我哋行到十一點幾，諗住預鬆些少時間早啲到機場，事關去到機場重要預時間揾油站打返爆個油缸之後再還車。


我哋搭返香港班機係喺 Heathrow Airport Terminal 5 上機嘅，嗰頭附近 Bath Road 有間 Shell 油站，我哋就揸車過去先打返爆個油缸。嗰個油站隔籬有間麥記有個免費停車場，可惜嗰度啲車位都好爆吓，想泊到車嘅話就要係咁兜圈輪車位，如果可以喺嗰度泊到車嘅話我哋就可以食埋個晏先去交車。


Sixt 有個幾近 Heathrow Airport Terminal 5 嘅交車點，係位於一座舖號叫 Sofitel London Heathrow 酒店嘅地下停車場度。


我哋還返部車跟住就拖篋去機場客運大樓 check-in 等上機嘞。


呢次返香港班飛機都準時，我哋晏晝五點零鐘上機，跟住就嚟個十三幾粒鐘嘅機程，時間係 2023 年 7 月 18 號嘅一個中午，我哋平平安安冇穿冇爛返到香港，完成今次喺英國嘅旅程。