英國旅遊住宿 - Aberaman 英國自由行

我哋今次英國之行尾二呢一站嘅住宿係喺 Wales 一個叫 Aberaman 嘅小鎮，平日應該冇乜遊客會嚟呢度，我哋嗰晚喺一間中餐館 Wok U Like 嗌外賣食，個中國人老闆係好好奇咁問我哋無喇喇做乜會嚟咗呢個小鎮度。



可能因為冇乜遊客會去嗰度揾住宿，呢一站住宿嘅租金係今次行程中最平嘅一站，間屋經 booking.com 預訂，一晚只係盛惠 £81。


租金雖然平，但間屋嘅質素算唔錯，地下一層大廳有個開放式廚房，浴室亦喺呢一層，廚房浴室都打理得幾乾淨。


再上一層有兩間睡房，一間放咗一張雙人床，另一間有兩張單人床，啲床鋪毛巾亦乾淨可以放心使用。



我哋食完晚飯見附近一間 ASDA 超市重未打烊就過去行吓順便補給吓啲物資。




呢間超市都幾大有兩層，超市出面有個幾大又免費嘅停車場，如果由 Wales 揸車去倫敦嘅話呢間超市都係一個方便中途停一停唞吓嘅地點嚟。