倫敦民宿 - Crowborough 小鎮住宿

晏晝約莫四點幾我哋出車向下一站喺 Crowborough 嘅住宿處進發，途中諗住停一站買餸煮飯喇，點知揾嚟揾去因乜解究間間超市都打晒烊嘅？跟住先醒起喺 Harrogate 住嗰位朋友都提過我哋星期日英國大部份超市都會早啲收鋪嘅。


因為同行朋友想喺行程最後一晚用咗喺 Harrogate 朋友留俾我哋包米認真煮餐飯賀一賀佢，於是我再努力揾一揾，好彩就喺我哋落腳嗰個小鎮 Crowborough 原來重有間 Sainsbury 收黃昏 10 點。



我哋今次行程最後一晚住宿係位於倫敦近郊一個叫 Crowborough 嘅小鎮，經 Booking.com 預訂，房租一晚盛惠 £163。


間屋本身係一座單層平房，屋主係好有心機經營呢間民宿，各項設施都打理得好新淨。



間屋客飯廳有個開放式廚房，梳化床可以打開做一張床。


睡房就有張雙人床，浴廁亦打理得好乾淨。


之前喺 Harrogate 嘅朋友留咗一細包米俾我哋，同行朋友一路都想用佢煮餐飯仔食。


可惜成個行程一係我哋玩得太晏返到住宿處嗰陣已經太攰認真頂唔順再煮九大簋。


夠時間嗰晚又碰啱間屋係 shared kitchen 要同其他住客爭廚房用嘅話又唔方便煮得太複雜，到行程嘅最後一晚先夾正天時地利人和俾朋友認真露兩手煮返餐飯食。