英國購物 - Bicester Village

到尾二嗰日嘅行程，呢一日我哋會由 Wales 揸車去 Bicester Village 巡一巡舖，之後再返倫敦近郊嘅住宿落腳。


呢一程車都幾甘吓，我哋喺到達 Bicester Village 之前途中先喺 Bristol 一間 Morrisons 停咗一站唞一唞，呢間超市有兩個鐘頭免費泊車。


Bicester Village 出名人流暢旺，係極難喺購物區內揾位泊車，揸車入購物園區之前會有水牌顯示區內重有冇泊車位。



正如所料，到達後我哋見到購物區內嘅泊車位已經爆滿，而我哋亦早有準備，喺地圖度記低咗附近一個 Park and Ride 停車場嘅位置，於是就直接去嗰度泊低部車。


呢個 Park and Ride 停車場可以免費泊車，亦有一程免費穿梭巴士直達 Village 入口。


我哋泊好架車行過去巴士站，剛啱有部巴士埋咗站，巴士由呢個 Park and Ride 車站大約行駛十分鐘車程就到達購物區入口。


個購物區嘅面積其實唔係好大，不過就的確幾熱鬧人頭湧湧。


嗰度原來係唔俾人隨便影相，我試過舉起部單反機，跟住就有個警衛行埋我度叫我唔好影相。


不過同時我又見到好多人喺購物街上影相又好似冇乜人理咁，到底嗰度俾人影相嘅準則係點查實到依家我都查唔到好準確嘅資料，我只係估可能佢哋係驚有人會過去嗰度抄款，如果係揸住部感覺專業啲嘅相機又對住啲鋪頭櫥窗影嘅話就有可能會俾人話。


我哋喺購物區入面巡完啲舖朋友亦買到啲心頭好，之後就諗住出車返倫敦附近嘅住宿處。


除咗購物區入面嘅名牌店舖之外，購物區出面有間 M&S Foodhall 同隔籬有間 Nike Factory Store，行遠些少又有 Starbucks、Asda 快餐同一間 Tesco Superstore，我哋就一路行返去 Park and Ride 停車場一路順便巡埋出面呢啲店舖。